IPL 2026: இந்திய கிரிக்கெட்டின் வருங்கால நட்சத்திரங்கள்.. மிரள வைத்த 5 இளம் வீரர்கள்!

மும்பை: 2026-ம் ஆண்டு ஐபிஎல் கிரிக்கெட் தொடரில் அனுபவம் வாய்ந்த சர்வதேச நட்சத்திரங்களை பின்னுக்குத் தள்ளி, துணிச்சலான ஆட்டத்தால் பல இளம் வீரர்கள் முத்திரை பதித்துள்ளனர். வெற்றிக்கு வித்திடும் ஆட்டம், அழுத்தமான நேரங்களில் காட்டிய முதிர்ச்சி ஆகியவை இந்திய கிரிக்கெட்டின் அடுத்த தலைமுறை தயாராகிவிட்டதை பறைசாற்றுகின்றன. இந்த சீசனில் அனைவரது கவனத்தையும் ஈர்த்த அந்த 5 இளம் வீரர்கள் குறித்து இங்கே காண்போம்:

வைபவ் சூர்யவன்ஷி (ராஜஸ்தான் ராயல்ஸ்): பீகாரைச் சேர்ந்த 15 வயதே ஆன இந்த இடது கை ஆட்டக்காரர், இந்த சீசனின் மிகப்பெரிய கண்டுபிடிப்பு. 579 ரன்களை குவித்து சாதனை படைத்த இவர், குஜராத் டைட்டன்ஸ் அணிக்கு எதிராக 35 பந்துகளில் சதம் விளாசினார். ஒரே ஐபிஎல் சீசனில் 50-க்கும் மேற்பட்ட சிக்ஸர்களை (53 சிக்ஸர்கள்) விளாசிய முதல் இந்தியர் என்ற பெருமையையும், 230-க்கும் அதிகமான ஸ்டிரைக் ரேட்டையும் பெற்று மிரள வைத்துள்ளார்.

பிரியான்ஷ் ஆர்யா (பஞ்சாப் கிங்ஸ்): பஞ்சாப் அணியால் 3.8 கோடி ரூபாய்க்கு ஏலத்தில் எடுக்கப்பட்ட இவர், தனது அதிரடியால் அந்த தொகைக்கு முழு நியாயம் சேர்த்துள்ளார். இந்த சீசனில் 500-க்கும் மேற்பட்ட ரன்களை குவித்துள்ள இவர், சென்னை சூப்பர் கிங்ஸ் அணிக்கு எதிராக 39 பந்துகளில் சதம் அடித்து அசத்தினார். தொடக்க ஓவர்களில் இவரது அதிரடி பஞ்சாப் அணிக்கு பெரும் பலமாக அமைந்தது.

அன்ஷுல் கம்போஜ் (சென்னை சூப்பர் கிங்ஸ்): சென்னை சூப்பர் கிங்ஸ் அணியின் நம்பிக்கை நட்சத்திரமாக உருவெடுத்துள்ள இவர், பந்துவீச்சில் 21 விக்கெட்டுகளை வீழ்த்தி சாதனை படைத்துள்ளார். குறிப்பாக போட்டியின் இறுதி ஓவர்களில் ரன்களை கட்டுப்படுத்தி விக்கெட்டுகளை எடுப்பதில் வல்லவராக திகழ்கிறார். இவரது துல்லியமான பந்துவீச்சு இந்திய அணியின் வேகப்பந்து வீச்சுக்கு புதிய பலம் சேர்க்கும் என எதிர்பார்க்கப்படுகிறது.

பிரின்ஸ் யாதவ் (லக்னோ சூப்பர் ஜெயண்ட்ஸ்): வெறும் 30 லட்சம் ரூபாய்க்கு ஏலத்தில் எடுக்கப்பட்ட இவர், லக்னோ அணியின் ஜாக்பாட்டாக அமைந்துள்ளார். அதிவேக பந்துவீச்சால் முன்னணி பேட்டர்களை திணறடித்த இவர், 12 போட்டிகளில் விளையாடி 16 விக்கெட்டுகளை சாய்த்துள்ளார். குறைந்த விலைக்கு வாங்கப்பட்டாலும் இவரது செயல்பாடு மிக உயர்வாக இருந்தது.

IPL 2026: அத்துமீறிய ரசிகர்கள்.. அலறிய சியர் லீடர்கள்.. ஓடி வந்த காவலர்கள்.. என்ன நடந்தது?

சாகிப் உசேன் (சன்ரைசர்ஸ் ஹைதராபாத்): தனது முதல் போட்டியிலேயே ராஜஸ்தான் அணிக்கு எதிராக 24 ரன்கள் மட்டுமே கொடுத்து 4 விக்கெட்டுகளை வீழ்த்தி அதிர வைத்தார். 21 வயதான இவர், மிடில் ஓவர்களில் முக்கிய பார்ட்னர்ஷிப்களை உடைத்து ஹைதராபாத் அணிக்கு பல வெற்றிகளை தேடித் தந்துள்ளார். இந்த சீசனில் மொத்தம் 15 விக்கெட்டுகளை இவர் கைப்பற்றியுள்ளார்.