IPL 2026: 6 மேட்ச் தோற்ற கொல்கத்தா அணியால் பிளே ஆப் போக முடியும்.. இதுதான் புள்ளிப்பட்டியல் கணக்கு!

கொல்கத்தா: குஜராத் டைட்டன்ஸ் அணிக்கு எதிரான முக்கியமான லீக் ஆட்டத்தில் 29 ரன்கள் வித்தியாசத்தில் அபார வெற்றி பெற்ற கொல்கத்தா நைட் ரைடர்ஸ் அணி, 2026 ஐபிஎல் தொடரின் பிளே-ஆப் ரேசில் இன்னும் உயிர்ப்புடன் உள்ளது. ஈடன் கார்டனில் கிடைத்த இந்த வெற்றி அந்த அணியின் ரசிகர்களுக்கு நம்பிக்கையை அளித்துள்ள போதிலும், பிளே-ஆப் சுற்றுக்குத் தகுதி பெற கொல்கத்தா நைட் ரைடர்ஸ் அணி இன்னும் சில கடினமான கணக்குகளைக் கடக்க வேண்டியுள்ளது.

தற்போதுள்ள புள்ளிப்பட்டியலின்படி, 12 போட்டிகளில் விளையாடியுள்ள கொல்கத்தா அணி 5 வெற்றி, 6 தோல்வி மற்றும் மழை காரணமாக ஒரு போட்டி கைவிடப்பட்டதால் 11 புள்ளிகளுடன் 7-வது இடத்தில் உள்ளது. அட்டவணையின் கீழ் பாதியில் இருந்தாலும், அஜின்கியா ரஹானே தலைமையிலான கொல்கத்தா அணிக்கு இன்னும் வாய்ப்பு பிரகாசமாகவே உள்ளது.

கொல்கத்தா அணி பிளே-ஆப் சுற்றுக்கு முன்னேற வேண்டுமானால், தங்களுக்கு மீதமுள்ள 2 லீக் போட்டிகளிலும் மிகப்பெரிய ரன் வித்தியாசத்தில் வெற்றி பெற வேண்டும். அப்படி வெற்றி பெற்றால் அந்த அணி 15 புள்ளிகளை எட்டும். அதே நேரத்தில், முதல் 3 இடங்களைப் பிடிக்கும் அணிகளைத் தவிர, வேறு எந்த அணியும் 15 அல்லது அதற்கு மேற்பட்ட புள்ளிகளைப் பெறாமல் இருக்க வேண்டும். ஒருவேளை மீதமுள்ள 2 போட்டிகளில் ஒன்றில் தோற்றால் கூட கொல்கத்தா அணி பிளே-ஆப் ரேசில் இருந்து அதிகாரப்பூர்வமாக வெளியேறிவிடும்.

கொல்கத்தா அணி தனது அடுத்த போட்டியில் 5 முறை சாம்பியனான மும்பை இந்தியன்ஸை வரும் மே 20-ம் தேதியும், கடைசி லீக் ஆட்டத்தில் டெல்லி கேப்பிடல்ஸை மே 24-ம் தேதியும் எதிர்கொள்கிறது. இந்த இரண்டு போட்டிகளுமே கொல்கத்தாவின் சொந்த மைதானமான ஈடன் கார்டனில் நடைபெறுவது அந்த அணிக்கு ஒரு கூடுதல் பலமாகும்.

குஜராத்தின் நிலை என்ன?

மறுபுறம், கொல்கத்தாவிடம் தோற்ற போதிலும் குஜராத் டைட்டன்ஸ் அணி 13 போட்டிகளில் 16 புள்ளிகளுடன் 2-வது இடத்தில் வலுவாக உள்ளது. அவர்கள் பிளே-ஆப் சுற்றுக்கு முன்னேறுவது கிட்டத்தட்ட உறுதியாகிவிட்டது. இருப்பினும், வரும் மே 21-ம் தேதி அகமதாபாத்தில் நடைபெறும் சென்னை சூப்பர் கிங்ஸ் அணிக்கு எதிரான கடைசி லீக் ஆட்டத்தில் குஜராத் வெற்றி பெற்றால், எந்தவித சிக்கலும் இன்றி பிளே-ஆப் இடத்தைப் பிடித்துவிடும். ஒருவேளை தோற்றால், ரன் ரேட் மற்றும் ஹைதராபாத், பஞ்சாப், ராஜஸ்தான் அணிகளின் வெற்றி தோல்விகளைச் சார்ந்து இருக்க வேண்டியிருக்கும்.

தற்போதைய நிலவரப்படி ஆர்சிபி (16 புள்ளிகள்), குஜராத் (16 புள்ளிகள்), ஹைதராபாத் (14 புள்ளிகள்), பஞ்சாப் (13 புள்ளிகள்) ஆகிய அணிகள் முதல் 4 இடங்களில் உள்ளன. இவர்களைப் பின்னுக்குத் தள்ளி கொல்கத்தா உள்ளே நுழையுமா என்பது மே 24-ம் தேதி தான் தெரியவரும்.

வைபவ் சூர்யவன்ஷியை இந்திய சீனியர் அணியில் சேர்க்க மறுத்த பிசிசிஐ தேர்வுக் குழு.. காரணம் இதுதான்

2026 ஐபிஎல் புள்ளிப்பட்டியல் (மே 16 நிலவரப்படி):

ஆர்சிபி - 12 போட்டிகள் - 16 புள்ளிகள்
குஜராத் - 13 போட்டிகள் - 16 புள்ளிகள்
ஹைதராபாத் - 12 போட்டிகள் - 14 புள்ளிகள்
பஞ்சாப் - 12 போட்டிகள் - 13 புள்ளிகள்
ராஜஸ்தான் - 11 போட்டிகள் - 12 புள்ளிகள்
சிஎஸ்கே - 12 போட்டிகள் - 12 புள்ளிகள்
கொல்கத்தா - 12 போட்டிகள் - 11 புள்ளிகள்
டெல்லி - 12 போட்டிகள் - 10 புள்ளிகள்
மும்பை - 12 போட்டிகள் - 8 புள்ளிகள்
லக்னோ - 12 போட்டிகள் - 6 புள்ளிகள்