IPL Auction 2026: அதிக விலைக்கு செல்லக்கூடிய அன்கேப்டு இந்திய விக்கெட் கீப்பர் பேட்ஸ்மேன்கள் யார்?

மும்பை: ஐபிஎல் 2026 ஏலம் குறித்த எதிர்பார்ப்பு தற்போது உச்சத்தை எட்டியுள்ளது. அபுதாபியில் டிசம்பர் 16 அன்று நடைபெறவுள்ள இந்த ஏலத்திற்காக, மொத்தமாக 1,390 வீரர்கள் பதிவு செய்திருந்தனர். டிசம்பர் 9 அன்று, பிசிசிஐ 350 வீரர்களைக் கொண்ட இறுதிப் பட்டியலை வெளியிட்டது. இதில் 240 இந்தியர்களும், 110 வெளிநாட்டு வீரர்களும் அடங்குவர்.

இறுதிப் பட்டியலில் இடம்பெற்றுள்ள வீரர்களில், 224 அன்கேப்டு இந்திய வீரர்கள் உள்ளனர். மொத்தம் 77 இடங்களுக்காக அணிகள் போட்டியிடும், இதில் வெளிநாட்டு வீரர்களுக்காக 31 இடங்கள் ஒதுக்கப்பட்டுள்ளன. அதிகபட்ச அடிப்படை விலை ₹2 கோடி நிர்ணயிக்கப்பட்டுள்ளது. இந்த பிரிவில் 40 வீரர்கள் உள்ளனர்.

இந்த ஏலத்தில் அன்கேப்டு இந்திய விக்கெட் கீப்பர் பேட்ஸ்மேன்கள் பலர் கவனத்தை ஈர்ப்பார்கள் என்று எதிர்பார்க்கப்படுகிறது. ஐபிஎல் 2026 ஏலத்தில் கவனிக்கப்பட வேண்டிய ஐந்து அறிமுகமில்லாத இந்திய விக்கெட் கீப்பர்கள் இவர்கள்தான்.

1 ரிக்கி பூய்

ஆந்திரப் பிரதேசத்தைச் சேர்ந்த ரிக்கி பூய் இந்தப் பட்டியலில் முதல் வீரராக உள்ளார். 29 வயதான இவர் தற்போது 2025-26 சையது முஷ்டாக் அலி டிராபியில் ஏழு இன்னிங்ஸ்களில் 192 ரன்கள் குவித்து, 38.40 சராசரி மற்றும் 131.50 ஸ்ட்ரைக் ரேட்டுடன் உள்ளார். அதிகபட்சமாக 48 ரன்கள் எடுத்து சிறப்பான ஃபார்மில் இருக்கிறார்.

வலது கை பேட்ஸ்மேனான பூய் தனது அடிப்படை விலையாக ₹30 லட்சத்தை நிர்ணயித்துள்ளார். இவர் இதற்குமுன் நான்கு ஐபிஎல் போட்டிகளில் விளையாடியிருந்தாலும், வெறும் 10 ரன்கள் மட்டுமே எடுத்து பெரிய தாக்கத்தை ஏற்படுத்தவில்லை.மொத்தமாக, பூய் 78 டி20 போட்டிகளில் விளையாடி, 34.15 சராசரி மற்றும் 142.51 ஸ்ட்ரைக் ரேட்டுடன் 1,981 ரன்கள் குவித்துள்ளார். இதில் 10 அரைசதங்களும், இரண்டு சதங்களும் அடங்கும்.

2 துஷார் ரகேஜா

இந்தப் பட்டியலில் அடுத்ததாக இடம்பெற்றிருப்பவர் தமிழக வீரர் துஷார் ரகேஜா. ரிக்கி பூயைப் போலவே, 25 வயதான இவரும் ₹30 லட்சத்தை அடிப்படை விலையாக நிர்ணயித்துள்ளார். இடது கை பேட்ஸ்மேன் ஆன இவர், சமீபத்தில் 2025 சையது முஷ்டாக் அலி டிராபியில் தமிழக அணிக்காக விளையாடினார். இதில் ஏழு இன்னிங்ஸ்களில் ஒரு அரைசதம் உட்பட 151 ரன்கள் எடுத்தார்.

