IPL Auction 2026: அதிக விலைக்கு செல்லக்கூடிய 5 இந்திய அன்கேப்டு பேட்ஸ்மேன்கள் யார்?

மும்பை: ஐபிஎல் 2026 ஏலம் வரும் டிசம்பர் 16ஆம் தேதி செவ்வாய்க்கிழமை அன்று அபுதாபியில் நடைபெறவுள்ளது. இதில், பத்து அணிகளும் தங்கள் அணிக்கு வலுவான வீரர்களைத் தேர்வு செய்யத் திட்டமிட்டுள்ளன. இந்திய மற்றும் வெளிநாட்டு நட்சத்திர வீரர்களின் மீது பெரும்பாலான கவனம் இருந்தாலும், கடந்த சில ஐபிஎல் சீசன்கள் இளம் இந்திய கிரிக்கெட் வீரர்களுக்கான முக்கியத்துவம் அதிகரித்துள்ளது.

அன்கேப்டு வீரர்கள் என்றால் சர்வதேச போட்டிகளில் அறிமுகம் ஆகாதவர்கள் என்று தான் அர்த்தம். ஆனால், ஐபிஎல் விதிப்படி, சர்வதேச கிரிக்கெட்டில் கடைசியாக விளையாடி 5 ஆண்டுகள் ஆனவர்களை அன்கேப்டு வீரர்கள் என்று கருதலாம். அதன் அடிப்படையில் தோனி முதல் விஜய் சங்கர் வரை அன்கேப்டு வீரர்கள் தான். ஆனால், நாம் பார்க்கப்போவது உண்மையில் சர்வதேச போட்டியில் அறிமுகம் ஆகாதவர்களை பற்றியது.

இந்த நிலையில், 2025 சையது முஷ்டாக் அலி டிராபி போட்டியில் சிறப்பாக விளையாடிய வீரர்கள் மீது ஐபிஎல் அணிகளின் கவனம் பெற்றுள்ளது. இந்த ஏலத்தில் அதிக விலைக்கு செல்லக்கூடிய 5 அன்கேப்டு வீரர்கள் வீரர்கள் யார்? என்பது குறித்து தற்போது காணலாம்.

1. குணால் சந்தேலா

உத்தராகண்ட் அணியின் கேப்டன் குணால் சந்தேலா, 2025-26 SMAT போட்டியில் தனது அபார பேட்டிங்கால் அனைவரையும் கவர்ந்துள்ளார். 31 வயதான இவர், ஏழு போட்டிகளில் 350 ரன்கள் குவித்து, தற்போது அதிக ரன்கள் எடுத்தோர் பட்டியலில் முன்னணியில் உள்ளார். இவரது சராசரி 50 மற்றும் ஸ்ட்ரைக் ரேட் 150-க்கும் மேல் உள்ளது. ஐபிஎல் அணிகளுக்கு 3-வது இடத்தில் களமிறங்கும் இந்திய பேட்ஸ்மேன்கள் பெரும்பாலும் வெற்றியைத் தேடித் தருவார்கள் என்பதால், சந்தேலா பல அணிகளுக்கு ஒரு சிறந்த தேர்வாக அமையலாம்.

வலதுகை பேட்ஸ்மேனான சந்தேலாவின் அடிப்படை விலை ₹30 லட்சம் ஆகும். ஆனால், இந்த ஃபார்மில் உள்ள வீரருக்காக அணிகள் பெரிய தொகையைச் செலவிடத் தயங்காது. SMAT போட்டியில் உத்தராகண்ட் அணி ஏழு போட்டிகளில் இரண்டு வெற்றிகளை மட்டுமே பெற்று தடுமாறினாலும், சந்தேலா ஏழு இன்னிங்ஸ்களில் நான்கு அரை சதங்களுடன் தனது பேட்டிங்கில் அற்புதமான ரன்கள் குவித்துள்ளார். இதனால், ஐபிஎல் 2026 ஏலத்தில் அவர் ஒரு நல்ல வாய்ப்பைப் பெறுவார் என்பது நிச்சயம்.

2. அன்மோல்பிரீத் சிங்

பஞ்சாப் பேட்ஸ்மேனான அன்மோல்பிரீத் சிங், மும்பை இந்தியன்ஸ் மற்றும் சன்ரைசர்ஸ் ஹைதராபாத் அணிகளால் ஏற்கனவே தேர்வு செய்யப்பட்டு இருக்கிறார். 27 வயதான இவர் இதுவரை ஒன்பது ஐபிஎல் போட்டிகளில் மட்டுமே விளையாடி, 16-க்கும் குறைவான சராசரி மற்றும் 121-க்கும் குறைவான ஸ்ட்ரைக் ரேட் கொண்டுள்ளார். ஆனால், நடப்பு SMAT தொடரில் அவரது ஆட்டம், அவர் தனது உச்சகட்ட ஃபார்மை நெருங்குவதைக் காட்டுகிறது.

