“வைபவ் சூர்யவன்ஷியால் உனக்கு பிரச்சனை.. உடனே RR அணியை விட்டு வெளியேறு” ஜெய்ஸ்வாலுக்கு ராயுடு அட்வைஸ்

ஜெய்ப்பூர்: 2026 ஐபிஎல் தொடரில் ராஜஸ்தான் ராயல்ஸ் அணியின் இளம் வீரர் வைபவ் சூர்யவன்ஷியின் அசுர வளர்ச்சியால், அந்த அணியின் மற்றொரு தொடக்க வீரரான யஷஸ்வி ஜெய்ஸ்வால் உடனடியாக அணியை விட்டு வெளியேற வேண்டும் என்றும் முன்னாள் வீரர் அம்பதி ராயுடு அதிரடியாக அறிவுரை கூறி இருக்கிறார்.

இந்த ஆண்டு ஐபிஎல் தொடரில் 15 போட்டிகளில் விளையாடியுள்ள 15 வயது சிறுவன் வைபவ் சூர்யவன்ஷி 680 ரன்களுக்கு மேல் குவித்து அனைவரது கவனத்தையும் ஈர்த்துள்ளார். ஆனால், அதே அணியில் விளையாடும் அனுபவம் வாய்ந்த ஜெய்ஸ்வால் 426 ரன்கள் மட்டுமே எடுத்து, வைபவ்வின் அதிரடி ஆட்டத்தால் ஒட்டுமொத்தமாக மறைக்கப்பட்டுவிட்டார். இந்திய அணிக்காக 55 போட்டிகளில் விளையாடிய ஒரு வீரருக்கு, இன்னும் சர்வதேச போட்டிகளில் கூட அறிமுகமாகாத ஒரு சிறுவனால் அங்கீகாரம் கிடைக்காமல் போவது வருத்தமளிப்பதாக ராயுடு கூறியுள்ளார்.

இது குறித்து அம்பதி ராயுடு கூறுகையில், "ஜெய்ஸ்வால் தனது அணியை மாற்ற வேண்டிய நேரம் இது. அவர் ஒரு தனித்துவமான நட்சத்திரம். ஒவ்வொரு முறையும் மற்றொரு வீரரால் தனது திறமை மறைக்கப்படுவதை அவர் அனுமதிக்கக் கூடாது. மற்றொரு முனையில் இருக்கும் வீரருடன் போட்டி போடாமல், சுதந்திரமாக விளையாடும் சூழல் அவருக்குத் தேவை. அப்போதுதான் அவரால் தனி ஆளாகப் போட்டிகளை வென்று கொடுக்க முடியும். தற்போது வைபவ் உடன் ஒப்பிடப்படுவதால் ஜெய்ஸ்வால் தனது தன்னம்பிக்கையை இழந்து வருவதாக அஸ்வினும் குறிப்பிட்டுள்ளார். எனவே, அவர் தனது திறமைக்குத் தகுந்த அங்கீகாரம் கிடைக்கும் இடத்திற்குச் செல்ல வேண்டும்" என்றார்.

ஜெய்ஸ்வால் அடுத்ததாக மும்பை இந்தியன்ஸ் அணியில் இணைவதே சரியாக இருக்கும் என ராயுடு கூறி இருக்கிறார். ரோஹித் சர்மாவின் ஐபிஎல் பயணம் முடிவை நெருங்கி வரும் நிலையில், மும்பை உள்ளூர் கிரிக்கெட்டில் ரஞ்சி கோப்பை மற்றும் விஜய் ஹசாரே தொடர்களில் மும்பை அணிக்காகச் சிறப்பாக விளையாடிய அனுபவம் கொண்ட ஜெய்ஸ்வாலுக்கு, மும்பை இந்தியன்ஸ் அணி ஒரு சிறந்த மேடையாக அமையும் என ராயுடு சுட்டிக் காட்டி இருக்கிறார்.

சிஎஸ்கே பயிற்சியாளராக ராகுல் டிராவிட் என பரவும் தகவல்.. காசி விஸ்வநாதன் அதிரடி விளக்கம்

2020 முதல் ராஜஸ்தான் அணியின் முக்கிய வீரராக விளங்கி வரும் ஜெய்ஸ்வால், தற்போது வைபவ் சூர்யவன்ஷியின் வருகையால் பின்னுக்குத் தள்ளப்பட்டிருப்பது கிரிக்கெட் வட்டாரத்தில் பேசுபொருள் ஆகி உள்ளது. ராயுடுவின் இந்த ஆலோசனையை ஏற்று ஜெய்ஸ்வால் அணியை மாற்றுவாரா? என்று பார்க்கலாம்.