ஐபிஎல் ஏலம் 2026: சிஎஸ்கே அணி பதிரனாவை வாங்க கூடாது.. பதிலுக்கு இவரை வாங்கலாம்- ஸ்ரீகாந்த்

மும்பை: ஐபிஎல் 2026 ஏலத்தில் இலங்கை வேகப்பந்து வீச்சாளர் மதீஷா பதிரனாவை சிஎஸ்கே அணி மீண்டும் வாங்க வேண்டாம் என்று முன்னாள் கிரிக்கெட் வீரர் ஸ்ரீகாந்த் அறிவுறுத்தியுள்ளார். சிஎஸ்கேவின் பலவீனமான வேகப்பந்து வீச்சை வலுப்படுத்த, தென் ஆப்பிரிக்காவின் அன்ரிச் நார்ஜே சிறந்த தேர்வாக இருப்பார் என்றும் அவர் கூறியுள்ளார்.

பதிரனா, ஐபிஎல் 2025 சீசனில் 12 போட்டிகளில் வெறும் 13 விக்கெட்டுகள் எடுத்து, 10-க்கு மேல் எக்கானமி விகிதத்தைக் கொண்டிருந்தார். இருப்பினும், 2022 முதல் டெத் ஓவர்களில் சிஎஸ்கேவின் முக்கிய பந்துவீச்சாளராக இருந்தார். 2023-ல் சிஎஸ்கே தங்களின் ஐந்தாவது ஐபிஎல் பட்டத்தை வெல்வதிலும் அவர் முக்கியப் பங்காற்றினார்.

இது குறித்து பேசிய ஸ்ரீகாந்த், "நான் பதிரனாவிடம் மீண்டும் செல்ல மாட்டேன். அவருக்கும் நார்ஜேவுக்கும் இடையே, நான் நார்ஜேவை தேர்ந்தெடுப்பேன். ஆனால் நார்ஜேவும் திறமையாக செதுக்கப்பட வேண்டியவர். சில கிரிக்கெட் வீரர்களுக்கு கேப்டன் மிக முக்கியம். அதிக வேகத்தில் பந்துவீசும் திறனால், நார்ஜே சிஎஸ்கேவுக்கு நல்ல பொருத்தமாக இருப்பார்."

"ஜேக்கப் டஃபி போன்ற வெளிநாட்டு வேகப்பந்து வீச்சாளரையும் சிஎஸ்கே முயற்சிக்க வேண்டும். கலீல் அஹமது மூத்த பந்துவீச்சாளர். நாதன் எல்லிஸ் நல்லவர் என்றாலும், 14 போட்டிகளுக்கும் அவர் நம்பகமானவர் அல்ல." என்று ஸ்ரீகாந்த் கூறினார்.

இதனை தொடர்ந்து பேசிய பத்ரிநாத், "பதிரனாவும் நார்ஜேவும் தலா குறைந்தபட்சம் 10 கோடி ரூபாய்க்குச் செல்வார்கள்." என கணித்துள்ளார். ஐபிஎல் 2026 ஏலத்தில் மதீஷா பதிரனா மற்றும் அன்ரிச் நார்ஜே அதிக தேவை உள்ள வேகப்பந்து வீச்சாளர்களாக இருப்பார்கள் என அவர் கூறியுள்ளார்.

பத்ரிநாத் தனது முன்னாள் அணியான சிஎஸ்கே நார்ஜேவுக்கு தீவிரமாக ஏலம் கேட்கும் என்றும், கொல்கத்தா நைட் ரைடர்ஸ் (கேகேஆர்) பதிரனாவை வாங்கும் என்றும் கூறினார். மேலும் அவர்,"பதிரனாவும் நார்ஜேவும் தலா குறைந்தபட்சம் 10 கோடி ரூபாய்க்குச் செல்வார்கள். பிற அணிகளிடம் நிதி குறைவாக இருப்பதால், ஒருவர் சிஎஸ்கேவிற்கும் மற்றொருவர் கேகேஆருக்கும் செல்வார்கள்."

தொடர்ந்து பேசிய அவர், "இவ்விரு அணிகளுக்கும் பிளேயிங் லெவனில் ஒரு டெத் பவுலர் தேவை. சிஎஸ்கே பதிரனாவை விடுவித்திருப்பதால், வேறு திட்டங்களுடன் இருக்க வேண்டும். எனவே, நார்ஜே அல்லது கோட்ஸீயை அவர்கள் நாடலாம்," என்று சுட்டிக்காட்டினார்.

நார்ஜேவுக்கு கேகேஆர் அணிக்காக ஐபிஎல் 2025 சீசன் சிறப்பாக அமையவில்லை. இரண்டு போட்டிகளில் ஒரே விக்கெட் எடுத்து, 83 சராசரி மற்றும் கிட்டத்தட்ட 12 எக்கானமியைப் பதிவு செய்தார். ஐபிஎல் 2026 ஏலத்திற்கு, கேகேஆர் ₹64.30 கோடியுடனும், சிஎஸ்கே ₹43.40 கோடியுடனும் அதிக நிதி இருப்புகளுடன் களமிறங்க உள்ளன.