வலதுகை பேட்ஸ்மேனான அன்மோல்பிரீத், பஞ்சாப் அணிக்காக 3-வது இடத்தில் களமிறங்கி ஏழு போட்டிகளில் 241 ரன்கள் குவித்துள்ளார். அவரது சராசரி கிட்டத்தட்ட 34 ஆகவும், ஸ்ட்ரைக் ரேட் 172.14 ஆகவும் உள்ளது. ஏழு போட்டிகளில் ஐந்து வெற்றிகளுடன் குரூப் C பிரிவில் பஞ்சாப் முதலிடம் பெற அன்மோல்பிரீத் முக்கியப் பங்காற்றியுள்ளார். கடந்த சீசனில் அன்கேப்டு வீரர்களுக்கு முக்கியத்துவம் அளித்த PBKS, அவரை 2026 ஏலத்தில் வாங்குவதில் ஆர்வம் காட்டலாம்.

3. அன்கிட் குமார்

ஹரியானா கேப்டன் அன்கிட் குமார், நடப்பு SMAT போட்டியில் பேட்டிங்கில் கலக்கியுள்ளார். 28 வயதான இவர் கேப்டன்சி மற்றும் பேட்டிங் இரண்டையும் மிகத் திறமையாகக் கையாண்டுள்ளார். அன்கிட் ஏழு போட்டிகளில் 242 ரன்கள் குவித்து, 40-க்கும் அதிகமான சராசரி மற்றும் 162.41 ஸ்ட்ரைக் ரேட்டைப் பதிவு செய்துள்ளார். அவரது சிறப்பான ஆட்டம் ஹரியானா அணி குரூப் C-யில் இரண்டாவது இடத்தைப் பிடித்து சூப்பர் லீக்கிற்கு முன்னேற உதவியது.

4. மனன் வோரா

மனன் வோரா, உள்ளூர் போட்டிகளில் தொடர்ந்து ரன்களைக் குவித்து வருகிறார். 2025-26 SMAT தொடரில் சண்டிகர் அணிக்காக விளையாடிய இவர், ஏழு போட்டிகளில் 278 ரன்கள் அடித்துள்ளார். இவரது சராசரி 46.33 மற்றும் ஸ்ட்ரைக் ரேட் 135.60 ஆகும். 2013-ல் அறிமுகமாகி நான்கு அணிகளுக்காக விளையாடிய வோரா, ஐபிஎல்-ல் அனுபவம் வாய்ந்தவர்.

56 ஐபிஎல் போட்டிகளுக்குப் பிறகும், கடந்த சில சீசன்களில் அவரது ஃபார்மில் ஏற்பட்ட சரிவை கண்டது. இருப்பினும், நடப்பு SMAT சீசனில் அவர் மீண்டும் ஃபார்ம்க்கு திரும்பியுள்ளதார். இவருடைய அனுபவம் நிச்சயம் ஐபிஎல் அணிகளுக்கு பெரும் பங்கு வகிக்கலாம். இல்லையேனில் கூடுதல் தொடக்க வீரராக கூட அணியில் இருக்கலாம்.

5. பானு பனியா

பரோடா அணியின் பானு பனியாவின் கீழ்வரிசை அதிரடி ஆட்டம் ஐபிஎல் 2026 ஏலத்தில் பலரது கவனத்தை ஈர்க்கக்கூடும். பெரும்பாலும் 6-வது மற்றும் 7-வது இடத்தில் களமிறங்கும் 29 வயதான இவர், கடைசி ஓவர்களில் பெரிய ஷாட்கள் அடிக்கும் அற்புதமான திறமையைக் கொண்டுள்ளார். நடப்பு SMAT தொடரில் ஏழு போட்டிகளில் ஒருமுறை மட்டுமே அவுட்டாகி, 112 சராசரி மற்றும் 180-க்கும் அதிகமான ஸ்ட்ரைக் ரேட்டைப் பதிவு செய்துள்ளார்.

அடுத்த சுற்றுக்குத் தகுதிபெறும் வாய்ப்பை மயிரிழையில் இழந்தாலும், பனியாவின் கீழ்வரிசை பங்களிப்பால் பரோடா அணி ஏழு போட்டிகளில் நான்கில் வெற்றி பெற்றது. இந்த வகையான பங்களிப்பைச் செய்யும் வீரர்கள் அரிது என்பதால், பரோடா பேட்ஸ்மேன் 2026 ஏலத்தில் பல கோடிக்கு செல்லலாம்.