“ஸ்மித், வார்னருக்கு கொடுத்த தண்டனையால் உலகம் முழுவதும் ரிவர்ஸ் ஸ்விங்..”.. ஜஸ்டின் லாங்கர் ஆதங்கம்

சிட்னி: ஆஸ்திரேலிய கிரிக்கெட் அணியின் முன்னாள் தலைமைப் பயிற்சியாளர் ஜஸ்டின் லாங்கர், கடந்த 2018-ம் ஆண்டு நடந்த பந்து சேதப்படுத்திய சர்ச்சை குறித்து புதிய விவாதத்தைக் கிளப்பியுள்ளார். ஸ்டீவ் ஸ்மித், டேவிட் வார்னர் மற்றும் கேமரூன் பான்கிராஃப்ட் ஆகியோருக்கு வழங்கப்பட்ட மிகக் கடுமையான தண்டனை காரணமாக, சர்வதேச டெஸ்ட் கிரிக்கெட்டிலேயே ரிவர்ஸ் ஸ்விங் வித்தை முற்றிலுமாக அழிந்து போய்விட்டது என்று அவர் பகிரங்கமாகக் குற்றம் சாட்டியுள்ளார்.

தென்னாப்பிரிக்காவுக்கு எதிரான 2-வது டெஸ்ட் போட்டிக்கு முன்னதாகப் பேசிய ஜஸ்டின் லாங்கர், "ஸ்டீவ் ஸ்மித், வார்னர், பான்கிராஃப்ட் ஆகியோர் ஆஸ்திரேலிய அணிக்காக மட்டுமின்றி, ஒட்டுமொத்த உலக கிரிக்கெட் வீரர்களுக்காகவும் சேர்த்துதான் மிகப்பெரிய விலையைக் கொடுத்துள்ளனர். அந்த கேப் டவுன் சம்பவத்திற்குப் பிறகு சர்வதேசப் போட்டிகளில் பந்து ரிவர்ஸ் ஸ்விங் ஆவதை நீங்கள் கவனித்திருக்கிறீர்களா? பந்துவீச்சாளர்கள் பந்தைப் பராமரிக்கும் முறையே அந்தத் தண்டனைக்குப் பிறகு முற்றிலும் தலைகீழாக மாறிவிட்டது" என்று கூறினார்.

கடந்த 2018 மார்ச் 24 அன்று கேப் டவுனில் தென்னாப்பிரிக்காவுக்கு எதிரான 3-வது டெஸ்டில், பழைய பந்தை ரிவர்ஸ் ஸ்விங் செய்வதற்காக பான்கிராஃப்ட் மஞ்சள் நிற சாண்ட்பேப்பரால் தேய்த்தது கேமராவில் சிக்கியது. டேவிட் வார்னர் இதை திட்டமிட, கேப்டன் ஸ்மித் அதைத் தடுக்காமல் வேடிக்கை பார்த்தார் என்பதே முக்கிய குற்றச்சாட்டாக இருந்தது. ஆஸ்திரேலிய கிரிக்கெட்டுக்கு பெரும் தலைகுனிவை ஏற்படுத்திய இந்த விவகாரத்தில் மூவருக்கும் கடுமையான தடை விதிக்கப்பட்டது. அன்றிலிருந்து வீரர்கள் பந்தை கையாளும் நடைமுறைகளில் கடுமையான கட்டுப்பாடுகள் கொண்டுவரப்பட்டன.

"வைபவ் சூர்யவன்ஷிக்காக இந்த வீரரை பலிகடா ஆக்காதீங்க அதற்கு பதில்..".. ஆகாஷ் சோப்ரா மாஸ்டர் பிளான்

இதனிடையே, டர்பனில் நடந்த முதல் டெஸ்டில் ஆஸ்திரேலிய வேகப்பந்து வீச்சாளர் ஜோஷ் ஹேசில்வுட் தனது ரிவர்ஸ் ஸ்விங் மூலம் விக்கெட்டுகளை வீழ்த்தி மிரட்டினார். இதனால் நீண்ட நாள்களுக்குப் பிறகு ரிவர்ஸ் ஸ்விங் மீண்டும் கவனத்தை ஈர்த்துள்ளது. தென்னாப்பிரிக்க அணியின் முன்னாள் கேப்டன் பாப் டு பிளெசிஸ், "பேட்டர்களுக்கும் பந்துவீச்சாளர்களுக்கும் இடையே சமநிலையைக் கொண்டு வரும் ரிவர்ஸ் ஸ்விங், கிரிக்கெட்டின் மிக அழகான ஒரு அங்கம்" என குறிப்பிட்டார்.