KKR vs LSG: கடைசி பந்தில் முகமது ஷமி செய்த சம்பவம்.. உறைந்து போன ரிங்கு சிங், பிராவோ.. ஆனா ட்விஸ்ட்

லக்னோ: கொல்கத்தா நைட் ரைடர்ஸ் மற்றும் லக்னோ சூப்பர் ஜெயன்ட்ஸ் அணிகளுக்கு இடையேயான போட்டி, ஐபிஎல் வரலாற்றின் மிகச்சிறந்த திரில்லர் ஆட்டங்களில் ஒன்றாக மாறியது. தோல்வியின் விளிம்பில் இருந்த லக்னோ அணியை, ஒரு பந்துவீச்சாளரான முகமது ஷமி கடைசி பந்தில் சிக்சர் அடித்து மீட்டெடுத்த விதம் ரசிகர்களின் இதயத்துடிப்பை எகிறச் செய்தது. கொல்கத்தா ஆலோசகர் டிவைன் பிராவோ மற்றும் துணை கேப்டன் ரிங்கு சிங் ஆகியோரை அதிர்ச்சியில் உறைய வைத்த அந்த கடைசி ஓவர் பரபரப்புகளை விரிவாகப் பார்ப்போம்.

இந்த போட்டியில் முதலில் பேட்டிங் செய்த கொல்கத்தா அணி, ரிங்கு சிங்கின் அதிரடி 83 ரன்களால் 20 ஓவர்களில் 155 ரன்கள் எடுத்தது. கடினமான இலக்கை துரத்திய லக்னோ அணிக்கு கடைசி ஓவரில் வெற்றி பெற 17 ரன்கள் தேவைப்பட்டது. கைவசம் 3 விக்கெட்டுகள் மட்டுமே இருந்த நிலையில், களத்தில் ஹிம்மத் சிங் மற்றும் முகமது ஷமி இருந்தனர். ஒரு பந்துவீச்சாளரான ஷமியால் பெரிய அளவில் ரன் குவிக்க முடியாது என்பதால், கொல்கத்தா அணி எளிதாக வெற்றி பெற்றுவிடும் என்றே அனைவரும் நம்பினர்.

கொல்கத்தா தரப்பில் கடைசி ஓவரை கார்த்திக் தியாகி வீசினார். அந்த ஓவரின் முதல் 3 பந்துகளில் 9 ரன்கள் எடுக்கப்பட்ட நிலையில், ஓரளவு அதிரடியாக ஆடிக்கொண்டிருந்த ஹிம்மத் சிங் ஆட்டமிழந்தார். இதனால் ஆட்டம் கொல்கத்தா பக்கம் முழுமையாக சாய்ந்தது. 4-வது பந்தில் பிரின்ஸ் யாதவ் 1 ரன் எடுக்க, 5-வது பந்தை சந்தித்த முகமது ஷமி ரன் ஏதும் எடுக்கவில்லை. இப்போது கடைசி 1 பந்தில் 7 ரன்கள் எடுத்தால் வெற்றி, 6 ரன்கள் எடுத்தால் போட்டி 'டை' ஆகும் என்ற இக்கட்டான நிலை உருவானது.

யாரும் எதிர்பார்க்காத வகையில், கார்த்திக் தியாகி வீசிய அந்த கடைசி பந்தை முகமது ஷமி இமாலய சிக்சராக மாற்றினார். பந்து எல்லையைத் தாண்டியதும் மைதானமே கொண்டாட்டத்தில் மூழ்கியது. ஆனால், வெற்றி உறுதியென நினைத்திருந்த கொல்கத்தா ஆலோசகர் டிவைன் பிராவோ மற்றும் ரிங்கு சிங் ஆகியோர் இந்த அதிர்ச்சியில் இருந்து மீள முடியாமல் அப்படியே உறைந்து போனார்கள். ஷமியின் அந்த ஒரு சிக்சர் ஆட்டத்தின் போக்கையே மாற்றி போட்டியை சூப்பர் ஓவருக்கு கொண்டு சென்றது.

அடுத்து நடந்த சூப்பர் ஓவரில், அனுபவ வீரர் சுனில் நரேன் தனது திறமையை காட்டினார். அவரது பந்துவீச்சில் லக்னோ அணி அடுத்தடுத்து 2 விக்கெட்டுகளை இழந்து வெறும் 1 ரன் மட்டுமே எடுத்தது. பின்னர் 2 ரன்கள் எடுத்தால் வெற்றி என்ற இலக்குடன் களமிறங்கிய கொல்கத்தாவின் ரிங்கு சிங், முதல் பந்திலேயே பவுண்டரி விளாசி தனது அணிக்கு திரில் வெற்றியை தேடித்தந்தார். முகமது ஷமி அந்த கடைசி பந்தில் சிக்சர் அடிக்காமல் இருந்திருந்தால், கொல்கத்தா அணி சூப்பர் ஓவர் வரை செல்லாமலேயே எளிதாக வெற்றி பெற்றிருக்கும். எனினும், ஷமியின் அந்த சிக்சர் ரசிகர்களுக்கு ஒரு மறக்க முடியாத விருந்தாக அமைந்தது.