IPL 2026: ரவி பிஸ்னாய் மாபெரும் சாதனை.. இளம் வயதில் பும்ரா, சாஹல் கூட தொட முடியாத உயரம்

அகமதாபாத்: டி20 கிரிக்கெட்டில் 200 விக்கெட்டுகளை வீழ்த்திய இளம் இந்திய பந்துவீச்சாளர் என்ற புதிய சாதனையை ரவி பிஷ்னோய் படைத்துள்ளார். ஐபிஎல் 2026 சீசனில் , அகமதாபாத் நரேந்திர மோடி மைதானத்தில் குஜராத் டைட்டன்ஸ் அணிக்கு எதிரான ஐபிஎல் போட்டியில் ராஜஸ்தான் ராயல்ஸ் அணிக்காக விளையாடும்போது இந்த மைல்கல்லை எட்டினார். அப்போது பிஷ்னோய்க்கு 25 ஆண்டுகள் 211 நாட்கள் என்பதுடன், இது அவரது 170வது T20 போட்டியாகும்.

இச்சாதனையை எட்ட பிஷ்னோய்க்கு சனிக்கிழமை அன்று இரண்டு விக்கெட்டுகள் தேவைப்பட்டன. குஜராத் டைட்டன்ஸ் இன்னிங்ஸின் 13வது ஓவரில், தனது இரண்டாவது ஓவரின் முதல் பந்திலேயே கிளைன் பிலிப்ஸை 3 ரன்களில் ஆட்டமிழக்க செய்து, அவர் தனது 200வது விக்கெட்டை கைப்பற்றினார். ஒரு பெரிய ஷாட் ஆட முயன்ற பிலிப்ஸை ஜோஃப்ரா ஆர்ச்சர் கேட்ச் பிடித்தார்.

இம்பாக்ட் வீரராகக் களமிறங்கிய பிஷ்னோய், போட்டியில் மொத்தம் மூன்று விக்கெட்டுகளை வீழ்த்தினார். தனது முதல் ஓவரிலேயே சாய் சுதர்சனை 73 ரன்கள் எடுத்த நிலையில் வெளியேற்றி விக்கெட் கணக்கைத் தொடங்கினார். அதன் பிறகு, பவுண்டரி அடித்த வாஷிங்டன் சுந்தரையும் ரவீந்திர ஜடேஜாவிடம் கேட்ச் கொடுத்து வெளியேற்றினார். இந்த மூன்று விக்கெட்டுகளும் ராஜஸ்தான் ராயல்ஸுக்கு முக்கியப் பங்காற்றின.

முன்னாள் உலக நம்பர் 1 T20I பந்துவீச்சாளரான பிஷ்னோய், இந்தியா U19 உலகக் கோப்பை அணியிலும் இடம்பிடித்தவர். ராஜஸ்தான் ராயல்ஸ் தவிர, ஐபிஎல் தொடரில் பஞ்சாப் கிங்ஸ் மற்றும் லக்னோ சூப்பர் ஜெயன்ட்ஸ் போன்ற அணிகளுக்காகவும் இவர் விளையாடியுள்ளார். இந்திய அணிக்காக 44 T20 சர்வதேச போட்டிகளில் பங்கேற்று 64 விக்கெட்டுகளை அவர் வீழ்த்தியுள்ளார்.

இந்த நிலையில், T20 போட்டிகளில் 200 விக்கெட்டுகளை எடுத்த 19வது இந்திய பந்துவீச்சாளர் ரவி பிஷ்னோய் ஆவார். இந்திய சுழற்பந்து வீச்சாளர்களுள் இந்த சாதனையை நிகழ்த்திய ஒன்பதாவது வீரர் இவரே.உலக அளவில், குறைந்த வயதில் 200 T20 விக்கெட்டுகளை வீழ்த்திய சாதனையை ஆப்கானிஸ்தானின் ரஷித் கான் பெற்றுள்ளார். அவர் தனது 23 ஆண்டுகள் 119 நாட்களில் இந்த மைல்கல்லை எட்டினார்.