KKR vs GT: கொல்கத்தா நைட் ரைடர்ஸ் - குஜராத் டைட்டன்ஸ் போட்டி.. வருண் சக்கரவர்த்தி கம்பேக்!

கொல்கத்தா: 2026 ஐபிஎல் கிரிக்கெட் தொடரின் 60-வது லீக் ஆட்டத்தில் கொல்கத்தா நைட் ரைடர்ஸ் மற்றும் குஜராத் டைட்டன்ஸ் அணிகள் மோதுகின்றன. கொல்கத்தாவின் புகழ்பெற்ற ஈடன் கார்டன் மைதானத்தில் நடைபெறும் இந்தப் போட்டியில், பிளே-ஆப் வாய்ப்பைத் தக்கவைக்க வேண்டிய கட்டாயத்தில் ஒரு அணியும், புள்ளிப்பட்டியலில் முதல் இரண்டு இடங்களை உறுதி செய்யத் துடிக்கும் மற்றொரு அணியும் களம் காண்பதால் ரசிகர்கள் மத்தியில் பெரும் எதிர்பார்ப்பு நிலவுகிறது.

இந்தப் போட்டியில் டாஸ் வென்ற குஜராத் டைட்டன்ஸ் அணியின் கேப்டன் சுப்மன் கில், முதலில் பந்துவீச்சைத் தேர்வு செய்துள்ளார். கொல்கத்தாவில் கடந்த 48 மணிநேரமாக மழை பெய்து வந்ததால், ஆடுகளத்தில் ஈரப்பதம் மற்றும் ஒட்டும் தன்மை காணப்படுகிறது. இதன் காரணமாகப் போட்டியின் இரண்டாவது பாதியில் பேட்டிங் செய்வது எளிதாக இருக்கும் என்பதைக் கணக்கில் கொண்டு கில் இந்த முடிவை எடுத்துள்ளார்.

குஜராத்தின் வெற்றிப் பயணம்

டாஸ் வென்ற பின் பேசிய சுப்மன் கில், "நாங்கள் முதலில் பந்துவீசத் தீர்மானித்துள்ளோம். மைதானத்தில் ஈரப்பதம் இருப்பதால் பந்துவீச்சாளர்களுக்குத் தொடக்கத்தில் சாதகமாக இருக்கும். கடந்த 5 போட்டிகளில் எங்களது பந்துவீச்சு சிறப்பாக அமைந்து எங்களுக்கு வெற்றிகளைத் தேடித் தந்துள்ளன. புள்ளிப்பட்டியலில் முதல் 2 இடங்களுக்குள் வருவதே எங்களது இலக்கு. அதற்காக அதே பலத்துடன் இன்றைய போட்டியிலும் விளையாடுவோம்," எனத் தெரிவித்தார். குஜராத் அணியில் எந்த மாற்றமும் செய்யப்படவில்லை.

கொல்கத்தா அணியின் நிலை

கொல்கத்தா நைட் ரைடர்ஸ் கேப்டன் அஜின்கியா ரஹானே பேசுகையில், "நாங்கள் அடுத்தடுத்த போட்டிகளை வெல்ல வேண்டிய கட்டாயத்தில் இருக்கிறோம். கடந்த 5 போட்டிகளில் நாங்கள் சிறப்பான கிரிக்கெட்டை விளையாடி வருகிறோம். இன்றைய போட்டியில் காயம் காரணமாக விலகியிருந்த வருண் சக்கரவர்த்தி மீண்டும் அணிக்குத் திரும்பியுள்ளார்," என்றார். பிளே-ஆப் கனவு நீடிக்க வேண்டுமானால் கொல்கத்தா இன்னும் 3 போட்டிகளில் வென்றாக வேண்டும்.

ஆடுகளம் எப்படி?

பிட்ச் ரிப்போர்ட் குறித்து முன்னாள் வீரர்கள் ஆரோன் பின்ச் மற்றும் இயான் மார்கன் கூறுகையில், ஆடுகளத்தில் ஓரளவு புற்கள் மற்றும் ஈரப்பதம் இருப்பதால் வேகப்பந்து வீச்சாளர்களுக்குத் தொடக்கத்தில் பந்து ஸ்விங் ஆகும். அதே சமயம் பவுன்ஸ் சீராக இருக்கும் என்பதால் பேட்ஸ்மேன்களும் ரன் குவிக்க வாய்ப்புள்ளது. 180 முதல் 190 ரன்கள் வரை எடுப்பது இங்கு ஒரு சவாலான ஸ்கோராக இருக்கும் எனத் தெரிவித்தனர்.

கொல்கத்தா நைட் ரைடர்ஸ்: அஜின்கியா ரஹானே (கேப்டன்), பின் ஆலன், அங்கிரிஷ் ரகுவன்ஷி, கேமரூன் கிரீன், மணீஷ் பாண்டே, ரிங்கு சிங், சுனில் நரைன், அனுகுல் ராய், வருண் சக்கரவர்த்தி, சௌரவ் துபே, கார்த்திக் தியாகி.

குஜராத் டைட்டன்ஸ்: சாய் சுதர்சன், சுப்மன் கில் (கேப்டன்), ஜோஸ் பட்லர், நிஷாந்த் சிந்து, வாஷிங்டன் சுந்தர், ஜேசன் ஹோல்டர், ரஷித் கான், அர்ஷத் கான், ககிசோ ரபாடா, சாய் கிஷோர், முகமது சிராஜ்.