எதிர்பார்க்காத ட்விஸ்ட்.. ராஜஸ்தான் ராயல்ஸ் உடன் டீல் போட்ட ரவீந்திர ஜடேஜா.. கேப்டனாகும் வாய்ப்பு

சென்னை: ஐபிஎல் வரலாற்றின் மிகப்பெரிய வீரர்கள் பரிமாற்றமாக கருதப்படும் சென்னை சூப்பர் கிங்ஸ் (CSK) மற்றும் ராஜஸ்தான் ராயல்ஸ் (RR) அணிகளுக்கு இடையேயான ஒப்பந்தத்தில், மேலும் ஒரு ஆச்சரிய தகவல் வெளியாகியுள்ளது. இந்த ஒப்பந்தத்தின்படி, சென்னை அணியிலிருந்து ராஜஸ்தான் ராயல்ஸ் அணிக்குச் செல்லும் நட்சத்திர ஆல்-ரவுண்டர் ரவீந்திர ஜடேஜா, அந்த அணியின் புதிய கேப்டனாக நியமிக்கப்பட உள்ளதாக கூறப்படுகிறது.

மறுபுறம், ராஜஸ்தான் அணியிலிருந்து சென்னை சூப்பர் கிங்ஸ் அணிக்கு வரும் சஞ்சு சாம்சன், உடனடியாக கேப்டன் பொறுப்பை ஏற்க மாட்டார் என்றும் கூறப்படுகிறது. இந்த வீரர்கள் பரிமாற்ற ஒப்பந்தத்தின் ஒரு முக்கிய நிபந்தனையாக, ரவீந்திர ஜடேஜா ராஜஸ்தான் ராயல்ஸ் அணி நிர்வாகத்திடம் கேப்டன் பதவியைக் கேட்டுப் பெற்றுள்ளார்.

தனது ஐபிஎல் பயணத்தின் இறுதிக் கட்டத்தில், கேப்டன் என்ற கூடுதல் பொறுப்புடன் விளையாட 37 வயதான ஜடேஜா விரும்புவதே இதற்குக் காரணம் எனக் கூறப்படுகிறது. கடந்த சீசனில் சஞ்சு சாம்சன் காயமடைந்தபோது, ரியான் பராக் அணியை வழிநடத்தினார். இருப்பினும், அணியின் கட்டமைப்பை பேணவும், அனுபவமிக்க ஒரு புதிய முகத்தைக் கொண்டு வரவும் ராஜஸ்தான் அணி நிர்வாகம் ஜடேஜாவின் தலைமைக்கு ஒப்புக்கொண்டுள்ளது.

சென்னை சூப்பர் கிங்ஸ் அணியைப் பொறுத்தவரை, எம்.எஸ். தோனியின் எதிர்காலம் நிச்சயமற்றதாக இருப்பதால், அவரது தெளிவான வாரிசாக சஞ்சு சாம்சன் பார்க்கப்படுகிறார். இருப்பினும், இந்த சீசனில் ருதுராஜ் கெய்க்வாட்டிடம் இருந்து கேப்டன் பதவியைப் பறிக்கும் திட்டம் அணி நிர்வாகத்திற்கு இல்லை. கடந்த சீசனில் ருதுராஜ் காயத்தால் பெரும்பாலான போட்டிகளில் பங்கேற்கவில்லை என்பது குறிப்பிடத்தக்கது. எனவே, சாம்சன் ஒரு வீரராகவே அணியில் இணைவார்.

இந்த ஒப்பந்தம் மூலம் ரவீந்திர ஜடேஜாவின் கிரிக்கெட் பயணம் ஒரு முழு வட்டத்தை நிறைவு செய்கிறது. அவர் தனது ஐபிஎல் பயணத்தை ராஜஸ்தான் ராயல்ஸ் அணியில்தான் தொடங்கினார். முதல் இரண்டு சீசன்களில் அந்த அணிக்காக விளையாடிய அவர், 2010-ல் மும்பை இந்தியன்ஸ் அணியுடன் விதிகளை மீறிப் பேச்சுவார்த்தை நடத்தியதாகக் கூறி ஓராண்டு தடை செய்யப்பட்டார். பின்னர் 2012-ல் சென்னை அணிக்கு வந்து, அணியின் இதிகாச வீரராக உயர்ந்தார்.

சிஎஸ்கே அணிக்காக 186 போட்டிகளில் 143 விக்கெட்டுகளையும், 2198 ரன்களையும் குவித்துள்ள ஜடேஜா, 2018, 2021 மற்றும் 2023-ம் ஆண்டுகளில் கோப்பையை வென்ற அணியில் முக்கியப் பங்காற்றினார்.

ஜடேஜா ஐபிஎல் அணியை வழிநடத்துவது இது முதல் முறையல்ல. 2022-ல் தோனி கேப்டன் பதவியிலிருந்து விலகியபோது, ஜடேஜா சிஎஸ்கே கேப்டனாக நியமிக்கப்பட்டார். ஆனால், அந்த சீசனில் முதல் 8 போட்டிகளில் 6-ல் அணி தோல்வியடைந்ததால், அவரது தனிப்பட்ட ஃபார்மும் பாதிக்கப்பட்டது. இதனால், அவர் கேப்டன் பதவியிலிருந்து விலக, தோனி மீண்டும் பொறுப்பேற்றார்.

மறுபுறம், சஞ்சு சாம்சனின் வருகை சிஎஸ்கே-வின் டாப்-ஆர்டர் பேட்டிங்கை வலுப்படுத்தும் என்ற எதிர்பார்ப்பு உள்ளது. ராஜஸ்தான் அணிக்காக அவர் கோப்பையை வெல்லாவிட்டாலும், அந்த அணியின் நீண்ட கால கேப்டனாக 67 போட்டிகளில் 33 வெற்றி, 33 தோல்வி பெற்றுள்ளார். மேலும், ராஜஸ்தான் அணிக்காக 155 போட்டிகளில் 4219 ரன்கள் குவித்து அதிக ரன்கள் குவித்த வீரராக சாதனை படைத்துள்ளார். அனைத்து அணிகளும் தங்களது தக்கவைப்பு வீரர்களின் பட்டியலை நவம்பர் 15-ம் தேதிக்குள் சமர்ப்பிக்க வேண்டும் என்பது குறிப்பிடத்தக்கது.