IPL 2026: இந்த 3 ஆர்சிபி வீரரையும் இந்திய அணியில் சேர்க்க வேண்டும்.. EX தேர்வுக்குழு தலைவர் கருத்து

தர்மசாலா: ஐபிஎல் 2026 சீசனில் , ராயல் சேலஞ்சர்ஸ் பெங்களூரு அணி இறுதிப் போட்டிக்கு முன்னேறியது. தரம்சாலாவில் நடைபெற்ற ப்ளேஆஃப் குவாலிஃபையர் 1 போட்டியில், நடப்பு சாம்பியன்களான ஆர்சிபி, குஜராத் டைட்டன்ஸை 92 ரன்கள் வித்தியாசத்தில் வீழ்த்தி அந்த சாதனையைப் படைத்தது. இதன் மூலம் ஆர்சிபி, தொடர்ச்சியாக இரண்டாவது முறையாக இறுதிக்குத் தகுதி பெற்றது.

குஜராத் டைட்டன்ஸ் டாஸ் வென்று பந்துவீச்சைத் தேர்ந்தெடுத்தது. ஆனால், ஆர்சிபி பேட்ஸ்மேன்கள் தொடக்கம் முதலே அதிரடி காட்டினர். கேப்டன் ரஜத் படிதார் 93 ரன்கள் (54 பந்துகள்) குவிக்க, க்ருணால் பாண்ட்யா 28 பந்துகளில் 43 ரன்களும், ஜிதேஷ் சர்மா 5 பந்துகளில் 15 ரன்களும் சேர்த்தனர். இதன் மூலம் ஆர்சிபி, 254 ரன்கள் என்ற இமாலய இலக்கை நிர்ணயித்தது.

255 ரன்கள் என்ற சவாலான இலக்கை நோக்கி களமிறங்கிய குஜராத் டைட்டன்ஸ் அணிக்கு, ஆரம்பத்திலிருந்தே தடுமாற்றம் ஏற்பட்டது. ககிசோ ரபாடா, வெங்கடேஷ் ஐயரை (19) வீழ்த்த, ஜேசன் ஹோல்டர் விராட் கோலி (43), தேவ்தத் படிக்கல் (30) ஆகியோரை அடுத்தடுத்து அவுட்டாக்கினார். இதனால் முக்கிய விக்கெட்டுகளைத் துரிதமாக இழந்து இலக்கை எட்ட முடியாமல் டைட்டன்ஸ் திணறியது.

IPL 2026: விராட் கோலி தந்த Pep Talk தான் ஆர்சிபி வெற்றிக்கு காரணம்.. தினேஷ் கார்த்திக் புகழாரம்

ராயல் சேலஞ்சர்ஸ் பெங்களூருவின் பந்துவீச்சில் ஜேக்கப் டஃபி அபாரமாக மூன்று விக்கெட்டுகளை வீழ்த்த, சாய் சுதர்சன் (14), வாஷிங்டன் சுந்தர் (8), ரஷித் கான் (8) ஆகியோர் ஆட்டமிழந்தனர். சுப்மன் கில் (2) புவனேஷ்வர் குமாரிடம் வீழ்ந்தார். ஜாஸ் பட்லரை (29) அவுட்டாக்கிக் கொண்டாடிய ஜாஸ் ஹேசில்வுட், குஜராத் டைட்டன்ஸ் சரிவில் முக்கியப் பங்காற்றினார்.

போட்டியில், ரஷிக் சலாம் 5 ரன்கள் எடுத்த நிஷாந்த் சிந்துவையும், டக் அவுட்டான ஜேசன் ஹோல்டரையும் வீழ்த்தினார். மேலும், 68 ரன்கள் விளாசிய ராகுல் திவாடியாவை புவனேஷ்வர் குமார் வெளியேற்றினார். க்ருணால் பாண்ட்யா ககிசோ ரபாடா (9) மற்றும் முகமது சிராஜ் (5) ஆகியோரின் விக்கெட்டுகளைக் கைப்பற்ற, குஜராத் டைட்டன்ஸ் அணி 19.3 ஓவர்களில் வெறும் 162 ரன்களுக்குச் சுருண்டது.

முன்னாள் இந்திய அணியின் தலைமைத் தேர்வாளரான கிருஷ்ணமாச்சாரி ஸ்ரீகாந்த், ராயல் சேலஞ்சர்ஸ் பெங்களூருவின் இந்த வெற்றியின் பிறகு, ரஜத் படிதார், க்ருணால் பாண்ட்யா மற்றும் புவனேஷ்வர் குமார் ஆகியோரை மீண்டும் இந்திய ஒயிட்-பால் அணியில் பார்க்க விரும்புவதாகத் தெரிவித்தார்.

படிதார் குறித்துப் பேசிய ஸ்ரீகாந்த், "இன்று நான் தேர்வுக் குழுவின் தலைவராக இருந்தால், ரஜத் படிதாருக்கு இந்திய ஒயிட்-பால் கிரிக்கெட்டில் ஒரு வாய்ப்பு கொடுப்பேன். அவருக்கு ஒயிட்-பால் கிரிக்கெட்டில், டி20 ஆக இருந்தாலும் சரி, ஒருநாள் போட்டியாக இருந்தாலும் சரி, ஒரு வாய்ப்பு கொடுக்கப்பட வேண்டும்" எனக் குறிப்பிட்டார்.

CSK அணி, தோனி இடையே கருத்து வேறுபாடா? அணியில் தொடர்வாரா? சிஎஸ்கே சிஇஓ காசி விளக்கம்

மேலும், "க்ருணால் பாண்ட்யா டி20 கிரிக்கெட்டில் ஒரு வாய்ப்புக்குத் தகுதியானவர். புவனேஷ்வர் குமாருக்கு இந்திய அணிக்காக டி20 கிரிக்கெட்டில் மீண்டும் அழைப்பு விடுக்க வேண்டும் என்று நான் தொடர்ந்து கூறி வருகிறேன்" என்று முன்னாள் இந்திய தொடக்க ஆட்டக்காரர் பரிந்துரைத்தார்.