IPL 2026: ரிஷப் பண்ட்-க்கு கேப்டன் என்ற பொறுப்பு கொஞ்சமாவது இருக்கா? கையிஃப் சரமாரி கேள்வி

மும்பை: ஐபிஎல் 2026 சீசனில் ரிஷப் பன்ட் கேகேஆர் அணிக்கு எதிராக குறைந்த ரன்களில் ஆட்டமிழந்தது, குறித்து பல்வேறு விமர்சனங்களை எழுப்பியுள்ளது. முக்கிய பேட்ஸ்மேன்கள் ஃபார்மில் இல்லா நிலையிலும், இளம் வீரர்கள் அணியின் வெற்றியில் முக்கியப் பங்காற்றினர்.

சன்ரைசர்ஸுக்கு எதிராக அரை சதம் அடித்த பன்ட், கொல்கத்தா நைட் ரைடர்ஸ் உடனான ஆட்டத்தில் மீண்டும் ஒற்றை இலக்கத்தில் வெளியேறினார். 8 பந்துகளில் 10 ரன்கள் எடுத்திருந்த அவர், கேமரூன் கிரீன் வீசிய பவுன்சரை கையாள முடியாமல், டாப் எட்ஜ் ஆகி ஷார்ட் ஃபைன் லெக்கில் பிடிபட்டார்.

பன்ட் வெளியேறியபின் LSG 8.1 ஓவர்களில் 73/2 என இருந்தது, ஆனால் 128/7 என சரிந்தது. அறிமுக வீரர் முகுல் சௌத்ரி அதிரடியாக அரை சதம் அடித்து, LSG-ஐ ஐபிஎல் 2026ல் வெற்றி பெறச் செய்தார். அனுபவமுள்ள பன்ட் பொறுப்பேற்கத் தவறிவிட்டார் என முகமது கைஃப் விமர்சித்தார்.

“அணியின் வெற்றிக்கு பன்ட் கடைசி வரை களத்தில் நிற்க வேண்டியிருந்தது,” என்று முகமது கைஃப் ஸ்டார் ஸ்போர்ட்ஸில் கூறினார். 2016 முதல் ஐபிஎல்லில் ஆடும் அனுபவமிக்க வீரரான பன்ட், பேட்டிங் வந்தபோது நிலைமை கடினமாக இருக்கவில்லை. முதல் ஐந்து ஓவர்களிலேயே LSG 41 ரன்கள் எடுத்திருந்தது.

இது குறித்து பேசிய கைஃப் , "ஒரு பேட்ஸ்மேன் பொறுப்பேற்று இலக்கை துரத்த வேண்டும், அது பன்ட்டின் வேலை. கேப்டனாக பொறுப்பேற்கத் தவறினால், அணியை வெற்றி பெறச் செய்ய முடியாது." சன்ரைசர்ஸ் அணிக்கு எதிராக சிறப்பாக ஆடினாலும், தொடர்ச்சியான ஃபார்ம் அவசியம் என்றார்.

"ஒரு நல்ல ஆட்டம் மட்டும் போதாது. அடுத்த சில போட்டிகளில் சொதப்புவது தவறு. ஆட்ட சூழ்நிலையைப் புரிந்துகொண்டு, தனது ஆட்ட பாணியை எப்போது மாற்ற வேண்டும் என்பதை பன்ட் கற்றுக் கொள்ள வேண்டும். கடைசி வரை களத்தில் நிற்பதுதான் ஒரு கேப்டனின் பணி," என்று கைஃப் வலியுறுத்தினார்.

LSG-யின் இந்த இரண்டாவது வெற்றி டெல்லி கேபிடல்ஸ் தோல்விக்குப் பின் வந்தது. மிட்செல் மார்ஷ், ஐடன் மார்க்ரம் போன்ற நட்சத்திர வீரர்கள் ஃபார்மில் இல்லாத போதும், இளம் வீரர்கள் சிறப்பான பங்களிப்பால் அணி வெல்கிறது என்று சுனில் கவாஸ்கர் தெரிவித்தார்.

இதனை தொடர்ந்து பேசிய கவாஸ்கர் "LSG கடினமான சூழலிலும் இளைய வீரர்களின் உதவியுடன் வென்றது. மார்ஷ், மார்க்ரம், பன்ட், பூரன் தடுமாறினாலும், முக்கிய பேட்ஸ்மேன்கள் இல்லாமல் தற்காத்துக் கொண்டு வெற்றி பெற்றனர். கடந்த ஆண்டு முக்கிய வீரர்களை நம்பியிருந்த LSG, இந்த சீசனில் அவர்களை நம்பாமல் வெல்கிறது," என்றார்.

கடந்த சீசனில் LSG-ன் இரண்டாவது அதிக ரன் எடுத்த பூரன், 196.25 ஸ்ட்ரைக் ரேட்டில் 524 ரன்கள் குவித்திருந்தார். ஆனால் இந்தத் தொடரின் மூன்று இன்னிங்ஸ்களில் அவர் வெறும் 21 ரன்கள் மட்டுமே எடுத்துள்ளார். அவரது இப்போதைய ஃபார்ம் LSG அணிக்கு கவலையளிப்பதாக கவாஸ்கர் சுட்டிக்காட்டினார்.

கவாஸ்கர் கூறுகையில், "பூரனின் மோசமான ஃபார்ம் LSG அணிக்குக் கவலை தரும். கேகேஆர் அணிக்கு எதிராக அவர் நம்பிக்கையற்று காணப்பட்டார். அதிக ஃபயர்பவர் தேவைப்பட்டதால், அவரை மிடில் ஆர்டருக்கு மாற்றினர். ஆனால் அவர் வழி தவறியவர் போல் இருந்தார்."

"அவர் பந்துடன் தொடர்பு ஏற்படுத்தாமல், வெறித்தனமாக பேட்டை சுழற்றுகிறார். இது நாம் அறிந்த பூரன் அல்ல. பூரனின் நம்பிக்கையை மீட்டெடுக்க LSG ஒரு வழி காண வேண்டும்," என்று கவாஸ்கர் வலியுறுத்தினார்.