அம்பயருடன் மோதல்.. கெட்ட வார்த்தையில் திட்டிய நிதிஷ்-ற்கு தண்டனை.. சிஎஸ்கே கேப்டனுக்கு அபராதம்

சென்னை: டெல்லி கேபிடல்ஸ் அணிக்கு எதிரான ஐபிஎல் போட்டி முடிவடைந்த நிலையில், விதிமுறைகளை மீறியதற்காக டெல்லி வீரர் நிதிஷ் ராணா மற்றும் சிஎஸ்கே அணி கேப்டன் ருதுராஜ் கெய்க்வாட் ஆகியோருக்கு ஐபிஎல் நிர்வாகம் அபராதம் விதித்துள்ளது. சென்னை சேப்பாக்கம் மைதானத்தில் நேற்று நடந்த லீக் ஆட்டத்தில் சென்னை சூப்பர் கிங்ஸ் அணி 23 ரன்கள் வித்தியாசத்தில் டெல்லி கேபிடல்ஸ் அணியை வீழ்த்தி இந்த சீசனின் முதல் வெற்றியைப் பதிவு செய்தது. இந்தப் போட்டியின் போது நடந்த சில விரும்பத்தகாத சம்பவங்களுக்காக தற்போது ஒழுங்கு நடவடிக்கை எடுக்கப்பட்டுள்ளது.

டெல்லி கேபிடல்ஸ் அணியின் பேட்டிங் வரிசையில் இடம்பெற்றுள்ள நிதிஷ் ராணாவிற்கு அவரது போட்டி ஊதியத்தில் இருந்து 25 சதவீதம் அபராதம் விதிக்கப்பட்டுள்ளது. ஆட்டத்தின் 19-வது ஓவரின் போது டெல்லி வீரர் டிரிஸ்டன் ஸ்டப்ஸ் தனது கையுறைகளை மாற்ற அனுமதி கோரினார். சென்னையில் நிலவிய அதிகப்படியான வெப்பம் மற்றும் வியர்வை காரணமாக அவர் இந்த கோரிக்கையை விடுத்தார். ஆனால் 4-வது அம்பயர் அதற்கு அனுமதி மறுத்தார்.

இதனால் ஆத்திரமடைந்த நிதிஷ் ராணா, அம்பயர்களுடன் கடும் வாக்குவாதத்தில் ஈடுபட்டதோடு, ஆபாசமான வார்த்தைகளையும் பயன்படுத்தியதாகக் கூறப்படுகிறது. இது ஐபிஎல் நடத்தை விதிகளின் படி நிலை 1 குற்றமாகும். இதற்காக அவருக்கு அபராதம் விதிக்கப்பட்டதோடு, ஒரு குறைபாட்டுப் புள்ளியும் (Demerit point) வழங்கப்பட்டுள்ளது. நிதிஷ் ராணா தனது தவற்றை ஒப்புக்கொண்டதால், போட்டி அம்பயர் இந்தத் தண்டனையை உறுதி செய்துள்ளார்.

ருதுராஜ் கெய்க்வாட்டிற்கு அபராதம்

மறுபுறம், சென்னை சூப்பர் கிங்ஸ் அணி கேப்டன் ருதுராஜ் கெய்க்வாட்டிற்கு 12 லட்சம் ரூபாய் அபராதம் விதிக்கப்பட்டுள்ளது. சிஎஸ்கே அணி பந்துவீச நிர்ணயிக்கப்பட்ட நேரத்தை விட கூடுதல் நேரம் எடுத்துக்கொண்டதே இதற்கு காரணமாகும். நடப்பு சீசனில் சிஎஸ்கே அணி செய்யும் முதல் தவறு என்பதால், ஐபிஎல் விதிகளின் படி கேப்டனுக்கு மட்டும் 12 லட்சம் ரூபாய் அபராதம் விதிக்கப்பட்டுள்ளது.

இந்தப் போட்டியில் முதலில் பேட்டிங் செய்த சிஎஸ்கே அணி சஞ்சு சாம்சனின் அபார சதத்தால் 212 ரன்கள் குவித்தது. கடின இலக்கைத் துரத்திய டெல்லி அணியால் 20 ஓவர்களில் 189 ரன்கள் மட்டுமே எடுக்க முடிந்தது. டெல்லி வீரர் ஸ்டப்ஸ் 60 ரன்கள் எடுத்து ஆட்டமிழந்தார். வெற்றியின் மகிழ்ச்சியில் இருந்த சிஎஸ்கே அணிக்கும், தோல்வியின் வருத்தத்தில் இருந்த டெல்லி அணிக்கும் இந்த அபராதச் செய்தி பெரும் அதிர்ச்சியை ஏற்படுத்தியுள்ளது. சிஎஸ்கே அணி தனது அடுத்த லீக் போட்டியில் வரும் செவ்வாய்க்கிழமை கொல்கத்தா நைட் ரைடர்ஸ் அணியை எதிர்கொள்ள உள்ளது.