IPL 2026: 50வது போட்டியில் ஹெட்க்கு சிராஜ் செய்த சம்பவம்.. குஜராத்திடம் சறுக்குமா சன்ரைசர்ஸ்?

மும்பை: ஐபிஎல் 2026 மோதலில் சன்ரைசர்ஸ் ஹைதராபாத் அணிக்கு எதிராக குஜராத் டைட்டன்ஸ் அணி 20 ஓவர்களில் 5 விக்கெட் இழப்புக்கு 168 ரன்கள் குவித்தது. அதிரடியாக விளையாடிய சாய் சுதர்சன் மற்றும் வாஷிங்டன் சுந்தர் ஆகியோரின் அரைசதங்கள் அணியின் ரன் குவிப்புக்கு வலு சேர்த்தன. இந்தப் போட்டியில், ஹைதராபாத் அணியின் பந்துவீச்சாளர்கள் சிறப்பாக செயல்பட்டு குஜராத் அணியை கட்டுப்படுத்த முயன்றனர்.

முதலில் பேட்டிங் செய்த குஜராத் அணிக்காக, சாய் சுதர்சன் 44 பந்துகளில் 5 பவுண்டரிகள் மற்றும் 2 சிக்ஸர்களுடன் 61 ரன்கள் விளாசினார். வாஷிங்டன் சுந்தர் 33 பந்துகளில் 50 ரன்கள் குவித்து, அணியின் ஸ்கோரை உயர்த்தினார். சிந்து 22 ரன்கள் எடுத்து தனது பங்களிப்பை அளித்தார். சன்ரைசர்ஸ் ஹைதராபாத் பந்துவீச்சில், கேப்டன் பாட் கம்மின்ஸ் 20 ரன்களை விட்டுக்கொடுத்து ஒரு விக்கெட்டையும், பிரஃபுல் ஹிங்கே 17 ரன்களுக்கு 2 விக்கெட்டுகளையும், சாகிப் ஹுசைன் 37 ரன்களுக்கு 2 விக்கெட்டுகளையும் கைப்பற்றினர்.

169 ரன்கள் என்ற இலக்கை நோக்கி களமிறங்கிய சன்ரைசர்ஸ் ஹைதராபாத் அணிக்கு துவக்கம் பெரும் பின்னடைவாக அமைந்தது. குஜராத் டைட்டன்ஸ் பந்துவீச்சாளர்கள் மிகச்சிறந்த கனவுத் துவக்கத்தை அளித்தனர். முதல் இரண்டு ஓவர்களுக்குள்ளாகவே சன்ரைசர்ஸ் அணியின் இரண்டு துவக்க வீரர்களும் அடுத்தடுத்து வெளியேறியது ரசிகர்களுக்கு அதிர்ச்சியளித்தது.

குஜராத் டைட்டன்ஸின் வேகப்பந்துவீச்சாளர் முகமது சிராஜ், தனது 50வது ஐபிஎல் போட்டியில் விளையாடிய ட்ராவிஸ் ஹெட்டை டக் அவுட் ஆக்கி முதல் விக்கெட்டை வீழ்த்தினார். சிராஜின் துல்லியமான பந்துவீச்சால் குழப்பமடைந்த ஹெட், 4 பந்துகளில் ரன் ஏதும் எடுக்காமல், நிஷாந்த் சிந்துவிடம் கேட்ச் கொடுத்து வெளியேறினார். இது சன்ரைசர்ஸ் அணியை 0/1 என்ற நிலைக்குத் தள்ளியது.

ட்ரெவிஸ் ஹெட் விக்கெட்டை வீழ்த்துவதற்கு முன்னரும் சிராஜ் மிகவும் துல்லியமாக பந்துவீசினார். அவரது பந்துகள் பலமுறை பேட்டின் எட்ஜையும் கடந்து சென்றதுடன், ஸ்டம்புகளுக்கு அருகிலும் ஆபத்தான முறையில் சென்றன. தனது ஓவரை ஒரு விக்கெட் மெய்டனாக வீசி, சிராஜ் போட்டியில் தனது ஆதிக்கத்தை நிலைநாட்டினார்.

அவரைத் தொடர்ந்து பந்துவீசிய ககிசோ ரபாடா, அபிஷேக் ஷர்மாவிடம் ஒரு சிக்ஸர் கொடுத்தாலும், உடனடியாக அற்புதமான கம்பேக் செய்தார். புத்திசாலித்தனமான பந்துவீச்சின் மூலம் அபிஷேக் சர்மாவை வீழ்த்தி, சன்ரைசர்ஸ் அணியின் இரண்டாவது விக்கெட்டை வீழ்த்தினார். இதன் மூலம் ஹைதராபாத் அணி 1.4 ஓவர்களில் 6 ரன்களுக்கு 2 விக்கெட்டுகளை இழந்து திணறியது.