அனில் கும்ப்ளேயின் 28 ஆண்டு கால சாதனை காலி.. அதிவேகமாக 200 விக்கெட் வீழ்த்திய குல்தீப் யாதவ்

குவஹாத்தி: இந்திய அணியின் சுழற் பந்துவீச்சாளர் குல்தீப் யாதவ் ஒருநாள் போட்டிகளில் அனில் கும்ப்ளேவின் 28 ஆண்டு கால சாதனையை முறியடித்தார். குவஹாத்தியில் நடைபெற்ற 2வது ஒருநாள் போட்டியில் வெஸ்ட் இண்டீஸ் அணி 50 ஓவர்களில் 7 விக்கெட் இழப்பிற்கு 405 ரன்கள் குவித்தது. 406 ரன்கள் என்ற பெரிய இலக்கை துரத்திய இந்தியா, சுப்மன் கில்லின் 223* மற்றும் ரோஹித் சர்மாவின் 101 ரன்கள் உதவியுடன் 43.3 ஓவர்களிலேயே 406/2 ரன்கள் எடுத்து அபார வெற்றி பெற்றது.

இந்த போட்டியில் இந்திய பந்துவீச்சாளர்கள் அனைவரும் ரன்களை வாரி வழங்கிய நிலையில், குல்தீப் யாதவ் மட்டும் 10 ஓவர்களில் 65 ரன்கள் கொடுத்து 2 விக்கெட்டுகளை வீழ்த்தி அசத்தினார். சதம் அடித்த வெஸ்ட் இண்டீஸ் கேப்டன் ஷாய் ஹோப் (104) மற்றும் கீமோ பால் (3) ஆகியோரை அவுட் ஆக்கியதன் மூலம், குல்தீப் யாதவ் சர்வதேச ஒருநாள் கிரிக்கெட்டில் அதிவேகமாக 200 விக்கெட்டுகளை வீழ்த்திய இந்திய சுழற்பந்து வீச்சாளர் என்ற வரலாற்று சாதனையை படைத்தார்.

இதற்கு முன்பு முன்னாள் சுழற்பந்து ஜாம்பவான் அனில் கும்ப்ளே 147 போட்டிகளில் 200 விக்கெட்டுகளை எட்டியதே சாதனையாக இருந்தது. அந்த 28 ஆண்டு கால சாதனையை முறியடித்த குல்தீப், தனது 123வது போட்டியிலேயே 200 விக்கெட்டுகளை வீழ்த்தி புதிய வரலாறு படைத்தார்.
இந்திய அளவில் வேகப்பந்து வீச்சாளர் முகமது ஷமிக்கு (104 போட்டிகள்) அடுத்தபடியாக அதிவேகமாக 200 விக்கெட் வீழ்த்திய 2வது இந்திய பந்துவீச்சாளராக குல்தீப் திகழ்கிறார்.

உலகளவில் ஆஸ்திரேலிய சுழற்பந்து வீச்சாளர் ஆடம் ஜாம்பாவுடன் (123 போட்டிகள்) இணைந்து குல்தீப் 9வது இடத்தை பிடித்துள்ளார். மேலும், சுழற் பந்துவீச்சாளர்களில் மிகக் குறைந்த பந்துகளில் 200 விக்கெட்களை வீழ்த்தியவர்கள் பட்டியலில் உலகளவில் மூன்றாம் இடத்தில் இருக்கிறார். சக்லைன் முஷ்டாக் 5451 பந்துகளிலும், ரஷித் கான் 5782 பந்துகளிலும், குல்தீப் யாதவ் 6319 பந்துகளிலும் தங்களின் 200வது விக்கெட்டை வீழ்த்தினர்.

148 ஆண்டு கிரிக்கெட் வரலாற்றில் உலகிலேயே முதல் அணியாக இந்தியா செய்த சாதனை.. 30 ஓவருக்குள் 300

பேட்டிங் ஆடுகளத்திலும் கட்டுக்கோப்பாக பந்துவீசி விக்கெட் எடுத்த குல்தீப், 2027 உலகக்கோப்பைக்கான தனது முக்கியத்துவத்தை மீண்டும் நிரூபித்துள்ளார்.