IPL 2026: கேகேஆர் ஸ்டார் வீரர் வருண் சக்கரவர்த்தி காயம்.. ஆர்சிபி போட்டியில் பங்கேற்பது சந்தேகம்

ராய்ப்பூர்: கொல்கத்தா நைட் ரைடர்ஸ் சுழற்பந்து வீச்சாளர் வருண் சக்கரவர்த்தி, ஆர்சிபி அணிக்கு எதிரான முக்கிய போட்டியில் விளையாடுவது சந்தேகமாகி உள்ளது. சமீபத்தில் டெல்லி கேபிடல்ஸ் அணிக்கு எதிரான வெற்றியின்போதே தமிழக வீரர் வருண் சக்கரவர்த்திக்கு காயம் ஏற்பட்டது.

டெல்லியில் நடந்த போட்டிக்குப் பிறகு வருண் சக்கரவர்த்தி ஊன்றுகோல் உடன் காணப்பட்டார். இது அவரது பங்கேற்பு குறித்துசந்தேகங்களை எழுப்பியது. அவரது காலில் காயம் தீவிரமடைந்துள்ளது. சன்ரைசர்ஸ் ஹைதராபாத் அணிக்கு எதிரான வெற்றியின்போதுதான் அவருக்கு முதன்முதலில் காயம் ஏற்பட்டதோடு, டிசி அணிக்கு எதிரான பந்துவீச்சின் முடிவிலும் அவர் நொண்டியடித்தார்.

கேகேஆர் உதவிப் பயிற்சியாளர் ஷேன் வாட்சன், வருண் சக்கரவர்த்தி கண்காணிக்கப்படுவதாகவும், நாளைய போட்டிக்குக் கிடைப்பது சந்தேகமே எனவும் தெரிவித்தார். "வருண் சக்கரவர்த்தி தற்போது கண்காணிக்கப்பட்டு வருகிறார். அவர் மிகுந்த வேதனையுடன் இருக்கிறார். கடந்த இரு போட்டிகளிலும் வலியுடன் அற்புதமாகப் பந்து வீசினார்," என வாட்சன் கூறினார்.

"இந்த சீசனில் அவர் எப்படித் தொடங்கி சிறப்பாக முடித்தார் என்பது ஆச்சரியம். அவரை நாங்கள் கண்காணிக்கிறோம். நாளைய போட்டிக்குக் கிடைப்பார் என நம்புகிறோம், ஆனால் இன்னும் உறுதியாகத் தெரியவில்லை," என்று போட்டிக்கு முந்தைய செய்தியாளர் சந்திப்பில் (இந்தியா டுடே வழியாக) வாட்சன் மேலும் கூறினார்.

10 ஆட்டங்களில் 9 புள்ளிகளுடன் எட்டாவது இடத்தில் உள்ள கேகேஆர் அணி, இக்கட்டத்தில்தோல்வியை ஏற்க முடியாது. மூன்று முறை சாம்பியனான இவ்வணி, முதல் ஆறு ஆட்டங்களில் வெற்றியின்றி பின்னர் தொடர்ச்சியாக நான்கு வெற்றிகளைப் பதிவு செய்தது. இந்த நான்கு வெற்றிகளில் வருண் சக்கரவர்த்தி எட்டு விக்கெட்டுகளை வீழ்த்தினார்.

விரல் காயம் காரணமாக சக்கரவர்த்தி, பஞ்சாப் கிங்ஸ் மற்றும் லக்னோ சூப்பர் ஜெயண்ட்ஸ் அணிகளுக்கு எதிரான போட்டிகளைத் தவறவிட்டார். பின்னர் சென்னை சூப்பர் கிங்ஸ் (சிஎஸ்கே) அணிக்கு எதிரான ஆட்டத்தில் அணிக்குத் திரும்பினார்.முதல் பாதியில் கேகேஆர் தோல்விப் பாதையில் இருந்தபோது சக்கரவர்த்தி இரண்டு விக்கெட்டுகளை மட்டுமே எடுத்தார். பின்னர், ராஜஸ்தான் ராயல்ஸ் மற்றும் சன்ரைசர்ஸ் ஹைதராபாத் அணிகளுக்கு எதிராக எட்டு விக்கெட்டுகளை வீழ்த்தி தனது ஆட்டத் திறனையே தலைகீழாக மாற்றினார்.