14 பந்தில் 50 ரன்கள், 10 ஃபோர், 9 சிக்ஸ்.. ஆஸ்திரேலிய வரலாற்றை மாற்றி எழுதிய ஜேக் பிரேசர் மெக்குர்க்

அடிலெய்டு: ஆஸ்திரேலிய கிரிக்கெட் அணியின் இளம் அதிரடி பேட்டர் ஜேக் பிரேசர் மெக்குர்க், ஆஸ்திரேலிய நாட்டின் கிரிக்கெட் வரலாற்றில் மிகக் குறைந்த பந்துகளில் அரைசதம் விளாசிய வீரர் என்ற புதிய சாதனையைப் படைத்துள்ளார். அடிலெய்டில் ஒருநாள் கோப்பை உள்ளூர் கிரிக்கெட் தொடரின் 10-வது லீக் போட்டி நடைபெற்றது. அதில் ஜேக் பிரேசர் மெக்குர்க் குயின்ஸ்லாந்து அணிக்கு எதிராக தெற்கு ஆஸ்திரேலியா அணிக்காக தொடக்க வீரராகக் களம் இறங்கினார். அவர், வெறும் 14 பந்துகளிலேயே 50 ரன்களை எட்டி இமாலய சாதனை படைத்தார்.

ஜேக் பிரேசர் மெக்குர்க் இந்த ஆட்டத்தில் எதிரணியின் பந்துவீச்சை நாலாபுறமும் துவம்சம் செய்தார். 63 பந்துகளில் 10 பவுண்டரிகள் மற்றும் 9 சிக்சர்களுடன் 122 ரன்களைக் குவித்து அதிரடி ஆட்டம் ஆடினார். மெக்கன்சி ஹார்வியுடன் தொடக்க விக்கெட்டுக்கு 129 ரன்கள் சேர்த்த மெக்குர்க், அடுத்து கேப்டன் நாதன் மெக்ஸ்வீனியுடன் 65 ரன்கள் சேர்த்தார். நாதன் மெக்ஸ்வீனியும் சதம் விளாசினார். மெக்குர்க்கின் இந்த அதிரடியால் தெற்கு ஆஸ்திரேலிய அணி 50 ஓவர்களில் 7 விக்கெட் இழப்புக்கு 397 ரன்கள் என்ற மெகா ஸ்கோரை எட்டியது.

இதற்கு முன்பு ஆஸ்திரேலிய வீரர் ஒருவரால் அடிக்கப்பட்ட அதிவேக அரைசத சாதனையாக டேனியல் கிறிஸ்டியன் அடித்த 15 பந்து அரைசதமே நீடித்தது. 2020 பிக் பாஷ் லீக் தொடரில் ஹோபர்ட்டில் கிறிஸ்டியன் இதை நிகழ்த்தியிருந்தார். மேலும் மெக்குர்க் ஏற்கனவே டெல்லி கேபிடல்ஸ் அணிக்காக 2024 ஐபிஎல்லில் 2 முறை 15 பந்துகளில் அரைசதம் அடித்துள்ளார்.

தற்போது 14 பந்துகளிலேயே 50 ரன்களைத் தொட்டதன் மூலம் முதல்தர, ஒருநாள், டி20 என அனைத்துப் பிரிவுகளையும் சேர்த்து ஆஸ்திரேலிய வரலாற்றிலேயே அதிவேகமாக அரைசதம் கடந்த வீரர் என்ற புதிய அத்தியாயத்தை மெக்குர்க் படைத்துள்ளார்.

நியூசிலாந்து டெஸ்ட் தொடரில் ஜெயிப்பதற்காக சுப்மன் கில் செய்த செயல்.. சச்சின், கோலி கூட செய்யலை

லிஸ்ட் ஏ ஒருநாள் கிரிக்கெட்டில் அதிவேக அரைசதம் விளாசிய உலக சாதனை இந்தியாவின் 15 வயது இளம் வீரர் வைபவ் சூர்யவன்ஷி வசமே உள்ளது. கடந்த ஜூன் மாதம் இந்தியா ஏ அணிக்காக விளையாடிய அவர் வெறும் 11 பந்துகளிலேயே 50 ரன்களைக் கடந்து சாதனை படைத்திருந்தார். சர்வதேச அளவில் நேபாளத்தின் தீபேந்திர சிங் ஐரி 9 பந்துகளில் அரைசதம் அடித்து முதலிடத்தில் உள்ளார். தற்போது மெக்குர்க் 14 பந்துகளில் அடித்து ஒட்டுமொத்த ஆஸ்திரேலிய கிரிக்கெட் உலகையும் அதிர வைத்துள்ளார்.