7வது ஐ.பி.எல்: ராஞ்சியில் கொல்கத்தாவை வீழ்த்தியது சென்னை அணி!

அதிரடி தொடக்கம்

சென்னையின் வெய்ன் சுமித்தும், பிரன்டன் மெக்கல்லமும் வழக்கம் போல் அதிரடியாக சென்னை அணியின் இன்னிங்சை தொடங்கினர். வெய்ன் சுமித் 16 ரன்களில் ஷகிப் அல்-ஹசனின் சுழலில் எல்.பி.டபிள்யூ. அவுட் ஆனார்.

ரெய்னா 31 ரன்கள்

அடுத்து மெக்கல்லத்துடன், சுரேஷ் ரெய்னா ஜோடி சேர்ந்தார். ஈரப்பதம் காரணமாக பேட் செய்வதில் சிரமம் ஏற்பட்ட போதிலும் இருவரும் ஸ்கோரை முடிந்த வரை வேகமாக உயர்த்தினர். அணியின் ஸ்கோர் 90 ரன்களை தொட்ட போது, ரெய்னா 31 ரன்களில் கேட்ச் கொடுத்து அவுட் ஆனார்.

மெக்கல்லம் 56 ரன்கள்.

இதைத் தொடர்ந்து உள்ளூர் நாயகன் டோணி ஆட வந்தார். இதனிடையே இந்த தொடரில் 3-வது அரைசதத்தை பூர்த்தி செய்த பிரன்டன் மெக்கல்லம் 56 ரன்களில் அவுட் ஆனார்.

3 விக்கெட்டுக்கு 148 ரன்கள்..

அதன் பின்னர் டோணியுடன் ரவீந்திர ஜடேஜா ஆட இணைந்தார், இருவரும் தலா ஒரு சிக்சரை பறக்க விட்டு ரசிகர்களை மகிழ்ச்சிப்படுத்தினர் 17 ஓவர்களில் சென்னை அணி 3 விக்கெட் இழப்புக்கு 148 ரன்கள் சேர்த்தது. டோணி 22 ரன்களுடனும் ஜடேஜா 17 ரன்களுடனும் களத்தில் நின்றனர்.

தடுமாறிய கொல்கத்தா

பின்னர் 149 ரன்கள் இலக்கை நோக்கி கொல்கத்தா அணி விளையாடியது. ஈஸ்வர் பாண்டே வீசிய 2-வது ஓவரில் 3 பவுண்டரி விரட்டி அமர்க்களப்படுத்திய கொல்கத்தாவின் உற்சாகம் நீண்ட நேரம் நீடிக்கவில்லை. கேப்டன் கவுதம் கம்பீர் தேவையில்லாமல் ரன்-அவுட் ஆக, வீழ்ச்சி ஆரம்பமானது.

சென்னை அணி வெற்றி

இதன் பின்னர் சென்னை சுழற்பந்து வீச்சாளர்கள், கொல்கத்தா பேட்ஸ்மேன்களை திணறடித்தனர். கொல்கத்தா அணியால் நிர்ணயிக்கப்பட்ட 17 ஓவர்களில் 9 விக்கெட்டுக்கு 114 ரன்களே எடுக்க முடிந்தது. இதன் மூலம் 34 ரன்கள் வித்தியாசத்தில் சென்னை அணி அபார வெற்றி பெற்றது.

5-வது வெற்றி

6-வது ஆட்டத்தில் விளையாடிய சென்னை அணி தொடர்ச்சியாக பெற்ற 5-வது வெற்றி இதுவாகும். அதே சமயம் 6-வது ஆட்டத்தில் ஆடிய கொல்கத்தாவுக்கு இது 4-வது தோல்வியாகும்.