சையது முஷ்டாக் அலி டிராபியில் 21.57 சராசரி மற்றும் 164.13 ஸ்ட்ரைக் ரேட்டுடன் உள்ளார். இந்த ஆண்டின் தொடக்கத்தில் நடைபெற்ற தமிழ்நாடு பிரீமியர் லீக்2025 தொடரில் ரன் குவிப்பில் முன்னணியில் இருந்தார். ஐட்ரீம் திருப்பூர் தமிழன்ஸ் அணிக்காக, ஒன்பது இன்னிங்ஸ்களில் ஐந்து அரைசதங்களுடன் 488 ரன்களை, 61.00 சராசரியிலும், 185.55 ஸ்ட்ரைக் ரேட்டிலும் குவித்தார்.

3 கார்த்திக் சர்மா

ஐபிஎல் 2026 ஏலத்தில் கவனிக்கப்பட வேண்டிய மற்றொரு வீரர் ராஜஸ்தான் விக்கெட் கீப்பர் பேட்ஸ்மேன் கார்த்திக் சர்மா. 19 வயதான இந்த வீரர் சையது முஷ்டாக் அலி தொடரில் விளையாடி வருகிறார். ஐந்து இன்னிங்ஸ்களில் 133 ரன்களை, 26.60 சராசரி மற்றும் 160.24 ஸ்ட்ரைக் ரேட்டுடன் எடுத்துள்ளார். மேலும், ஐபிஎல் 2025 தொடரின்போது, சென்னை சூப்பர் கிங்ஸ் அணியின் சில பயிற்சி முகாம்களில் பங்கேற்றும் இருக்கிறார்.மொத்தமாக, கார்த்திக் 12 டி20 போட்டிகளில் விளையாடி, இரண்டு அரைசதங்களுடன் 334 ரன்கள் குவித்துள்ளார். இவரது சராசரி 30.36 மற்றும் ஸ்ட்ரைக் ரேட் 162.92. ஆகும்.

4 ரவி சிங்

ரயில்வே அணியைச் சேர்ந்த விக்கெட் கீப்பர் பேட்ஸ்மேன் ரவி சிங், ஐபிஎல் 2026 ஏலத்தில் கவனிக்கப்பட வேண்டிய மற்றொரு வீரர். 24 வயதான இவர் 2025-26 சையது முஷ்டாக் அலி டிராபியில் ஏழு இன்னிங்ஸ்களில் 218 ரன்களை, 36.33 சராசரி மற்றும் 173.01 ஸ்ட்ரைக் ரேட்டுடன், ஒரு அரைசதத்துடன் அடித்துள்ளார். மொத்தமாக, ரவி 10 டி20 போட்டிகளில் விளையாடி, ஒன்பது இன்னிங்ஸ்களில் இரண்டு அரைசதங்களுடன் 295 ரன்கள் குவித்துள்ளார். இவரது சராசரி 42.14 மற்றும் ஸ்ட்ரைக் ரேட் 174.55. ஆகும்.

5 யஷ்வர்தன் தலால்

இந்தப் பட்டியலில் கடைசி வீரர் ஹரியானாவைச் சேர்ந்த விக்கெட் கீப்பர் பேட்ஸ்மேன் யஷ்வர்தன் தலால் ஆவார். இவரது அடிப்படை விலை ₹30 லட்சம் என நிர்ணயிக்கப்பட்டுள்ளது. 20 வயதான இவர் 2025-26 சையது முஷ்டாக் அலி டிராபியில் மிரட்டுகிறார். ஏழு இன்னிங்ஸ்களில் நான்கு அரைசதங்களுடன் 319 ரன்களை, 63.80 சராசரி மற்றும் 143.04 ஸ்ட்ரைக் ரேட்டுடன் குவித்துள்ளார்.