IPL 2026: மெகா சேஸிங்.. சரித்திரம் படைத்த விராட் கோலி.. கொல்கத்தாவை வீழ்த்தி ஆர்சிபி அபார வெற்றி

ராய்ப்பூர்: 2026 ஐபிஎல் தொடரில் கொல்கத்தா நைட் ரைடர்ஸ் அணிக்கு எதிரான போட்டியில் ராயல் சேலஞ்சர்ஸ் பெங்களூரு அணியின் மூத்த வீரர் விராட் கோலி சதம் விளாசி புதிய சரித்திரம் படைத்துள்ளார். அவரது அதிரடியால் கொல்கத்தா நைட் ரைடர்ஸ் அணியை 6 விக்கெட் வித்தியாசத்தில் வீழ்த்தி பெங்களூரு அணி அபார வெற்றி பெற்றது. முதலில் பேட்டிங் செய்த கொல்கத்தா அணி 20 ஓவர்களில் 4 விக்கெட் இழப்பிற்கு 192 ரன்கள் குவித்தது. அதிகபட்சமாக அங்கிரிஷ் ரகுவன்ஷி 71 ரன்களும், அதிரடி மன்னன் ரிங்கு சிங் 49 ரன்களும் எடுத்தனர்.

பின்னர் 193 ரன்கள் என்ற கடினமான இலக்கை துரத்திய பெங்களூரு அணிக்கு தொடக்க வீரர் விராட் கோலி இடியாய் இறங்கினார். ஆரம்பம் முதலே கொல்கத்தா பந்துவீச்சை நாலாபுறமும் சிதறடித்த அவர் 60 பந்துகளில் 11 பவுண்டரி, 3 சிக்சர்களுடன் ஆட்டமிழக்காமல் 105 ரன்கள் குவித்து வெற்றிக்கு வித்திட்டார். அவருக்கு துணையாக ஆடிய தேவ்தத் படிக்கல் 39 ரன்கள் சேர்த்தார். முடிவில் பெங்களூரு அணி 19.1 ஓவர்களில் 4 விக்கெட் இழப்பிற்கு 194 ரன்கள் எடுத்து அபார வெற்றி பெற்றது.

இந்த மிரட்டலான சதத்தின் மூலம் ஐபிஎல் வரலாற்றில் தனது 9வது சதத்தையும், ஒட்டுமொத்த டி20 கிரிக்கெட்டில் தனது 10வது சதத்தையும் பதிவு செய்து விராட் கோலி புதிய உலக சாதனை படைத்துள்ளார். மேலும், டி20 போட்டிகளில் ஒட்டுமொத்தமாக 14000 ரன்கள் என்ற இமாலய மைல்கல்லை எட்டினார்.

இந்தப் போட்டியில் சதம் அடித்து கடைசி வரை ஆட்டமிழக்காமல் இருந்த விராட் கோலி ஆட்டநாயகன் விருதை வென்றார். இது விராட் கோலி வெல்லும் 21வது ஐபிஎல் ஆட்டநாயகன் விருது ஆகும். இதன் மூலம் அதிக முறை ஆட்டநாயகன் விருது வென்ற வீரர்கள் பட்டியலில் ரோஹித் சர்மாவுடன் முதல் இடத்தை பகிர்ந்து கொண்டார் கோலி. அவரது இந்த வரலாற்றுச் சாதனையால் பெங்களூரு ரசிகர்கள் மகிழ்ச்சியில் உள்ளனர். பெங்களூரு அணி இந்தப் போட்டியில் வென்றதன் மூலம் 2026 புள்ளிப் பட்டியலில் முதல் இடத்தை பிடித்தது.