IPL 2026: அர்ஷ்தீப் செய்த செயல்.. கடைசி ஓவரில் தறிகெட்ட பவுலிங்.. ஐபிஎல் வரலாற்றில் மோசமான சாதனை

முல்லன்பூர்: 2026 ஐபிஎல் தொடரில் பஞ்சாப் கிங்ஸ் மற்றும் குஜராத் டைட்டன்ஸ் அணிகள் மோதிய போட்டியில், பஞ்சாப் அணியின் வேகப்பந்து வீச்சாளர் அர்ஷ்தீப் சிங் ஒரு மோசமான சாதனையைப் படைத்துள்ளார். குஜராத் அணிக்கு எதிரான ஆட்டத்தில் அவர் வீசிய கடைசி ஓவர், ஐபிஎல் வரலாற்றிலேயே மிக நீண்ட ஓவர்களில் ஒன்றாக மாறியுள்ளது.

முல்லன்பூரில் நடைபெற்ற இந்தப் போட்டியின் கடைசி ஓவரை அர்ஷ்தீப் சிங் வீசினார். குஜராத் அணியின் இன்னிங்ஸை முடித்து வைக்க வேண்டிய 20-வது ஓவரை வீச வந்த அவர், தனது கட்டுப்பாட்டை இழந்து பந்துவீசினார். அந்த ஒரு ஓவரை முடிப்பதற்கு அவர் மொத்தம் 11 பந்துகளை வீச வேண்டியிருந்தது. அந்த ஓவரில் மட்டும் 4 வைட் பந்துகள் மற்றும் 1 நோ பால் வீசி பஞ்சாப் அணிக்கு நெருக்கடியை ஏற்படுத்தினார்.

இந்த ஒரு ஓவரில் மட்டும் குஜராத் அணிக்கு 12 ரன்கள் கிடைத்தன. மேலும், 6 பந்துகள் கொண்ட ஒரு ஓவர், அர்ஷ்தீப் சிங் செய்த தவறுகளால் 11 பந்துகளாக நீண்டது. இதன் மூலம் ஐபிஎல் வரலாற்றில் மிக நீண்ட ஓவரை வீசிய பந்துவீச்சாளர்களின் பட்டியலில் அர்ஷ்தீப் சிங் இணைந்துள்ளார். இதற்கு முன்பு 2025-ல் ஹர்திக் பாண்டியா, ஷர்துல் தாகூர் மற்றும் சந்தீப் சர்மா ஆகியோரும் இதேபோல் 11 பந்துகளை வீசி ஒரு ஓவரை முடித்துள்ளனர்.

அதேபோல் 2023-ல் துஷார் தேஷ்பாண்டே மற்றும் முகமது சிராஜ் ஆகியோரும் இந்த மோசமான சாதனையைப் படைத்துள்ளனர். தற்போது அர்ஷ்தீப் சிங் அந்த மோசமான சாதனைப் பட்டியலில் இணைந்துள்ளார். இந்தப் போட்டியில் அர்ஷ்தீப் சிங் மொத்தம் 4 ஓவர்கள் வீசி 42 ரன்களை வாரி வழங்கினார். ஒரு விக்கெட்டை கூட அவரால் எடுக்க முடியவில்லை. அவரது எகானமி 10.50 ஆக இருந்தது.

மற்ற பஞ்சாப் கிங்ஸ் பந்துவீச்சாளர்களான விஜய்குமார் வைஷாக் 3 விக்கெட்டுகளையும், யுஸ்வேந்திர சாஹல் 2 விக்கெட்டுகளையும் வீழ்த்தி குஜராத் அணியைக் கட்டுப்படுத்தினர். குஜராத் அணி 20 ஓவர்கள் முடிவில் 6 விக்கெட் இழப்புக்கு 162 ரன்கள் எடுத்தது.

IPL 2026: "என் பக்கத்துல கூட யாரும் வர முடியாது" .. புள்ளிவிவரங்களை காட்டி எகிறிய முகமது ஷமி

இந்திய அணியின் முன்னணி வேகப்பந்து வீச்சாளரான அர்ஷ்தீப் சிங், ஐபிஎல் போன்ற பெரிய தொடரில் கடைசி ஓவரில் இத்தனை கூடுதல் பந்துகளை வீசியது பஞ்சாப் ரசிகர்களிடையே அதிருப்தியை ஏற்படுத்தியுள்ளது. ராகுல் திவேதியா மற்றும் ரஷித் கான் போன்ற அதிரடி வீரர்கள் களத்தில் இருந்த போது, அர்ஷ்தீப் சிங் கட்டுப்பாடின்றி பந்துவீசியது பஞ்சாப் அணிக்குக் கூடுதல் சுமையை ஏற்படுத்தியது. ஒருவேளை இந்த 11 பந்துகளையும் குஜராத் வீரர்கள் சரியாகப் பயன்படுத்தியிருந்தால் ஸ்கோர் இன்னும் உயர்ந்திருக்கும் என்பது குறிப்பிடத்தக்கது.