IPL 2026: “ஒரு ஆள் போதும்”.. பேட்டிங், ஃபீல்டிங், சூப்பர் ஓவர்.. லக்னோவை கதறவிட்ட ரிங்கு சிங்

லக்னோ: 2026 ஐபிஎல் லீக் சுற்றில் லக்னோ சூப்பர் ஜெயன்ட்ஸ் அணியை சூப்பர் ஓவரில் வீழ்த்தி கொல்கத்தா நைட் ரைடர்ஸ் அணி அபார வெற்றி பெற்றது. இந்த வெற்றியின் பின்னணியில் ஒரு மாபெரும் சக்தியாக நின்று மிரட்டியவர் ரிங்கு சிங். பேட்டிங்கில் அதிரடி, ஃபீல்டிங்கில் மின்னல் வேகம், சூப்பர் ஓவரில் ஒற்றைப் பந்து என அனைத்துத் துறைகளிலும் ரிங்கு சிங் காட்டிய அதிரடி ஆட்டம், லக்னோ அணியை நிலைகுலையச் செய்துள்ளது. ஒரு வீரர் நினைத்தால் ஆட்டத்தின் போக்கையே எப்படி மாற்ற முடியும் என்பதற்கு இந்த போட்டி ஒரு சிறந்த உதாரணமாக அமைந்தது.

முதலில் பேட்டிங் செய்த கொல்கத்தா நைட் ரைடர்ஸ் அணி, ஆரம்பத்திலேயே விக்கெட்டுகளை பறிகொடுத்து 93 ரன்களுக்கு 7 விக்கெட் என படுமோசமான நிலையில் இருந்தது. அப்போது 6-வது வீரராகக் களமிறங்கிய ரிங்கு சிங், ஆடுகளத்தின் தன்மையை உணர்ந்து நிதானமாகவும், அதேசமயம் அதிரடியாகவும் விளையாடினார். 51 பந்துகளைச் சந்தித்த அவர் 83 ரன்களைக் குவித்து இடிபோல வெடித்தார். இவருடைய இந்த அசுரத்தனமான போராட்டத்தால் மட்டுமே கொல்கத்தா அணி 20 ஓவர்கள் முடிவில் 155 ரன்கள் என்ற கௌரவமான ஸ்கோரை எட்டியது.

அடுத்து 156 ரன்கள் என்ற இலக்குடன் லக்னோ அணி களமிறங்கியபோது, ரிங்கு சிங் ஃபீல்டிங்கில் தனது விஸ்வரூபத்தைக் காட்டினார். மைதானத்தின் நாலாபுறமும் ஓடிச் சென்று பந்துகளைத் தடுத்த அவர், மொத்தம் 4 கேட்சுகளைப் பிடித்து சாதனை படைத்தார். குறிப்பாக எல்லைக்கோட்டுக்கு மிக அருகே சிக்ஸருக்குச் சென்ற பந்துகளைத் தாவிச் சென்று அவர் பிடித்த விதம் மைதானத்தில் இருந்த அனைவரையும் மிரள வைத்தது. ஃபீல்டிங்கில் அவர் செய்த இந்த மேஜிக், லக்னோ அணியின் ரன் வேகத்தை வெகுவாகக் கட்டுப்படுத்தியது.

ஆட்டத்தின் இறுதியில் லக்னோ அணியும் 20 ஓவர்களில் 155 ரன்கள் எடுத்ததால் போட்டி சமனில் முடிந்து சூப்பர் ஓவருக்குச் சென்றது. சூப்பர் ஓவரில் முதலில் ஆடிய லக்னோ அணி சுனில் நரேனின் பந்துவீச்சை எதிர்கொள்ள முடியாமல் வெறும் 1 ரன் மட்டுமே எடுத்தது. 2 ரன்கள் எடுத்தால் வெற்றி என்ற மிக எளிய இலக்குடன் கொல்கத்தா தரப்பில் ரிங்கு சிங் களம் புகுந்தார். எந்தவித பதற்றமும் இன்றி தான் சந்தித்த முதல் பந்திலேயே பவுண்டரி அடித்து, எந்தவித நாடகத்திற்கும் இடமளிக்காமல் வெற்றியை உறுதி செய்தார்.

முதலில் பேட்டிங்கில் அணியைத் தூக்கி நிறுத்தியது, பின்னர் ஃபீல்டிங்கில் 4 கேட்சுகளைப் பிடித்து அசத்தியது மற்றும் சூப்பர் ஓவரில் வெற்றியைத் தேடித்தந்தது என ரிங்கு சிங்கின் ஆல்-ரவுண்ட் ஆட்டம் கொல்கத்தா அணியை வெற்றிப் பாதைக்கு அழைத்துச் சென்றது. இவரது இந்த அபாரமான பங்களிப்பைப் பாராட்டி ஆட்டநாயகன் விருதும் வழங்கப்பட்டது.