குஜராத்தில் பிறந்து நியூசிலாந்துக்காக ஆடிய வீரர்.. கிரிக்கெட்டிலிருந்து ஓய்வை அறிவித்தார் ஜீத் ராவல்

ஆக்லாந்து: இந்தியாவில் பிறந்து நியூசிலாந்து தேசிய அணிக்காக 24 டெஸ்ட் போட்டிகளில் விளையாடிய மூத்த தொடக்க ஆட்டக்காரர் ஜீத் ராவல், அனைத்து வகையான தொழில்முறை கிரிக்கெட்டிலிருந்தும் தனது ஓய்வை அதிகாரப்பூர்வமாக அறிவித்துள்ளார். அவருக்கு தற்போது 38 வயது ஆகிறது.

குஜராத் மாநிலம் அகமதாபாத்தில் பிறந்த ஜீத் ராவல், இந்திய முன்னாள் விக்கெட் கீப்பர் பார்த்திவ் படேல் படித்த அதே பள்ளியில் படித்தவர் என்பது குறிப்பிடத்தக்கது. பின்னர் இவரது குடும்பம் நியூசிலாந்து நாட்டிற்கு இடம் பெயர்ந்தது. கிரிக்கெட் விளையாட்டின் மீது கொண்ட தீவிர ஆர்வத்தால், அங்கு பள்ளிப் பருவத்தில் சக நியூசிலாந்து வீரர் அஜாஸ் படேலுடன் இணைந்து விளையாடிய இவர், தனது அசாத்திய திறமையால் நியூசிலாந்து தேசிய அணியில் இடம்பிடித்தார்.

நியூசிலாந்து அணிக்காக 2016 முதல் 2020 வரை 24 டெஸ்ட் போட்டிகளில் விளையாடிய ஜீத் ராவல், ஒரு சதம் உட்பட மொத்தம் 1143 ரன்கள் சேர்த்துள்ளார். பேட்டிங் மட்டுமின்றி பகுதிநேர பந்துவீச்சாளராக ஆஸ்திரேலிய கேப்டன் பாட் கம்மின்ஸ் விக்கெட்டை வீழ்த்தியது இவரது சர்வதேச கிரிக்கெட்டின் மறக்க முடியாத தருணமாக அமைந்தது.

உள்ளூர் முதல்தர கிரிக்கெட்டில் கொடிகட்டிப் பறந்த இவர் ஆக்லாந்து, சென்ட்ரல் ஸ்டாக்ஸ் மற்றும் நார்தர்ன் டிஸ்ட்ரிக்ட்ஸ் அணிகளுக்காக விளையாடியுள்ளார். மொத்தம் 164 முதல்தர போட்டிகளில் விளையாடி 24 சதங்கள், 50 அரைசதங்களுடன் 10432 ரன்களைக் குவித்து சாதனை படைத்துள்ளார்.

தனது ஓய்வு குறித்து பேசிய ஜீத் ராவல், "நியூசிலாந்து தேசிய அணிக்காக விளையாட வேண்டும் என்பது எனது தந்தையின் மிகப்பெரிய கனவாகும். அந்த லட்சியத்தை எட்டிப் பிடித்த பெருமையுடனும், முழு மன நிறைவுடனும் இந்த முடிவை எடுத்துள்ளேன்" என்று நெகிழ்ச்சியுடன் தெரிவித்துள்ளார்.

IND vs WI: பயிற்சியில் வைபவ் சூர்யவன்ஷி செய்த செயல்.. வாயடைத்துப் போன போலீசார்.. என்ன நடந்தது?

கடந்த 2025 டிசம்பரில் முதல்தர கிரிக்கெட்டில் 10000 ரன்களைக் கடந்த 30-வது நியூசிலாந்து வீரர் என்ற வரலாற்று மைல்கல்லையும் இவர் எட்டினார். நார்தர்ன் டிஸ்ட்ரிக்ட்ஸ் அணியின் கேப்டனாகச் செயல்பட்டு, 12 ஆண்டு கால இடைவெளிக்குப் பிறகு அந்த அணிக்கு ரஞ்சி போன்ற நியூசிலாந்தின் முதன்மை உள்ளூர் கோப்பையையும் வென்று தந்தார். ஜீத் ராவலின் ஓய்வு முடிவை அடுத்து, நியூசிலாந்து கிரிக்கெட் வாரியமும் சக வீரர்களும் அவருக்கு மனமார்ந்த வாழ்த்துகளைத் தெரிவித்து வருகின்றனர்.