IPL 2026: சிஎஸ்கே அணியின் கேப்டனான சஞ்சு சாம்சன் வருவார்.. அஸ்வின் கருத்து

சென்னை: சஞ்சு சாம்சன் எதிர்காலத்தில் சிஎஸ்கே கேப்டனாவார் என முன்னாள் இந்திய மற்றும் சிஎஸ்கே சுழற்பந்து வீச்சாளர் ரவிச்சந்திரன் அஸ்வின்,கணித்துள்ளார். ஐபிஎல் 2026 சீசனுக்காக ராஜஸ்தான் ராயல்ஸ் அணியிலிருந்து சிஎஸ்கேவுக்கு டிரேட் செய்யப்பட்ட சாம்சன், யாரையும் பின்பற்றாமல், தனக்கென ஒரு தனித்துவமான தலைமைத்துவப் பாணியை உருவாக்க வேண்டும் என்றும் அஸ்வின் வலியுறுத்தினார்.

சிஎஸ்கேவுக்காக அவர் விளையாடிய 5 இன்னிங்ஸ்களில், ஒரு சதம் உட்பட 185 ரன்கள் எடுத்துள்ளார். அவரது பேட்டிங் சராசரி 46.25 மற்றும் ஸ்ட்ரைக் ரேட் 172.89 ஆக உள்ளது. இது குறித்து பேசிய அஸ்வின், "சாம்சன் சிஎஸ்கேவை ஒரு கட்டத்தில் வழிநடத்துவார் என நான் பார்க்கிறேன். எப்போது என்று தெரியவில்லை, ஆனால் அது நடக்கும். நாம் ஒப்புக்கொண்டாலும் இல்லாவிட்டாலும், பல விஷயங்கள் கதைகளுடன் தொடர்புடையவை.

ஆனால் சஞ்சு யாருடைய இடத்தையும் நிரப்ப நான் விரும்பவில்லை. யாருடைய மரபுகளையும் நீங்கள் பின்பற்ற வேண்டியதில்லை. அவருக்கு சொந்தமான தனித்துவமான பாணி உள்ளது, அதில் அவரது முத்திரையை நான் பார்க்க விரும்புகிறேன்."

சிஎஸ்கே முகாமில் இணைவதற்கு முன், சாம்சன் 2021 முதல் 2025 வரை ராஜஸ்தான் ராயல்ஸ் அணியின் கேப்டனாக 67 போட்டிகளுக்கு தலைமை தாங்கினார். அவரது தலைமையில், ராஜஸ்தான் அணி 33 வெற்றிகளையும், 32 தோல்விகளையும் பதிவு செய்தது. ஒரு போட்டி டை ஆனது, மற்றொரு போட்டி முடிவின்றி முடிந்தது.

சாம்சனின் தலைமைப் பண்புகளை அஸ்வின் வெகுவாகப் பாராட்டினார். 2022 முதல் 2024 ஆம் ஆண்டு வரை அஸ்வின், சாம்சன் தலைமையில் ஆர்ஆர் அணிக்காக விளையாடியவர். இது குறித்து பேசிய அஸ்வின், "அவர் ஒரு நல்ல மனநிலையில் இருப்பதால், நல்ல முடிவுகளை எடுக்கிறார். அவருக்கு சிறந்த நாட்களும், சாதாரணமாக நாட்களும் இருந்தன."

"ஆனால் சஞ்சு செய்யும் ஒரு விஷயம், பல தலைவர்களிடம் நான் பார்க்காதது, அவர் கருத்துக்களை ஏற்றுக்கொள்வார். இரண்டாவது அவர் நல்லொழுக்கம் உடையவர். அவரிடம் மனிதநேயத் தொடர்பு உண்டு. வீரர்களுடன் தனிப்பட்ட உரையாடல்களை அவர் மேற்கொள்ள முடியும்."

இந்த ஆண்டு தொடக்கத்தில் இந்தியாவில் நடைபெற்ற டி20 உலகக் கோப்பையை இந்தியா வென்றபோது, சாம்சன் தொடரின் சிறந்த வீரர் விருதை வென்றார். ஐபிஎல் போட்டிகளில், அவர் 182 போட்டிகளில் பங்கேற்று 31.33 சராசரி மற்றும் 140.08 ஸ்ட்ரைக் ரேட்டுடன் மொத்தம் 4,889 ரன்கள் குவித்து, நான்கு சதங்கள் மற்றும் 26 அரை சதங்களை அடித்துள்ளார்.