IPL 2026: தமிழக வீரர் சாய் சுதர்சன் பிரம்மாண்ட சாதனை.. சதம் அடித்து ஜாம்பவான் ரெக்கார்டை உடைத்தார்

பெங்களூர்: குஜராத் டைட்டன்ஸ் அணியில் இடம் பெற்று ஆடி வரும் தமிழக வீரர் சாய் சுதர்சன் சதம் அடித்து, ஒரு வரலாற்றுச் சிறப்புமிக்க இன்னிங்ஸை ஆடி அசத்தினார். அதிரடி மன்னன் கிறிஸ் கெய்லின் பல ஆண்டுகால சாதனையை முறியடித்து, ஐபிஎல் வரலாற்றில் புதிய மைல்கல்லை எட்டினார் சாய் சுதர்சன், அவர் ராயல் சேலஞ்சர்ஸ் பெங்களூரு பந்துவீச்சை நாலாபுறமும் சிதறடித்த விதம் கிரிக்கெட் உலகையே வியப்பில் ஆழ்த்தியுள்ளது.

2026 ஐபிஎல் தொடரின் 34-வது லீக் போட்டியில் பெங்களூரு மற்றும் குஜராத் டைட்டன்ஸ் அணிகள் மோதின. இந்த சீசனில் இதுவரை பெரிய அளவில் ரன் குவிக்கவில்லை என்ற விமர்சனங்களைச் சந்தித்து வந்த சாய் சுதர்சன், இந்தப் போட்டியில் ருத்ரதாண்டவம் ஆடினார். வெறும் 57 பந்துகளில் அவர் சதம் விளாசி அசத்தினார். இது இந்த சீசனில் அவர் அடிக்கும் முதல் சதமாகும். அவருடன் களம் இறங்கிய கேப்டன் சுப்மன் கில் 24 பந்துகளில் 32 ரன்கள் எடுத்து ஆட்டமிழந்த போதிலும், சாய் சுதர்சன் இறுதிவரை அதிரடியைத் தொடர்ந்தார்.

இந்த ஜோடி முதல் விக்கெட்டுக்கு 128 ரன்கள் சேர்த்தது. இது பெங்களூரு அணிக்கு எதிராக குஜராத் அணி எடுத்த அதிகபட்ச பார்ட்னர்ஷிப் ஆகும். ஐபிஎல் வரலாற்றில் கில் - சாய் சுதர்சன் ஜோடி 100 ரன்களுக்கு மேல் பார்ட்னர்ஷிப் அமைப்பது இது 5-வது முறையாகும். இதன் மூலம் வார்னர் - தவான் ஜோடிக்கு (6 முறை) அடுத்தபடியாக இரண்டாவது இடத்தை இந்த இளம் ஜோடி பிடித்துள்ளது. ஒட்டுமொத்தமாக 8 முறை சத பார்ட்னர்ஷிப் அமைத்து, கோலி - டிவில்லியர்ஸ் (10), கோலி - கெய்ல் (9) ஜோடிகளுக்கு அடுத்தபடியாக மூன்றாவது இடத்திற்கு முன்னேறியுள்ளனர்.

இந்தப் போட்டியின் போது சாய் சுதர்சன் ஐபிஎல் அரங்கில் தனது 2000 ரன்களைக் கடந்தார். வெறும் 47 இன்னிங்ஸ்களில் இந்த இலக்கை எட்டியதன் மூலம், கிறிஸ் கெய்ல் (48 இன்னிங்ஸ்) வைத்திருந்த உலக சாதனையை முறியடித்து, ஐபிஎல் வரலாற்றில் அதிவேகமாக 2000 ரன்களைக் கடந்த வீரர் என்ற புதிய சரித்திரத்தைப் படைத்தார். இந்திய அளவில் 1361 பந்துகளில் இந்த மைல்கல்லை எட்டி, அபிஷேக் சர்மா, வீரேந்திர ஷேவாக் போன்ற ஜாம்பவான்கள் வரிசையில் இணைந்தார்.

ஆட்டத்தின் தொடக்கத்திலேயே ஆக்ரோஷத்தைக் காட்டிய சாய் சுதர்சன், பவர்பிளே ஓவர்களில் மட்டும் 29 பந்துகளை எதிர்கொண்டு 46 ரன்கள் குவித்தார். இது குஜராத் அணிக்காக பவர்பிளே ஓவர்களில் அடிக்கப்பட்ட மூன்றாவது அதிகபட்ச ரன்களாகும். சின்னசாமி மைதானத்தில் உள்ளூர் வீரர் கோலியின் சாதனைகளுக்கு மத்தியில், தமிழக வீரர் சாய் சுதர்சனின் இந்த அசுரவேக சாதனை மற்றும் அதிரடி சதம் பெங்களூரு ரசிகர்களையும் வியப்பில் ஆழ்த்தியுள்ளது. சாய் சுதர்சனின் இந்த இன்னிங்ஸ் குஜராத் அணிக்கு ஒரு வலுவான ஸ்கோரை எட்ட உதவியது.