IPL 2026: முதல் விக்கெட் எடுத்ததும் பேப்பர் எடுத்து காட்டிய மும்பை இந்தியன்ஸ் வீரர்.. என்ன எழுதி இருந்தது?

மும்பை: மும்பை இந்தியன்ஸ் சுழற்பந்து வீச்சாளர் ரகு ஷர்மா, லக்னோ சூப்பர் ஜெயன்ட்ஸுக்கு எதிராக தனது முதல் ஐபிஎல் விக்கெட்டை பெற்றார். விக்கெட்டைக் கொண்டாடிய அவரது உணர்வுபூர்வமான குறிப்பு வீடியோ சமூக வலைத்தளங்களில் வைரலாகி, 15 ஆண்டுகால கிரிக்கெட் பயணத்தின் முக்கிய மைல்கல்லானது.

தனது இரண்டாவது ஐபிஎல் போட்டியில் ஆடிய ரகு, அறிமுக பேட்ஸ்மேன் அக்‌ஷத் ரகுவன்ஷியை ஆட்டமிழக்கச் செய்தார். ஒரு மெதுவான பந்தால், அக்‌ஷத் அதை தவறாக எத்தினார். பந்து பேட், காலில் பட்டு ரகு ஷர்மாவிடம் திரும்ப, அவர் எளிதாகப் பிடித்து விக்கெட்டை உறுதி செய்தார்.

விக்கெட்டை வீழ்த்திய மகிழ்ச்சியில் சக வீரர்கள் சூழ்ந்துகொள்ள, ரகு தனது பாக்கெட்டிலிருந்து ஒரு குறிப்பை எடுத்து உயர்த்திப் பிடித்தார். அதில், "மிகவும் வேதனையான 15 ஆண்டுகள். குருதேவின் தெய்வீக கருணையால் இன்று முடிந்தது. இந்த வாய்ப்பை அளித்த மும்பை இந்தியன்ஸுக்கு நன்றி. என்றென்றும் நன்றியுள்ளவன்" எனக் குறிப்பிடப்பட்டிருந்தது.

இது உள்ளூர் கிரிக்கெட்டில் ரகு கடந்த நீண்ட போராட்டத்தையும், ஐபிஎல் களத்திற்குத் தாமதமாக வந்த அனுபவத்தை எடுத்து காட்டியது. பல வருடங்கள் உழைப்புக்கு பிறகு, இந்த விக்கெட் அவருக்கு கிடைத்தது. சூப்பர் ஜெயன்ட்ஸுக்கு எதிராக கட்டுக்கோப்பாக பந்துவீசிய ரகு ஷர்மா, 4 ஓவர்களில் 36 ரன்கள் விட்டுக்கொடுத்து ஒரு விக்கெட் எடுத்தார். தனது வேகம், பந்தின் திசையை மாற்றி, பேட்ஸ்மேன்கள் ரன் குவிக்க விடாமல் அழுத்தத்தை ஏற்படுத்தினார்.

மிடில் ஓவர்களில் ரிஷப் பந்த், ஐடன் மார்க்ரம் போன்ற அதிரடி வீரர்கள் ரன் வேகத்தை அதிகரிக்க முயன்ற போதும், ரகு நிலைதடுமாறவில்லை. இரண்டு சிக்ஸர்களைக் கொடுத்தாலும், மனநம்பிக்கையுடன் பந்துவீசி, கட்டுப்பாட்டைத் தக்கவைத்துக் கொண்டார். அனுபவமிக்க பேட்ஸ்மேன்களையும் ரிஸ்க் எடுக்கத் தள்ளினார்.

ரகு ஷர்மா, 2025 ஐபிஎல் தொடரில் காயம் அடைந்த விக்னேஷ் புதூருக்குப் பதிலாக மும்பை இந்தியன்ஸில் இணைந்தார். அந்த சீசனில் விளையாட வாய்ப்பு கிடைக்காவிட்டாலும், அணி அவரது திறமையின் மீது நம்பிக்கை வைத்து 2026 சீசனுக்காக அவரைத் தக்கவைத்துக் கொண்டது.

2026 சீசன் தொடங்கியபோது ரகு ஷர்மாவுக்கு 33 வயதாகியிருந்தது. முதலில் வேகப்பந்து வீச்சாளராக இருந்து, பஞ்சாப் உள்ளூர் கிரிக்கெட்டில் இடம்பிடித்து ஐபிஎல் வாய்ப்பை பெற லெக் ஸ்பின்னராக மாறினார். ஷேன் வார்னே, இம்ரான் தாஹிர் போன்ற ஜாம்பவான்களின் பாணியிலிருந்து உத்வேகம் பெற்றுள்ளார்.