டீமாக ஆடினோம்.. கோப்பையைத் தட்டிப் பறித்தோம்.. வார்னர் பெருமிதம்

கோஹ்லிக்குப் பாராட்டு

போட்டிக்குப் பின்னர் அவர் பேசும்போது பெங்களூரு கேப்டன் விராத் கோஹ்லியையும் பாராட்டத் தவறவில்லை. அவர் மாபெரும் கேப்டன் என்றும் கோஹ்லிக்கு வார்னர் புகழாரம் சூட்டினார்.

குழுவாக ஆடியதால் கிடைத்த வெற்றி

வார்னர் மேலும் கூறுகையில், நாங்கள் குழுவாக முயற்சித்தோம். அட்டகாசமான முயற்சி இது. இதுவே எங்களது சாதனைக்குக் காரணம். மிகப் பெரிய, கடினமான பயணமாக இது இருந்தது. ஆனால் கடைசியில் கோப்பையைக் கையில் ஏந்தியபோது அனைத்தும் மறந்து விட்டது.

அருமையான அணி

ஹைதராபாத் அணி அருமையான அணி, இந்த அணிக்குத் தலைமை தாங்கியதும், வீரர்களிடமிருந்து கிடைத்த ஆதரவையும் மறக்க முடியாது. நல்லதொரு அனுபவம் கிடைத்தது.

மிகப் பெரிய ஸ்கோர்

200 ரன்களை நாங்கள் எடுக்க முடிந்தது. ஆனால் அதை சேஸ் செய்யக் கூடிய திறமை படைத்தது கோஹ்லி படை. கோஹ்லி ஒரு அருமையான மாபெரும் கேப்டன். அவரிடமிருந்து அவ்வளவு சீக்கிரம் நமது வாய்ப்பைத் தட்டிப் பறித்து விட முடியாது. இந்த சீசனில் அவர் பிரமாதமாக ஆடியுள்ளார்.

பெங்களூரில் வைத்து வென்றது சிறப்பு

அதுவும் பெங்களூரில் வைத்து வெல்வது என்பது மிகக் கடினமானது. நாங்கள் "அண்டர்டாக்ஸ்" ஆகவே இந்தப் போட்டியில் நுழைந்தோம். இருப்பினும் சிறப்பாக பேட் செய்தோம், சிறப்பாக பவுல் செய்தோம், சிறப்பாக பீல்டிங் செய்தோம்.

கொஞ்சம் பீரடிச்சுக்கட்டுமா!

இன்னும் 24 மணி நேரத்தில் நான் கரீபியனுக்கு (மேற்கு இந்தியத் தீவுகளுக்கு எதிரான தொடரில் பங்கேற்க) நான் கிளம்பி விடுவேன். இப்போது கொஞ்சம் பீர் சாப்பிடும் நேரம் என்று சிரித்தபடி பேட்டியை முடித்தார் வார்னர்.