IPL 2026: ஆர்சிபியின் சில்லறை தனம்! கூல் டிரிங்ஸை நடுவர் குடித்ததால் ரஜத் பட்டிதார், தினேஷ் கார்த்திக் ஆத்திரம்

ஐபிஎல் 2026 சீசனில் சிஎஸ்கே அணிக்கு எதிரான கிரிக்கெட் போட்டியில், ஆர்சிபி 43 ரன்கள் வித்தியாசத்தில் அபார வெற்றி பெற்றது. இப்போட்டியின்போது, ஆர்சிபி கேப்டன் ரஜத் பட்டிதார் மற்றும் மென்டர் தினேஷ் கார்த்திக், நடுவர்களுடன் இடைவேளையின்போது வாக்குவாதத்தில் ஈடுபட்ட சம்பவம் சமூக வலைத்தளங்களில் வைரலாகி வருகிறது.

தேவ்தத் படிக்கல் தனது அரை சதத்தை எட்டியதும், 14வது ஓவர் முடிவில் இந்த மோதல் நிகழ்ந்தது. கேப்டன் பட்டிதார், மென்டர் கார்த்திக், தலைமைப் பயிற்சியாளர் ஆண்டி ஃப்ளவர் ஆகியோர் நடுவர்களுடன் கடும் வாக்குவாதத்தில் ஈடுபட்டனர். வீரர்களுக்கான பானத்தை நடுவர் ஒருவர் எடுத்தபோது, பட்டிதார் அதைத் திருப்பித் தருமாறு கோபமாகக் கேட்டதாக சமூக வலைத்தள வீடியோக்கள் தெரிவிக்கின்றன. ஆனால் உண்மையான காரணம் தெரியவில்லை.

பெங்களூருவில் நடைபெற்ற இப்போட்டியில், முதலில் பேட் செய்த ஆர்சிபி அணி, 20 ஓவர்களில் 3 விக்கெட் இழப்புக்கு 250 ரன்கள் குவித்தது. தேவ்தத் படிக்கல் 29 பந்துகளில் 50 ரன்கள் எடுத்து அணிக்கு வலுசேர்த்தார். சன்ரைசர்ஸ் ஹைதராபாத்திற்கு எதிராக 61 ரன்கள் எடுத்திருந்த படிக்கல், இந்த போட்டியிலும் தனது சிறந்த ஃபார்மை தொடர்ந்தார்.

படிக்கலுடன் இணைந்து, டிம் டேவிட் 25 பந்துகளில் 70 ரன்கள் விளாசினார். ஆட்டமிழக்காமல் இருந்த ரஜத் பட்டிதார் 19 பந்துகளில் 48 ரன்கள் சேர்த்தார். இவர்களின் அதிரடி சிஎஸ்கே பந்துவீச்சாளர்களைத் திணறடித்து, ஆர்சிபி 250/3 என்ற வலுவான ஸ்கோரைப் பெற வழிவகுத்தது.

ஆர்சிபி நிர்ணயித்த கடின இலக்கை நோக்கி களமிறங்கிய சென்னை சூப்பர் கிங்ஸ் பேட்டிங்கில் மீண்டும் சறுக்கியது. இறுதி ஓவரில் 207 ரன்களுக்கு அனைத்து விக்கெட்டுகளையும் இழந்தது. ஐந்து முறை சாம்பியன் சிஎஸ்கே அணிக்கு இது சீசனின் மூன்றாவது தொடர் தோல்வியாகும்.

போட்டிக்குப் பிந்தைய செய்தியாளர் சந்திப்பில் பேசிய படிக்கல், "இது கடின உழைப்பு மற்றும் தன்னம்பிக்கையின் விளைவு. ஆரம்பத்தில் நான் விளையாட விரும்பிய கிரிக்கெட் பாணியில் மாற்றம் செய்வது எளிதல்ல. ஆனால் அதை நான் உணர்வுபூர்வமாகச் செய்தேன். ஆர்சிபி நிர்வாகமும், துணைப் பணியாளர்களும் சரியான வழிகாட்டுதலை வழங்கியதால் இது சாத்தியமானது" என்றார்.