IPL 2026: வைபவ் சூர்யவன்ஷியை திட்டிய ரியான் பராக்.. டிரெஸ்ஸிங் ரூமில் என்ன நடந்தது? ரசிகர்கள் ஆவேசம்

சண்டிகர்: 2026 ஐபிஎல் தொடரின் இரண்டாவது தகுதிச் சுற்று ஆட்டத்தில் ராஜஸ்தான் ராயல்ஸ் அணி தோல்வியடைந்து வெளியேறியது. இப்போட்டியில் அபாரமாக விளையாடி 96 ரன்கள் குவித்த 15 வயது வீரர் வைபவ் சூர்யவன்ஷியை, அந்த அணியின் கேப்டன் ரியான் பராக் கடுமையாகச் சாடியது பெரும் சர்ச்சையை ஏற்படுத்தியுள்ளது.

தொடர்ந்து இரண்டாவது போட்டியாக வைபவ் சூர்யவன்ஷி சதம் அடிக்கும் வாய்ப்பை நூலிழையில் தவறவிட்டார். சன்ரைசர்ஸ் ஹைதராபாத் அணிக்கு எதிரான கடந்த போட்டியில் 97 ரன்களில் ஆட்டமிழந்த அவர், குஜராத் டைட்டன்ஸ் அணிக்கு எதிராக 96 ரன்களில் அவுட் ஆனார். ரபாடா வீசிய ஷார்ட் பிட்ச் பந்தை 'அப்பர் கட்' ஆட முயன்று அவர் ஆட்டமிழந்தார். முந்தைய போட்டியிலும் இதே போன்ற பந்தில்தான் அவர் அவுட் ஆகியிருந்தார்.

டிரெஸ்ஸிங் ரூமில் நடந்த மோதல்

வைபவ் ஆட்டமிழந்து டிரெஸ்ஸிங் ரூமுக்குத் திரும்பியபோது, கேப்டன் ரியான் பராக் அவரிடம் மிகவும் கோபமாகப் பேசினார். வைபவ் தண்ணீர் குடித்துக்கொண்டிருந்தபோது, ரியான் பராக் அவரை நோக்கி விரலைக் காட்டி ஏதோ அறிவுரை கூறுவது போலக் கடிந்துகொண்டார். அந்தச் சிறுவன் எவ்வித பதிலும் கூறாமல் அமைதியாக அமர்ந்திருந்தார். இந்தத் காட்சிகள் சமூக வலைதளங்களில் வெளியாகி பரவி வருகின்றன.

மீண்டும் வெடித்த கோபம்

இதுமட்டுமின்றி, குஜராத் அணி பேட்டிங் செய்தபோது 18-வது ஓவரில் மற்றொரு சம்பவம் நடந்தது. குஜராத் அணி வெற்றி பெற 12 பந்துகளில் 10 ரன்கள் மட்டுமே தேவைப்பட்டது. அப்போது வைபவ் கவனக்குறைவாக இருந்ததாகக் கூறி, மைதானத்திலேயே ரியான் பராக் அவர் மீது கத்தினார். ஏற்கனவே ராஜஸ்தான் அணி தோற்கும் நிலையில் இருந்தபோது, அணியின் நட்சத்திர வீரரான வைபவ் மீது பராக் காட்டிய ஆக்ரோஷம் ரசிகர்களை முகம் சுளிக்க வைத்துள்ளது.

ரசிகர்கள் கண்டனம்

ரசிகர்கள் ரியான் பராக்கைச் சமூக வலைதளங்களில் கடுமையாக விமர்சித்து வருகின்றனர். "ஐபிஎல் தொடரில் 6 ஆண்டுகளாக விளையாடும் ரியான் பராக் 97 போட்டிகளில் வெறும் 1800 ரன்கள் மட்டுமே எடுத்துள்ளார். ஆனால், அறிமுகமான 23 போட்டிகளிலேயே வைபவ் 1000 ரன்களைக் கடந்துவிட்டார். 10,000 ரன்கள் எடுத்த ஜாம்பவான் போல ரியான் பராக் நடந்துகொள்கிறார்" என ரசிகர்கள் சாடியுள்ளனர். மேலும், இந்தப் போட்டியில் ரியான் பராக் வெறும் 11 ரன்கள் மட்டுமே எடுத்ததையும் அவர்கள் சுட்டிக்காட்டியுள்ளனர்.

IPL 2026: மைதானத்திலேயே கதறி அழுத வைபவ் சூர்யவன்ஷி.. பாதியில் நின்ற ராஜஸ்தான் ராயல்ஸ் கனவு

வைபவ்வின் அடுக்கடுக்கான சாதனைகள் தோல்வியடைந்தாலும் வைபவ் சூர்யவன்ஷி பல உலக சாதனைகளை முறியடித்துள்ளார். அவற்றில் சில -

• 15 போட்டிகளில் 776 ரன்களுடன் ஆரஞ்சு தொப்பி பட்டியலில் முதலிடத்தில் உள்ளார்.
• ஐபிஎல் வரலாற்றில் மிகக் குறைந்த வயதில் 1000 ரன்களைக் கடந்த வீரர் (ரிஷப் பண்ட் சாதனை முறியடிப்பு).
• அதிவேகமாக 1000 ரன்களை எட்டிய இந்திய வீரர் (23 இன்னிங்ஸ்கள்).
• 1000 ரன்களைக் கடக்க மிகக் குறைந்த பந்துகளை (440 பந்துகள்) எதிர்கொண்ட வீரர்.
• ஐபிஎல் தொடரில் அதிகமுறை 90-களில் ஆட்டமிழந்த வீரர்கள் பட்டியலில் (3 முறை) விராட் கோலி, கே.எல்.ராகுல் ஆகியோருடன் இணைந்துள்ளார்.

ஒருபுறம் வைபவ்வின் அபார வளர்ச்சி இந்திய கிரிக்கெட்டிற்கு நம்பிக்கையை அளித்துள்ள நிலையில், ரியான் பராக்கின் இத்தகைய நடத்தை தேவையற்றது என்பதே பலரின் கருத்தாக உள்ளது.