அந்த தம்பியை ஓரங்கட்டுங்க.. தோனியை டீம்ல சேருங்க.. இதெல்லாம் சகஜம்தான்.. முன்னாள் வீரர் அதிரடி!

கேஎல் ராகுல் விக்கெட் கீப்பர்

இந்திய டி20 மற்றும் ஒருநாள் அணியில் கேஎல் ராகுல் முதன்மை விக்கெட் கீப்பராக அறியப்படுகிறார். அவருக்கு முன் இளம் வீரர் ரிஷப் பண்ட் அணியில் விக்கெட் கீப்பராக செயல்பட்டு, தன் மோசமான செயல்பாடுகளால் விமர்சனத்துக்கு உள்ளானார்.

தோனி இல்லை

தோனி கடந்த 2019 உலகக்கோப்பை தொடருக்கு பின் இந்திய அணியில் இடம் பெறவில்லை. அவருக்கு இந்திய அணியில் வாய்ப்பு வழங்கப்படவில்லை என்றே கருதப்படுகிறது. இந்த நிலையில், அக்டோபர் மாதம் நடக்க இருந்தா டி20 உலகக்கோப்பை தொடரில் ஆட தோனி விரும்புவதாக ஒரு தகவல் வெளியானது.

ஐபிஎல் சந்தேகம்

அதற்கு தோனி தன் பார்மை நிரூபிக்க வேண்டும் என்றும், உடற்தகுதியை நிரூபிக்க வேண்டும் என்றும் கூறப்பட்டது. அதற்கு 2020 ஐபிஎல் தொடரை அவர் பயன்படுத்த எண்ணி இருந்ததாகவும் கூறப்பட்டது. ஆனால், இடையே கொரோனா வைரஸ் காரணமாக ஐபிஎல் தொடர் நடக்குமா? என்ற சந்தேகம் ஏற்பட்டுள்ளது.

மாற்று விக்கெட் கீப்பர்

இந்த நிலையில், ராகுல், தோனி பற்றி பேசி உள்ளார் முகமது கைப். "மக்கள் ராகுல் எதிர்காலத்தில் அணியின் முதன்மை விக்கெட் கீப்பராக இருப்பார் என எண்ணுகிறார்கள். ஆனால், நான் ராகுல் மாற்று விக்கெட் கீப்பராக இருக்க வேண்டும் என நினைக்கிறேன்" என்றார் கைப்.

காயம் ஏற்படும்

"முதன்மை விக்கெட் கீப்பர் காயம் அடைந்தால், அவர் அணியில் இல்லாவிட்டால், அப்போது நாம் ராகுலை விக்கெட் கீப்பிங் பணி செய்ய அழைக்கலாம். ஆனால், அவரை முதன்மை விக்கெட் கீப்பராக பயன்படுத்தினால் அவருக்கு காயம் ஏற்பட வாய்ப்பு உள்ளது." என்றார் முகமது கைப்.

என் பார்வை வேறு

"பலரும் தோனி ஐபிஎல் தொடரில் எப்படி ஆடப் போகிறார்? அதன் மூலம் டி20 உலகக்கோப்பையில் இடம் பெறுவாரா? என்றெல்லாம் பேசி வருகிறார்கள். ஆனால், என் பார்வை அதில் இருந்து மாறுபட்டது" என தோனி அணியில் இடம் பெறுவது பற்றிய தன் பார்வையை கூறினார் கைப்.

தோனியை தேர்வு செய்ய ஐபிஎல் வேண்டாம்

"நான் தோனி பார்மை ஐபிஎல் ஆட்டத்தை வைத்து முடிவு செய்ய மாட்டேன். அவர் மாபெரும் பேட்ஸ்மேன். அவர் இப்போது தகுதியுடன் இருக்கிறார். அவர் ஐபிஎல் ஆட விரும்புகிறார், கேப்டன்சி செய்ய இருக்கிறார், தான் ஆடத் தயாராக இருப்பதை காண்பிக்கிறார்." என்றார்.

நியாயம் அல்ல

மேலும், "அவரிடம் வெற்றி பெற வேண்டும் என்ற எண்ணம் உள்ளது. அழுத்தத்தில் போட்டிகளை எப்படி வெல்வது என தெரிந்து வைத்துள்ளவர். எனவே, அவரை ஒதுக்கித் தள்ளுவது நியாயம் அல்ல." என தோனிக்கு ஆதரவாக பேசினார் முகமது கைப்.

ஏற்ற இறக்கம் சகஜம்

"தோனியிடம் இன்னும் நிறைய கிரிக்கெட் பாக்கி உள்ளது. இத்தனை நீண்ட காலம் ஒரு கிரிக்கெட் வீரர் ஆடினால், அவரது கிரிக்கெட் வாழ்வில் ஏற்ற, இறக்கம் இருக்கத்தான் செய்யும். இது தோனிக்கு மட்டுமல்ல, அனைத்து கிரிக்கெட் வீரருக்கும் ஏற்படும்" எனவும் கூறினார் கைப்.