136 ஆண்டு சாதனை.. இங்கிலாந்தின் புதிய கேப்டன் ஜேக்கப் பெத்தேல் மாபெரும் ரெக்கார்டு!

லண்டன்: இங்கிலாந்து கிரிக்கெட் அணியின் இளம் கேப்டன் என்ற 136 ஆண்டு கால சாதனையை முறியடித்து, 21 வயதான ஆல்-ரவுண்டர் ஜேக்கப் பெத்தேல் புதிய வரலாறு படைத்துள்ளார். அயர்லாந்துக்கு எதிரான டி20 தொடரில் இங்கிலாந்து அணியை அவர் வழிநடத்த உள்ளார்.

இங்கிலாந்து கிரிக்கெட் வாரியம், அயர்லாந்துக்கு எதிரான மூன்று போட்டிகள் கொண்ட டி20 தொடருக்கான கேப்டனாக ஜேக்கப் பெத்தேலை நியமித்துள்ளது. இதன் மூலம், இங்கிலாந்து ஆண்கள் கிரிக்கெட் அணியை வழிநடத்தும் மிக இளம் வயது கேப்டன் என்ற பெருமையை அவர் பெறுகிறார். அடுத்த மாதம் டப்ளினில் இந்தத் தொடர் நடைபெற உள்ளது.

இதற்கு முன்பு, 1889ஆம் ஆண்டு, மான்டி போடன் தனது 23 வயதில் தென்னாப்பிரிக்காவுக்கு எதிரான டெஸ்ட் போட்டியில் இங்கிலாந்து அணியின் கேப்டனாக செயல்பட்டதே சாதனையாக இருந்தது. அப்போது கேப்டன் ஆப்ரே ஸ்மித்துக்கு காய்ச்சல் ஏற்பட்டதால், போடன் கேப்டன் பொறுப்பை ஏற்றார். தற்போது, 136 ஆண்டுகளுக்குப் பிறகு அந்த சாதனையை ஜேக்கப் பெத்தேல் முறியடித்துள்ளார்.

தென்னாப்பிரிக்காவுக்கு எதிரான ஒருநாள் மற்றும் டி20 தொடர்களில் ஹாரி புரூக் கேப்டனாக செயல்பட உள்ளதால், அயர்லாந்து தொடரில் அவருக்கு ஓய்வளிக்கப்பட்டுள்ளது. அவருடன் சில மூத்த வீரர்களுக்கும் ஓய்வு அளிக்கப்பட்டதால், ஜேக்கப் பெத்தேலுக்கு கேப்டன் பொறுப்பு வழங்கப்பட்டுள்ளது.

பார்படாஸில் பிறந்த ஜேக்கப் பெத்தேல், ஒரு திறமையான இடது கை பேட்ஸ்மேன் மற்றும் இடது கை ஆர்த்தடாக்ஸ் பந்துவீச்சாளர் ஆவார். தனது 21 வயதிலேயே இங்கிலாந்து அணிக்காக மூன்று வடிவ கிரிக்கெட்டிலும் அறிமுகமாகிவிட்டார். கடந்த ஆண்டு சர்வதேச கிரிக்கெட்டில் அறிமுகமான இவர், மிகக் குறுகிய காலத்தில் தனது சிறப்பான ஆட்டத்தால் அனைவரின் கவனத்தையும் ஈர்த்துள்ளார்.

இங்கிலாந்து தேர்வாளர் லூக் ரைட் இதுபற்றி கூறுகையில், "ஜேக்கப் பெத்தேல் இங்கிலாந்து அணியில் இணைந்ததிலிருந்து தனது தலைமைப் பண்புகளால் அனைவரையும் கவர்ந்துள்ளார். அயர்லாந்துக்கு எதிரான இந்தத் தொடர், சர்வதேச அளவில் அவரது தலைமைப் பண்புகளை மேலும் வளர்த்துக்கொள்ள ஒரு சிறந்த வாய்ப்பாக அமையும்" என்று தெரிவித்தார்.

இந்த வரலாற்று சிறப்புமிக்க தருணம், இளம் வீரரான ஜேக்கப் பெத்தேலின் கிரிக்கெட் வாழ்க்கையில் ஒரு முக்கிய மைல்கல்லாக அமையும் என எதிர்பார்க்கப்படுகிறது. ஏற்கனவே, அவருக்கு இங்கிலாந்தில் பெரும் ரசிகர் கூட்டம் உள்ளது. அவர் இப்போது தான் சர்வதேச கிரிக்கெட்டில் நுழைந்துள்ளார். அதற்குள் பெரும் ரசிகர் கூட்டமும், கேப்டன் பதவியும் கிடைத்துள்ளது.