IPL 2026: பிளே ஆப் சுற்றுக்கு எந்த 4 அணிகள் செல்லும்.. தமிழக வீரர் அஸ்வின் கணிப்பு

சென்னை: IPL 2026 பிளேஆஃப் சுற்றுக்குச் செல்லும் டாப் நான்கு அணிகள் குறித்த கணிப்பை முன்னாள் இந்திய ஆல்-ரவுண்டரான ரவிச்சந்திரன் அஸ்வின், தனது யூடியூப் சேனலில் வெளியிட்டார். மும்பை இந்தியன்ஸ் (MI), பஞ்சாப் கிங்ஸ் (PBKS), ராயல் சேலஞ்சர்ஸ் பெங்களூரு (RCB) ஆகிய மூன்று அணிகளும் நிச்சயம் நாக்-அவுட் சுற்றுக்குள் நுழையும் என்றார்.

எனினும், நட்சத்திர வேகப்பந்து வீச்சாளர் ஜோஷ் ஹேசில்வுட் கணிசமான காலம் விளையாட முடியாமல் போனால், RCB-யின் பிளேஆஃப் வாய்ப்புகள் குறையலாம் என்றும் அஸ்வின் எச்சரித்தார். அவர் அணியில் இருப்பது முக்கியமான பலம் என தெரிவித்தார்.

கடந்த சீசனில் இந்த மூன்று அணிகளும் பிளேஆஃப் சுற்றுக்கு முன்னேறின. RCB தனது முதல் IPL பட்டத்தை வென்றது. லீக் சுற்றில் பஞ்சாப் கிங்ஸ் முதலிடம் பிடித்தும் இறுதிப் போட்டியில் RCB-யிடம் தோற்றது. மும்பை இந்தியன்ஸ் தகுதிச்சுற்று 2-ல் பஞ்சாப் கிங்ஸிடம் தோற்று வெளியேறியது.

நான்காவது பிளேஆஃப் இடத்திற்காக ஐந்து அணிகள் கடுமையாகப் போட்டியிடும் என்றார் அஸ்வின். 2024 ஐபிஎல் ரன்னர்-அப் சன்ரைசர்ஸ் ஹைதராபாத் (SRH), டெல்லி கேபிடல்ஸ் (DC), குஜராத் டைட்டன்ஸ் (GT), ராஜஸ்தான் ராயல்ஸ் (RR), சென்னை சூப்பர் கிங்ஸ் (CSK) ஆகியோர் இப்பட்டியலில் உள்ளனர்.

கடந்த சீசனில் குஜராத் டைட்டன்ஸ் பிளேஆஃப் போனது; டெல்லி கேபிடல்ஸ் ஐந்தாவது இடம் பிடித்து மயிரிழையில் வாய்ப்பை இழந்தது. சென்னை சூப்பர் கிங்ஸ் மற்றும் ராஜஸ்தான் ராயல்ஸ் அணிகள் மோசமான IPL 2025 சீசன்களுக்குப் பிறகு புள்ளிப்பட்டியலில் கடைசி இரண்டு இடங்களிலேயே முடித்தன.

முன்னாள் சாம்பியன்களான கொல்கத்தா நைட் ரைடர்ஸ் (KKR) மற்றும் லக்னோ சூப்பர் ஜெயன்ட்ஸ் (LSG) ஆகிய அணிகளை IPL 2026 பிளேஆஃப் சுற்றுக்கான போட்டியாளர்களாக அஸ்வின் தனது கணிப்பில் குறிப்பிடவில்லை.

சன்ரைசர்ஸ் ஹைதராபாத் மற்றும் டெல்லி கேபிடல்ஸ் அணிகளின் செயல்பாடு IPL 2026 புள்ளிப்பட்டியலின் இறுதி வடிவத்தை நிர்ணயிக்கும் என ரவிச்சந்திரன் அஸ்வின் குறிப்பிட்டுள்ளார். கடந்த சீசனில் இரு அணிகளும் வெவ்வேறு கட்டங்களில் ஆதிக்கம் செலுத்தியும் பிளேஆஃப் தகுதியைப் பெறவில்லை. புள்ளிப்பட்டியலில் DC ஐந்தாவது, SRH ஆறாவது இடத்தைப் பிடித்தன.

"SRH மற்றும் DC ஆகியவை இந்த அட்டவணை எப்படி இருக்கும் என்பதைத் தீர்மானிக்கும். இந்த இரு அணிகளுக்கும் முதல் மூன்று அணிகளுக்கு அழுத்தம் கொடுக்கும் அல்லது கடைசி இடங்களில் முடிக்கும் திறன் உள்ளது," என அஸ்வின் தனது யூடியூப் வீடியோவில் தெரிவித்தார்.IPL 2026 தொடரின் முதல் போட்டியில், 'ஆரஞ்சு ஆர்மி' என அழைக்கப்படும் சன்ரைசர்ஸ் ஹைதராபாத் அணி, நடப்பு சாம்பியனான RCB-யை மார்ச் 28 அன்று பெங்களூருவில் எதிர்கொள்கிறது.