IPL 2026: விராட் கோலி சாதனையை சமன் செய்த தமிழக வீரர் சாய் சுதர்சன்

மும்பை: ஐபிஎல் 2026 தொடரில் குஜராத் டைட்டன்ஸ் அணியின் வீரர் சாய் சுதர்சன், சிறப்பான ஆட்டத்தை வெளிப்படுத்தி வருகிறார். கடந்த ராஜஸ்தான் ராயல்ஸ் அணிக்கு எதிராக நடைபெற்ற இரண்டாவது தகுதிச் சுற்றில் 32 பந்துகளில் 58 ரன்கள் எடுத்து அசத்தினார். இந்த அரை சதம், ஒரு இந்திய வீரரால் ஐபிஎல் சீசனில் அடிக்கப்பட்ட அதிக அரை சதங்களுக்கான விராட் கோலியின் சாதனையை சமன் செய்தது.

நடப்பு ஐபிஎல் 2026 சீசனில் சாய் சுதர்சன் 16 போட்டிகளில் எட்டு அரை சதங்கள் மற்றும் ஒரு சதத்தை பதிவு செய்துள்ளார். இதற்கு முன்னர், 2025 ஐபிஎல் சீசனில் ராயல் சேலஞ்சர்ஸ் பெங்களூரு அணிக்காக விராட் கோலியும் எட்டு அரை சதங்களை அடித்திருந்தார். இதுவரை நடைபெற்ற 19 ஐபிஎல் சீசன்களில், சுதர்சன் மற்றும் கோலியைத் தவிர வேறு எந்த இந்திய பேட்ஸ்மேனும் ஒரு சீசனில் எட்டு அரை சதங்களை எட்டியதில்லை.

ஒரு ஐபிஎல் சீசனில் அதிக அரை சதங்கள் அடித்த ஒட்டுமொத்த சாதனையை டேவிட் வார்னர் தன்வசம் வைத்துள்ளார். அவர் 2016ல் சன்ரைசர்ஸ் ஹைதராபாத் அணிக்காக ஒன்பது அரை சதங்களை அடித்தார். கேன் வில்லியம்சன் (2018ல் SRH), ஃபாஃப் டு பிளெஸ்ஸிஸ் (2023ல் RCB), மற்றும் வார்னர் (2019ல் SRH, ஒரு சதத்துடன் எட்டு அரை சதங்கள்) ஆகியோரும் ஒரு சீசனில் எட்டு அரை சதங்களைப் பதிவு செய்துள்ளனர்.

IPL 2026: ஆரஞ்ச் தொப்பி யாருக்கு? சுப்மன் கில், வைபவ் சூர்யவன்ஷி. சாய் சுதர்சன் இடையே கடும் போட்டி

ஒரே சீசனில் 50 ரன்களுக்கு மேல் அதிக முறை அடித்த வீரர்கள் பட்டியலில் விராட் கோலி முதலிடம் வகிக்கிறார். 2016 ஆம் ஆண்டு RCB அணிக்காக 16 போட்டிகளில் விளையாடிய கோலி, நான்கு சதங்கள் மற்றும் ஏழு அரை சதங்கள் உட்பட மொத்தம் 11 முறை 50 ரன்களுக்கு மேல் எடுத்து, 973 ரன்கள் குவித்து ஆரஞ்சு தொப்பியை வென்றார்.

IPL 2026: சுப்மன் கில் மிரட்டல் சதம்.. பைனலுக்கு குஜராத் தகுதி.. ஆர்சிபியுடன் மோதல்.. ராயல்ஸ் தோல்வி

தற்போது சாய் சுதர்சன், ஐபிஎல் 2026 சீசனில் ஒன்பது முறை 50 ரன்களுக்கு மேல் எடுத்துள்ளார். இவருக்கு முன் விராட் கோலி (2016) மற்றும் டேவிட் வார்னர் (2016 மற்றும் 2019) ஆகியோர் மட்டுமே இந்தச் சாதனையை எட்டியிருந்த நிலையில், இவர் மூன்றாவது வீரர் ஆனார்.