இந்திய அணியில் இடம் மறுப்பு.. இங்கிலாந்துக்கு சென்று விளையாட குல்தீப் யாதவ் ஒப்பந்தம்

லண்டன்: இங்கிலாந்துக்கு எதிரான ஒருநாள் தொடரில் இந்திய அணியில் இடம்பெற்றும், ஒரு போட்டியில் கூட விளையாடாத நட்சத்திர சுழற்பந்து வீச்சாளர் குல்தீப் யாதவை யார்க்ஷயர் கவுண்டி கிரிக்கெட் கிளப் ஒப்பந்தம் செய்துள்ளது.

தற்போது நடைபெற்று வரும் மெட்ரோ பேங்க் ஒருநாள் கோப்பை புள்ளிப்பட்டியலில் யார்க்ஷயர் அணி ஆறாவது இடத்திலும், கவுண்டி சாம்பியன்ஷிப் (நான்கு நாள் போட்டிகள்) பட்டியலில் எட்டாவது இடத்திலும் உள்ளது. குல்தீப் யாதவ் பல்வேறு போட்டிகளில் விளையாடுவதற்கான ஒப்பந்தத்தில் கையெழுத்திட்டுள்ளார்.

நடப்பு சீசனில் யார்க்ஷயர் அணிக்காக ஐந்து ஒருநாள் போட்டிகள் மற்றும் மூன்று கவுண்டி சாம்பியன்ஷிப் போட்டிகளில் இந்த இந்திய நட்சத்திர வீரர் விளையாட உள்ளார். இது குறித்து கருத்து தெரிவித்துள்ள குல்தீப் யாதவ், "யார்க்ஷயர் அணியில் இணைவது எனக்கு மிகவும் மகிழ்ச்சியளிக்கிறது, இந்த வாய்ப்பிற்கு நான் நன்றியுள்ளவனாக இருக்கிறேன். பெருமைமிக்க வரலாற்றைக் கொண்ட யார்க்ஷயர் போன்ற ஒரு கிளப்பில் விளையாடுவது எனக்குக் கிடைத்த பெருமையாகும்" என்று தெரிவித்துள்ளார்.

மணிக்கு 154 கிமீ வேகத்தில் பந்துவீசிய அசோக் சர்மா.. ஜிம்பாப்வே தொடரில் சாதிப்பாரா? சிராஜ் குறித்து நெகிழ்ச்சி

"குல்தீப் ஒரு திறமையான, சர்வதேச தரம் வாய்ந்த வீரர். அவர் அணிக்குள் வருவது வரவிருக்கும் போட்டிகளில் எங்கள் அணிக்கு கூடுதல் பலத்தை சேர்க்கும்" என்று யார்க்ஷயர் அணியின் பொது மேலாளர் கவின் ஹாமில்டன் தெரிவித்துள்ளார். 31 வயதான இந்திய சுழற்பந்து வீச்சாளர் குல்தீப் யாதவ், ஜூலை 24 வெள்ளிக்கிழமை அன்று கிளாமோர்கன் அணிக்கு எதிராக நடைபெறவுள்ள ஒருநாள் கோப்பை போட்டிக்கு முன்னதாக நேரடியாக யார்க்ஷயர் அணியுடன் இணையவுள்ளார்.

அதைத் தொடர்ந்து, செப்டம்பர் மாத இறுதியில் நடைபெறும் கவுண்டி சாம்பியன்ஷிப்பின் இறுதிப் போட்டிகளில் அவர் பங்கேற்பார். இங்கிலாந்துக்கு எதிரான ஒருநாள் தொடருக்கான இந்திய அணியில் குல்தீப் இடம் பெற்றிருந்தார். இருப்பினும், அனைவரும் ஆச்சரியம் அளிக்கும் வகையில், மூன்று போட்டிகள் கொண்ட அந்தத் தொடரின் ஒரு போட்டியில் கூட அவருக்கு விளையாட வாய்ப்பு கிடைக்கவில்லை.

குல்தீப் யாதவ் இதுவரை இங்கிலாந்தில் 10 ஒருநாள் போட்டிகளில் விளையாடியுள்ளார். அதில் 32.33 சராசரியிலும், 5.00 எகானமி ரேட்டிலும் 15 விக்கெட்டுகளை வீழ்த்தியுள்ளார். அவரது சிறந்த பந்துவீச்சு 6/25 ஆகும். டெஸ்ட் போட்டிகளைப் பொறுத்தவரை, அவர் 2018 ஆம் ