IPL 2026: ஜெய்ஸ்வால், ஜடேஜா கிடையாது.. ராஜஸ்தான் ராயல்ஸ் அணி கேப்டனாக 24 வயது ஆல்ரவுண்டர் நியமனம்

ஜெய்ப்பூர்: ஐபிஎல் 2026 சீசனுக்கான ராஜஸ்தான் ராயல்ஸ் அணிக்கு 24 வயதான ரியான் பராக் புதிய கேப்டனாக நியமிக்கப்பட்டுள்ளார். அசாம் மாநிலத்தைச் சேர்ந்த இவர், சஞ்சு சாம்சனுக்குப் பதிலாக தலைமைப் பொறுப்பை ஏற்கிறார். கடந்த ஆண்டு, சாம்சன் காயம் காரணமாக, சில போட்டிகளில் பங்கேற்காத நிலையில், , பராக் ராயல்ஸ் அணியை எட்டு போட்டிகளில் வழிநடத்தியுள்ளார்.

ராஜஸ்தான் ராயல்ஸின் அதிக போட்டிகளில் விளையாடிய மற்றும் அதிக ரன்கள் குவித்த வெற்றிகரமான கேப்டனான சஞ்சு சாம்சன், ஐபிஎல் 2026 ஏலத்திற்கு முன் சென்னை சூப்பர் கிங்ஸ் அணிக்கு டிரேட் செய்யப்பட்டார். இதன் காரணமாக ராஜஸ்தான் அணி புதிய கேப்டனைத் தேர்வு செய்ய வேண்டியிருந்தது.

2019 முதல் ராஜஸ்தான் ராயல்ஸ் அணியில் விளையாடி வரும் பராக், ஐபிஎல் 2025 மெகா ஏலத்திற்கு முன் ரூ.14 கோடிக்கு தக்கவைக்கப்பட்டார். இதுவரை 84 ஐபிஎல் போட்டிகளில் 1566 ரன்கள் குவித்துள்ளார். கடந்த ஆண்டு சாம்சன் இல்லாத நிலையில் எட்டு போட்டிகளில் ராயல்ஸை வழிநடத்திய இவர், இரண்டில் மட்டுமே வெற்றி பெற்றார்.

ரியான் பராக்கை கேப்டனாக தேர்ந்தெடுக்கும் முடிவுக்கு முன், ரவீந்திர ஜடேஜா, யஷஸ்வி ஜெய்ஸ்வால் போன்ற வீரர்களும் பரிசீலிக்கப்பட்டனர். கடந்த ஆண்டு வர்த்தக ஒப்பந்தம் மூலம் ராயல்ஸில் இணைந்த ஜடேஜா, சென்னை சூப்பர் கிங்ஸ் அணியை வழிநடத்திய அனுபவம் கொண்டவர். ராஜஸ்தான் அணியின் அதிக விலை கொடுத்து தக்கவைக்கப்பட்ட வீரரான ஜெய்ஸ்வால், கேப்டன் பொறுப்பை ஏற்க ஆர்வம் காட்டினார்.

இங்கிலாந்து ஆல்-ரவுண்டரான சாம் கரண், பஞ்சாப் கிங்ஸ் உள்ளிட்ட பல டி20 அணிகளை வழிநடத்திய அனுபவமிக்கவர். ஜனவரி 2026 இல், டெசர்ட் வைப்பர்ஸ் அணிக்கு அவர்களது முதல் சர்வதேச லீக் டி20 பட்டத்தை வென்று கொடுத்த நிலையில், அவரது பெயரும் புறக்கணிக்கப்பட்டுள்ளது.

ஐபிஎல் தொடரில் ராஜஸ்தான் ராயல்ஸ் அணியின் ஏழாவது முழுநேர கேப்டனாக ரியான் பராக் பொறுப்பேற்கிறார். இவருக்கு முன் ஷேன் வார்னே, ஷேன் வாட்சன், ராகுல் டிராவிட், அஜிங்கிய ரஹானே, ஸ்டீவ் ஸ்மித் மற்றும் சஞ்சு சாம்சன் ஆகியோர் முழுநேர கேப்டன்களாக அணியை வழிநடத்தியுள்ளனர்.

ராஜஸ்தான் ராயல்ஸ் கேப்டனாக பராக்கின் முதல் சீசன் சவால்கள் நிறைந்தது ஆகும். கடந்த ஆண்டு 9ஆம் இடம் பிடித்த ராயல்ஸ், 2008 இல் மட்டுமே ஐபிஎல் பட்டத்தை வென்றது. ஜூலை 2024 இல் இந்தியாவிற்காக சர்வதேச கிரிக்கெட்டில் அறிமுகமான பராக், இந்த ஆண்டு அணியை பிளேஆஃப்களுக்கு தகுதிபெற வைக்க வேண்டும்.

ஐபிஎல் 2026 சீசனுக்கான ராஜஸ்தான் ராயல்ஸ் அணி விவரம் இதோ: ரியான் பராக் (கேப்டன்), யஷஸ்வி ஜெய்ஸ்வால், ஷிம்ரான் ஹெட்மையர், வைபவ் சூரியவன்ஷி, ல்ஹுவான்-ட்ரே பிரிட்டோரியஸ், ஷுபம் தூபே, துருவ் ஜூரேல் (விக்கெட் கீப்பர்), ஜோஃப்ரா ஆர்ச்சர், சந்தீப் சர்மா, நான்ட்ரே பர்கர், துஷார் தேஷ்பாண்டே, க்வெனா மபாகா, யுத்வீர் சிங், ரவீந்திர ஜடேஜா, சாம் கரண், டோனோவன் ஃபெரீரா, ரவி பிஷ்னோய், சுஷாந்த் மிஸ்ரா, யஷ் ராஜ் புன்ஜா, விக்னேஷ் புதூர், அமன் ராவ், பிரிஜேஷ் சர்மா, ஆடம் மில்னே, குல்தீப் சென்.