IND vs AUS: மாபெரும் ஜாம்பவான் சாதனையை சமன் செய்த பும்ரா.. 11வது முறையாக 5 விக்கெட் ரெக்கார்டு

IND vs AUS: ஆஸ்திரேலிய அணிக்கு எதிரான முதல் டெஸ்ட் போட்டியின் முதல் இன்னிங்ஸில் பும்ரா 5 விக்கெட்கள் வீழ்த்தினார். டெஸ்ட் போட்டிகளில் அவர் 11 வது முறையாக ஒரே இன்னிங்ஸில் ஐந்து விக்கெட் வீழ்த்தி உள்ளார். ஒரே இன்னிங்ஸில் 5 விக்கெட் வீழ்த்துவது டெஸ்ட் கிரிக்கெட்டில் முக்கிய சாதனையாக பார்க்கப்படுகிறது.

அந்த வகையில் 11 வது முறையாக 5 விக்கெட் வீழ்த்திய பும்ரா பல்வேறு சாதனைகளை உடைத்து இருக்கிறார். அவர் இதுவரை தென்னாப்பிரிக்கா, ஆஸ்திரேலியா, இங்கிலாந்து, வெஸ்ட் இண்டீஸ் மற்றும் இந்தியா என ஐந்து நாடுகளில் மொத்தமாக 11 முறை ஒரே இன்னிங்ஸில் 5 விக்கெட்களை வீழ்த்தி இருக்கிறார்.

இதில் தென்னாப்பிரிக்காவில் மூன்று முறையும், ஆஸ்திரேலியா மற்றும் இங்கிலாந்து நாடுகளில் தலா இரண்டு முறைகளும் இந்த சாதனையை செய்து இருக்கிறார். இதன் மூலம் தென்னாப்பிரிக்கா, இங்கிலாந்து, நியூசிலாந்து மற்றும் ஆஸ்திரேலியா ஆகிய நான்கு எஸ் இ என் ஏ (SENA) நாடுகளில் மட்டும் ஏழு முறை ஒரே இன்னிங்ஸில் 5 விக்கெட் வீழ்த்திய சாதனையை நிகழ்த்தி இருக்கிறார்.

இதன் மூலம், இந்த நான்கு நாடுகளில் அதிக முறை 5 விக்கெட் சாதனை படைத்த இந்திய பந்துவீச்சாளர்களில் முதல் இடத்தை கபில் தேவுடன் பகிர்ந்து கொண்டு உள்ளார். இந்திய அணியின் முன்னாள் கேப்டனான கபில் தேவ் இந்த நான்கு நாடுகளில் 62 இன்னிங்ஸ்களில் ஏழு முறை 5 விக்கெட் சாதனையை நிகழ்த்தி இருக்கிறார்.

தற்போது பும்ரா 51 இன்னிங்ஸ்களில் அவரது சாதனையை சமன் செய்து இருக்கிறார். இந்த பட்டியலில் ஜாகிர் கான் மற்றும் சந்திரசேகர் ஆகியோர் ஆறு முறை இந்த நான்கு நாடுகளில் 5 விக்கெட் சாதனைகளை நிகழ்த்தி அடுத்த இடத்தில் உள்ளனர். இது மட்டும் இன்றி ஆஸ்திரேலிய மண்ணில் பும்ரா மிகச் சிறந்த ரெக்கார்டை வைத்துள்ளார். அவர் ஆஸ்திரேலியாவில் 19.18 என்ற பவுலிங் சராசரியை வைத்துள்ளார். மேலும், எட்டு போட்டிகளில் 37 விக்கெட்களை வீழ்த்தி உள்ளார்.