இன்னும் 2 விக்கெட் எடுத்தால் வரலாறு.. அர்ஷ்தீப் சிங் சாதனையை தகர்க்கக் காத்திருக்கும் குல்தீப் யாதவ்

இந்தூர்: இந்தியா - வெஸ்ட் இண்டீஸ் அணிகள் மோதும் 3-வது சர்வதேச டி20 போட்டி இந்தூரில் உள்ள ஹோல்கர் மைதானத்தில் நடைபெறுகிறது. இப்போட்டியில் இந்திய அணியின் முன்னணி சுழற்பந்து வீச்சாளரான குல்தீப் யாதவ் மாபெரும் இந்திய சாதனையை முறியடிக்கக் காத்திருக்கிறார்.

வெஸ்ட் இண்டீஸ் அணிக்கு எதிரான 3-வது டி20 போட்டியில் இன்னும் 2 விக்கெட்டுகளை வீழ்த்தினால், சர்வதேச டி20 அரங்கில் அதிவேகமாக 100 விக்கெட்டுகளைச் சாய்த்த இந்திய வீரர் என்ற வரலாற்றுச் சாதனையை குல்தீப் யாதவ் படைப்பார்.

தற்போது வரை 56 சர்வதேச டி20 போட்டிகளில் விளையாடியுள்ள குல்தீப் யாதவ் 98 விக்கெட்டுகளை வீழ்த்தியுள்ளார். இந்தூர் போட்டியில் அவர் மேலும் 2 விக்கெட்டுகளைக் கைப்பற்றினால், வெறும் 57 போட்டிகளிலேயே 100 விக்கெட்டுகள் என்ற மைல்கல்லை எட்டிவிடுவார். தற்போது சர்வதேச டி20 அரங்கில் அதிவேகமாக 100 விக்கெட்டுகளை வீழ்த்திய இந்திய வீரர் என்ற பெருமை இடதுகை வேகப்பந்து வீச்சாளர் அர்ஷ்தீப் சிங் வசம் உள்ளது.

அர்ஷ்தீப் சிங் தனது 64-வது போட்டியில் 100 விக்கெட்டுகளை எட்டினார். ஜஸ்பிரித் பும்ரா 81 போட்டிகளிலும், அக்சர் படேல் 98 போட்டிகளிலும் இந்த இலக்கை எட்டியிருந்தனர். தற்போது இவர்கள் அனைவரையும் பின்னுக்குத் தள்ளி குல்தீப் யாதவ் முதலிடத்தைப் பிடிக்க உள்ளார்.

உலகளவில் ஆப்கானிஸ்தானின் ரஷித் கான் 53 போட்டிகளிலும், நேபாளத்தின் சந்தீப் லமிச்சானே 54 போட்டிகளிலும் 100 விக்கெட்டுகளை வீழ்த்தி முதல் இரண்டு இடங்களில் உள்ளனர். இந்தூர் போட்டியில் குல்தீப் 2 விக்கெட் எடுத்தால், இலங்கையின் வனிந்து ஹசரங்காவை (63 போட்டிகள்) முந்தி உலக அளவில் 3-வது அதிவேக பந்துவீச்சாளராகவும் அவர் வரலாற்றுப் புத்தகத்தில் இணைவார்.

வெஸ்ட் இண்டீஸ் அணிக்கு எதிராக குல்தீப் யாதவ் எப்போதும் அதிக விக்கெட்களை வீழ்த்தி இருக்கிறார். அந்த அணிக்கு எதிராக 11 போட்டிகளில் ஆடி 20 விக்கெட்டுகளை வீழ்த்தி, வெஸ்ட் இண்டீசுக்கு எதிராக அதிக விக்கெட் எடுத்த இந்திய பந்துவீச்சாளராகவும் குல்தீப் முதலிடத்தில் உள்ளார் என்பது குறிப்பிடத்தக்கது.