IPL 2026: மிட்செல் ஸ்டார்க்கை மிரள வைத்த பிரியான்ஷ் ஆர்யா.. ஐபிஎல் வரலாற்றில் புதிய உலக சாதனை

தரம்சாலா: டெல்லி கேப்பிடல்ஸ் அணிக்கு எதிரான ஐபிஎல் லீக் போட்டியில், பஞ்சாப் கிங்ஸ் அணியின் இளம் தொடக்க வீரர் பிரியான்ஷ் ஆர்யா முதல் பந்திலேயே சிக்ஸர் அடித்து ஒரு மாபெரும் வரலாற்றுச் சாதனையை படைத்துள்ளார். ஐபிஎல் வரலாற்றில் 18 ஆண்டுகளாக யாருமே செய்யாத சாதனையை இந்த 23 வயது இளம் வீரர் செய்து இருக்கிறார். உலகின் முன்னணி வேகப் பந்துவீச்சாளரான மிட்செல் ஸ்டார்க்கின் பந்துவீச்சை சிதறடித்து இந்த சாதனையை செய்துள்ளார். இந்தப் போட்டியில் என்ன நடந்தது என்று பார்க்கலாம்.

தரம்சாலாவில் உள்ள இமாச்சலப் பிரதேச கிரிக்கெட் சங்க மைதானத்தில் பஞ்சாப் மற்றும் டெல்லி அணிகள் மோதின. டாஸ் வென்று முதலில் பந்துவீச்சை தேர்வு செய்த டெல்லி கேப்டன் அக்சர் படேல், ஆட்டத்தின் முதல் ஓவரை வீச ஆஸ்திரேலியாவின் நட்சத்திர வேகப்பந்து வீச்சாளர் மிட்செல் ஸ்டார்க்கிடம் பந்தை ஒப்படைத்தார். ஆனால், ஸ்டார்க் வீசிய இன்னிங்சின் முதல் பந்தையே லாவகமாக பாயிண்ட் திசையில் தூக்கி சிக்ஸருக்கு பறக்கவிட்டார் பஞ்சாப் அணியின் பிரியான்ஷ் ஆர்யா. மைதானத்தில் இருந்த ரசிகர்கள் இந்த அதிரடியைக் கண்டு வியப்பில் உறைந்து போனார்கள்.

இதன் மூலம் ஐபிஎல் வரலாற்றில் ஒரு போட்டியின் முதல் பந்திலேயே 2 முறை சிக்ஸர் அடித்த உலகின் முதல் வீரர் என்ற வரலாற்றுச் சாதனையை பிரியான்ஷ் ஆர்யா படைத்துள்ளார். இதற்கு முன்னதாக கடந்த 2025-ம் ஆண்டு சென்னை சூப்பர் கிங்ஸ் அணிக்கு எதிரான போட்டியில் கலீல் அகமது வீசிய ஆட்டத்தின் முதல் பந்திலேயே இவர் சிக்ஸர் அடித்திருந்தார். ஐபிஎல் வரலாற்றில் இதுவரை நமன் ஓஜா (2009), விராட் கோலி (2019), பில் சால்ட் (2024) மற்றும் யஷஸ்வி ஜெய்ஸ்வால் (2026) ஆகியோர் மட்டுமே தலா ஒருமுறை இந்த சாதனையைச் செய்துள்ளனர். ஆனால், 2 முறை இந்தச் சாதனையைச் செய்த ஒரே வீரர் பிரியான்ஷ் ஆர்யா மட்டுமே.

IPL 2026: துவம்சம் செய்த ஸ்ரேயாஸ், பிரியான்ஷ்.. மிரண்டு போன டெல்லி கேப்பிடல்ஸ்.. 210 ரன் குவிப்பு

டெல்லிக்கு எதிரான இந்தப் போட்டியில் ஆடுகளம் பந்துவீச்சாளர்களுக்கு சாதகமாக இருந்தபோதிலும், பிரியான்ஷ் ஆர்யா எவ்வித பயமும் இன்றி விளையாடினார். பந்து நன்றாக ஸ்விங் ஆன நிலையிலும், வெறும் 24 பந்துகளில் அவர் தனது அரைசதத்தைப் பூர்த்தி செய்தார். 2026 ஐபிஎல் சீசனில் இவரது ஸ்ட்ரைக் ரேட் 250-க்கும் அதிகமாக உள்ளது குறிப்பிடத்தக்கது. ஒட்டுமொத்த டி20 கிரிக்கெட் வரலாற்றில் ஒரு இன்னிங்சை சிக்ஸருடன் தொடங்குவதில் யஷஸ்வி ஜெய்ஸ்வாலுக்கு அடுத்தபடியாக 2-வது இடத்தில் பிரியான்ஷ் உள்ளார்.