“நான் 14,000 ரன்கள் குவித்ததற்கு ஒரு காரணம் இருக்கு”.. விமர்சகர்களுக்கு ஜோ ரூட் நெத்தியடி பதில்!

லண்டன்: இங்கிலாந்து கிரிக்கெட் அணியின் நட்சத்திர பேட்ஸ்மேன் ஜோ ரூட், சமீபகாலமாக எல்பிடபிள்யூ முறையில் அடிக்கடி ஆட்டமிழந்து வருவது குறித்து விமர்சனம் எழுந்துள்ளது. அதற்கு தனது பாணியில் தகுந்த பதிலடி கொடுத்துள்ளார். ஜோ ரூட் தனது கடைசி 10 டெஸ்ட் இன்னிங்ஸ்களில் 8 முறை எல்பிடபிள்யூ முறையில் ஆட்டமிழந்துள்ளார். அவர் டெஸ்ட் போட்டிகளில் தொடர்ந்து ரன் குவித்தாலும் ஆட்டமிழக்கும் முறை தான் விமர்சனத்தை ஏற்படுத்தி உள்ளது.

இதில் பாகிஸ்தானுக்கு எதிராக தற்போது நடைபெற்று வரும் டெஸ்ட் தொடரில் 3 முறையும், அதற்கு முன்னதாக நியூசிலாந்துக்கு எதிரான தொடரில் 6 முறையும் இதே முறையில் அவர் அவுட் ஆகியுள்ளார். இந்த தொடர் சரிவு குறித்து விமர்சனங்கள் எழுந்த நிலையில், டெஸ்ட் கிரிக்கெட்டில் 14,000 ரன்களைக் கடந்த உலகின் 2-வது வீரர் என்ற பெருமை பெற்ற ஜோ ரூட் இதற்கு நெத்தியடியாக பதிலளித்துள்ளார்.

பிபிசி ஊடகத்திற்கு அளித்த பேட்டியில் ஜோ ரூட் கூறுகையில், "நான் நீண்ட காலமாக கிரிக்கெட் விளையாடி வருகிறேன். எனது பேட்டிங்கில் உள்ள பலவீனங்களைக் கண்டறிந்து, அவற்றுக்குத் தீர்வு கண்டு மீண்டும் பலமாக மீள்வது எப்படி என்பது எனக்குத் தெரியும். நான் டெஸ்டில் 14,000 ரன்கள் எடுத்ததற்கும், கடந்த 15 ஆண்டுகளாக சர்வதேச கிரிக்கெட்டில் நீடிப்பதற்கும் ஒரு வலுவான காரணம் இருக்கிறது. இதனால் இந்த எல்பிடபிள்யூ பிரச்சினையைத் தற்காலிக பின்னடைவாகவே பார்க்கிறேன்" என்றார்.

மேலும் ஜோ ரூட் பேசுகையில், "தொடர்ந்து ஒரே முறையில் அவுட் ஆவது ஏமாற்றம் அளிக்கிறது. ஆனால், இதில் 4 விக்கெட்டுகள் 'அம்பயர்ஸ் கால்' மூலம் எனக்கு எதிராகச் சென்றுள்ளன. அத்துடன், நடப்பு தொடரில் பயன்படுத்தப்படும் புதிய 'டியூக்ஸ்' பந்துகளில் உள்ள பளபளப்புத் தன்மையால் பந்துகள் வழக்கத்தை விட அதிகமாக ஸ்விங் ஆகின்றன. இதனால் பேட்ஸ்மேன்கள் விளையாடுவது கடினமாக உள்ளது. நான் விரைவில் இதிலிருந்து மீண்டு வருவேன்" என்று நம்பிக்கையுடன் கூறினார்.

தற்போது இங்கிலாந்து டெஸ்ட் அணியின் கேப்டனாக இரண்டாவது முறையாக நியமிக்கப்பட்டு இருக்கும் ஜோ ரூட், அதில் முதல் இரண்டு போட்டிகளிலும் பாகிஸ்தான் அணிக்கு எதிராக பெரிய வெற்றிகளை பெற்றுக் கொடுத்துள்ளார்.