IPL 2026: ஜோப்ரா ஆர்ச்சர் பந்துவீச்சில் சாதனை.. முதல் பந்திலேயே விக்கெட்டை வீழ்த்தி அபாரம்

கொல்கத்தா: ஐபிஎல் வரலாற்றில் முகமது ஷமியின் சாதனையை சமன் செய்து, ஜோஃப்ரா ஆர்ச்சர் ஓர் இன்னிங்ஸின் முதல் பந்தில் ஐந்தாவது முறையாக விக்கெட்டை வீழ்த்தி புதிய மைல்கல்லை எட்டியுள்ளார். கொல்கத்தா நைட் ரைடர்ஸ் அணிக்கு எதிரான போட்டியில் டிம் சீஃபர்ட்டை கோல்டன் டக்கில் வெளியேற்றி, இந்த அபார சாதனையைப் படைத்தார்.

கொல்கத்தா ஈடன் கார்டனில் கேகேஆர் அணிக்கு எதிரான ஆட்டத்தில் ராஜஸ்தான் ராயல்ஸ் வீரர் ஜோப்ரா ஆர்ச்சர் பந்துவீச்சில் அபாரமாக செயல்பட்டு, தாக்கத்தை ஏற்படுத்தினார். ஆட்டத்தின் முதல் ஓவரின் முதல் பந்திலேயே சிறப்பான பந்துவீச்சைக் கொண்டு சீஃபர்ட்டை கிளீன் போல்டு செய்து வெளியேற்றினார்.

இந்த விக்கெட், ஐபிஎல் வரலாற்றில் ஒரு இன்னிங்ஸின் முதல் பந்தில் அதிக விக்கெட்டுகளை வீழ்த்திய பந்துவீச்சாளர்கள் பட்டியலில் முகமது ஷமி சாதனையை ஆர்ச்சர் சமன் செய்துள்ளார். ஷமியை போலவே, ஆர்ச்சரும் தற்போது ஐந்து முறை இந்த தனித்துவமான சாதனையை நிகழ்த்தியுள்ளார்.

இதற்கு முன்னர், ஏப்ரல் 10 அன்று ராயல் சேலஞ்சர்ஸ் பெங்களூருவுக்கு எதிராக பில் சால்ட்டையும், ஏப்ரல் 13 அன்று சன்ரைசர்ஸ் ஹைதராபாத்துக்கு எதிராக அபிஷேக் ஷர்மாவையும் முதல் பந்திலேயே கோல்டன் டக்கில் வெளியேற்றினார்.

இந்த சாதனையைப் பொறுத்தவரை, முகமது ஷமி தனது 124 ஐபிஎல் போட்டிகளில் ஐந்து முறை முதல் பந்து விக்கெட்டை எடுத்தார். ஆனால், ஆர்ச்சர் தற்போதைய கேகேஆர் உடனான போட்டி உட்பட தனது 58-வது ஐபிஎல் ஆட்டத்திலேயே இந்த மைல்கல்லை எட்டியுள்ளார். ராஜஸ்தான் ராயல்ஸ் தவிர, ஜோப்ரா ஆர்ச்சர் மும்பை இந்தியன்ஸ் அணிக்காகவும் விளையாடியுள்ளார்.

ஐபிஎல் இன்னிங்ஸின் முதல் பந்தில் அதிக விக்கெட்டுகளை வீழ்த்தியவர்கள் பட்டியலில் ஷமி மற்றும் ஆர்ச்சருக்கு அடுத்தபடியாக, பிரவீண் குமார், உமேஷ் யாதவ், ட்ரென்ட் போல்ட், லசித் மலிங்கா, புவனேஷ்வர் குமார், அசோக் டிண்டா மற்றும் பேட் கம்மின்ஸ் ஆகியோர் தலா மூன்று விக்கெட்டுகளுடன் உள்ளனர்.

ஐபிஎல் 2026-ல் ஐந்து போட்டிகளுக்குப் பிறகு கேகேஆர் அணியின் பிளேயிங் லெவனில் ஃபின் ஆலனுக்குப் பதிலாக களமிறங்கிய சீஃபர்ட்டின் விக்கெட், ராஜஸ்தான் ராயல்ஸ் அணிக்காக ஆர்ச்சரின் மொத்த விக்கெட்டுகள் எண்ணிக்கையை 65 ஆக உயர்த்தியுள்ளது. இதன் மூலம் அவர் ராஜஸ்தான் ராயல்ஸ் அணியின் அதிக விக்கெட்டுகளை வீழ்த்திய பந்துவீச்சாளர் பட்டியலில் சித்தார்த் திரிவேதியுடன் இணைந்து முதலிடம் வகிக்கிறார்.

ராஜஸ்தான் ராயல்ஸ் அணிக்காக ஐபிஎல் தொடரில் அதிக விக்கெட்டுகள் எடுத்தவர்கள் பட்டியலில் யுஸ்வேந்திர சஹால் 66 விக்கெட்டுகளுடன் (46 போட்டிகளில், 2022 முதல் 2024 வரை) முதலிடத்தில் உள்ளார். தற்போதைய போட்டியில் ஆர்ச்சர் மேலும் இரண்டு விக்கெட்டுகளை வீழ்த்தினால், அவர் சஹாலின் சாதனையை முறியடித்து, ராஜஸ்தான் ராயல்ஸ் அணிக்காக அதிக விக்கெட்டுகளை வீழ்த்தியவர் என்ற தனித்துவமான சாதனை படைப்பார்.

சஹால், ஆர்ச்சர் மற்றும் சித்தார்த் திரிவேதிக்கு அடுத்தபடியாக, ஷேன் வாட்சன் 61 விக்கெட்டுகளுடனும், ஷேன் வார்ன் 57 விக்கெட்டுகளுடனும், ஜேம்ஸ் ஃபாக்னர் 47 விக்கெட்டுகளுடனும் ராஜஸ்தான் ராயல்ஸ் அணிக்காக அதிக விக்கெட்டுகள் எடுத்தவர்கள் பட்டியலில் இடத்தைப் பிடித்துள்ளனர்.