IPL Super Over: சூப்பர் ஓவர் கிடைத்தும் அவமானப்பட்ட லக்னோ.. 6 பந்து கூட ஆடாமல் KKR-இடம் தோல்வி

லக்னோ: 2026 ஐபிஎல் லீக் போட்டியில் கொல்கத்தா நைட் ரைடர்ஸ் மற்றும் லக்னோ சூப்பர் ஜெயன்ட்ஸ் அணிகள் மோதிய ஆட்டம் யாரும் எதிர்பார்க்காத வகையில் சமனில் முடிவடைந்து, சூப்பர் ஓவர் வரை சென்றது. ஆனால், அந்த சூப்பர் ஓவரில் லக்னோ அணி வெறும் 1 ரன் மட்டுமே எடுத்து படுதோல்வி அடைந்த சம்பவம் அந்த அணியின் ரசிகர்களை அதிர்ச்சியில் ஆழ்த்தியுள்ளது.

ஐபிஎல் 2026 தொடரின் 38-வது லீக் போட்டியில் லக்னோவின் ஏகானா மைதானத்தில் லக்னோ மற்றும் கொல்கத்தா அணிகள் மோதின. டாஸ் வென்ற லக்னோ அணி முதலில் பந்துவீச்சை தேர்வு செய்தது. அதன்படி களமிறங்கிய கொல்கத்தா அணிக்கு ஆரம்பத்தில் அடுத்தடுத்து விக்கெட்டுகள் சரிந்து பெரும் பின்னடைவை ஏற்படுத்தியது. இருப்பினும், மிடில் ஆர்டர் பேட்ஸ்மேன்கள் போராடி அணியை சரிவிலிருந்து மீட்டதால் அந்த அணி 20 ஓவர்கள் முடிவில் 7 விக்கெட் இழப்பிற்கு 155 ரன்கள் என்ற கௌரவமான ஸ்கோரை எட்டியது.

இதையடுத்து 156 ரன்கள் எடுத்தால் வெற்றி என்ற இலக்குடன் லக்னோ அணி களம் புகுந்தது. பேட்டிங் செய்ய மிகவும் கடினமாக இருந்த இந்த ஆடுகளத்தில் லக்னோ அணி பேட்ஸ்மேன்கள் ரன் குவிக்க கடுமையாக திணறினர். கொல்கத்தா அணியின் துல்லியமான பந்துவீச்சை எதிர்கொள்ள முடியாமல் அவர்கள் திணறினாலும், கடைசி ஓவர் வரை போராடினார்கள். இறுதி பந்து வரை அனல் பறந்த இந்த ஆட்டத்தில் லக்னோ அணியும் 20 ஓவர்கள் முடிவில் 8 விக்கெட் இழப்பிற்கு சரியாக 155 ரன்கள் மட்டுமே எடுத்தது. இரு அணிகளின் ஸ்கோரும் சமமாக இருந்ததால் போட்டி சமனில் முடிந்தது.

இதையடுத்து வெற்றியாளரை தீர்மானிக்க விறுவிறுப்பான சூப்பர் ஓவர் நடத்தப்பட்டது. இதில் முதலில் பேட்டிங் செய்யும் வாய்ப்பு லக்னோ அணிக்கு கிடைத்தது. அந்த அணிக்காக அதிரடி வீரர்கள் நிக்கோலஸ் பூரன் மற்றும் கேப்டன் ரிஷப் பண்ட் ஆகியோர் களமிறங்கினர். கொல்கத்தா அணி சார்பில் அனுபவ சுழற்பந்து வீச்சாளர் சுனில் நரைன் பந்துவீசினார்.

அவர் வீசிய முதல் பந்திலேயே நிக்கோலஸ் பூரன் கிளீன் போல்டு ஆகி பெவிலியன் திரும்பினார். 2-வது பந்தில் ரிஷப் பண்ட் 1 ரன் மட்டுமே எடுத்தார். அடுத்து 3-வது பந்தை எதிர்கொண்ட எய்டன் மார்க்ரம், தூக்கி அடித்து கேட்ச் கொடுத்து ஆட்டமிழந்தார். சூப்பர் ஓவர் விதிமுறைப்படி 2 விக்கெட்டுகள் விழுந்ததால் லக்னோவின் இன்னிங்ஸ் அங்கேயே முடிவுக்கு வந்தது. இதனால் லக்னோ அணி வெறும் 1 ரன் மட்டுமே எடுத்து மோசமான நிலையை எட்டியது.

பின்னர் 2 ரன்கள் எடுத்தால் வெற்றி என்ற மிக மிக எளிய இலக்குடன் கொல்கத்தா அணியின் அதிரடி மன்னன் ரிங்கு சிங் களமிறங்கினார். அவர் தான் எதிர்கொண்ட முதல் பந்திலேயே கம்பீரமாக பவுண்டரி விளாசி கொல்கத்தா அணிக்கு அசத்தல் வெற்றியை தேடித்தந்தார். இந்த திரில் ஆட்டத்தில் சூப்பர் ஓவர் மூலம் கொல்கத்தா அணி அபார வெற்றி பெற்று புள்ளிப்பட்டியலில் முன்னேறியது.