IPL 2026: ஊதா தொப்பி ரேஸில் சிஎஸ்கே வீரர்.. ஆரஞ்சு தொப்பியை தட்டிப்பறித்த விராட் கோலி

பெங்களூரு: 2026 ஐபிஎல் கிரிக்கெட் தொடரில் பெங்களூரு மற்றும் லக்னோ அணிகள் மோதிய 23-வது லீக் போட்டிக்குப் பிறகு, ஆரஞ்சு மற்றும் ஊதா நிற தொப்பிகளுக்கான ரேஸில் மிகப்பெரிய மாற்றங்கள் ஏற்பட்டுள்ளன. குறிப்பாக ராயல் சேலஞ்சர்ஸ் பெங்களூரு அணியின் நட்சத்திர வீரர் விராட் கோலி மீண்டும் தனது ஆதிக்கத்தைச் செலுத்தி முதலிடத்தைப் பிடித்துள்ளார்.

பெங்களூரு சின்னசாமி மைதானத்தில் நடைபெற்ற லக்னோ அணிக்கு எதிரான போட்டியில் 34 பந்துகளில் 49 ரன்கள் குவித்த விராட் கோலி, நடப்புத் தொடரில் மொத்தம் 228 ரன்களுடன் ஆரஞ்சு தொப்பியைத் தன்வசமாக்கியுள்ளார். அவருக்கு அடுத்தபடியாக ஹைதராபாத் அணியின் ஹென்ரிச் கிளாசன் 224 ரன்களுடன் 2-வது இடத்தில் உள்ளார். நேற்றைய போட்டியில் அதிரடி காட்டிய பெங்களூரு கேப்டன் ரஜத் படிதார் 222 ரன்களுடன் 3-வது இடத்திற்கு முன்னேறியுள்ளார். இவர்களைத் தவிர ஹைதராபாத் அணியின் இஷான் கிஷன் 213 ரன்களுடனும், ராஜஸ்தான் அணியின் வைபவ் சூர்யவன்ஷி 200 ரன்களுடனும் அடுத்தடுத்த இடங்களில் உள்ளனர்.

சிஎஸ்கே வீரர் சஞ்சு சாம்சன்

சென்னை சூப்பர் கிங்ஸ் அணியைப் பொறுத்தவரை, அந்த அணியின் விக்கெட் கீப்பர் மற்றும் நட்சத்திர பேட்டர் சஞ்சு சாம்சன் 185 ரன்களுடன் இந்தப் பட்டியலில் 6-வது இடத்தில் நீடிக்கிறார். சிஎஸ்கே அணியின் பேட்டிங் முதுகெலும்பாகத் திகழும் சாம்சன், வரும் போட்டிகளில் தனது ரன் எண்ணிக்கையை உயர்த்தி முதல் 5 இடங்களுக்குள் வர வாய்ப்புள்ளது. இதுவரை அவர் விளையாடிய 5 போட்டிகளில் ஒரு சதம் உட்பட சிறப்பான ஆட்டத்தை வெளிப்படுத்தியுள்ளார் என்பது குறிப்பிடத்தக்கது.

ஆரஞ்சு தொப்பி (அதிக ரன்கள்):

விராட் கோலி (பெங்களூரு) - 228 ரன்கள்
ஹென்ரிச் கிளாசன் (ஹைதராபாத்) - 224 ரன்கள்
ரஜத் படிதார் (பெங்களூரு) - 222 ரன்கள்
இஷான் கிஷன் (ஹைதராபாத்) - 213 ரன்கள்
வைபவ் சூர்யவன்ஷி (ராஜஸ்தான்) - 200 ரன்கள்
சஞ்சு சாம்சன் (சென்னை) - 185 ரன்கள்

ஊதா நிற தொப்பி ரேஸ்

அதிக விக்கெட்டுகளை வீழ்த்திய பந்துவீச்சாளர்களுக்கான ஊதா நிற தொப்பி ரேஸில் குஜராத் டைட்டன்ஸ் அணியின் பிரசித் கிருஷ்ணா 10 விக்கெட்டுகளுடன் முதலிடத்தில் நீடிக்கிறார். அவருக்குக் கடும் போட்டி அளிக்கும் வகையில் சென்னை சூப்பர் கிங்ஸ் அணியின் இளம் வேகப்பந்து வீச்சாளர் அன்ஷுல் கம்போஜ் 10 விக்கெட்டுகளுடன் 2-வது இடத்தில் உள்ளார். எகானமி அடிப்படையில் பிரசித் கிருஷ்ணா முன்னிலையில் இருக்கிறார். லக்னோ அணியின் பிரின்ஸ் யாதவ் பெங்களூருக்கு எதிராக 3 விக்கெட்டுகளை வீழ்த்தியதன் மூலம் மொத்தம் 9 விக்கெட்டுகளுடன் 3-வது இடத்தைப் பிடித்துள்ளார்.

பெங்களூரு அணி தரப்பில் புவனேஷ்வர் குமார் 7 விக்கெட்டுகளுடன் 6-வது இடத்திலும், க்ருணால் பாண்டியா 7 விக்கெட்டுகளுடன் 7-வது இடத்திலும் உள்ளனர். நேற்று லக்னோ அணிக்கு எதிராக 4 விக்கெட்டுகளை அள்ளிய இளம் வீரர் ரசிக் சலாம் தார் 5 விக்கெட்டுகளுடன் 10-வது இடத்தைப் பிடித்துள்ளார். ஐபிஎல் தொடரின் முதல் பாதி விறுவிறுப்பாக நடைபெற்று வரும் நிலையில், ஒவ்வொரு போட்டிக்கும் ஆரஞ்சு மற்றும் ஊதா நிற தொப்பிகள் கைமாறுவது ரசிகர்களிடையே பெரும் எதிர்பார்ப்பை ஏற்படுத்தியுள்ளது.

ஊதா தொப்பி (அதிக விக்கெட்கள்):

பிரசித் கிருஷ்ணா (குஜராத்) - 10 விக்கெட்டுகள்
அன்ஷுல் கம்போஜ் (சென்னை) - 10 விக்கெட்டுகள்
பிரின்ஸ் யாதவ் (லக்னோ) - 9 விக்கெட்டுகள்
ரவி பிஷ்னோய் (ராஜஸ்தான்) - 9 விக்கெட்டுகள்
ஜோப்ரா ஆர்ச்சர் (ராஜஸ்தான்) - 7 விக்கெட்டுகள்
புவனேஷ்வர் குமார் (பெங்களூரு) - 7 விக்கெட்டுகள்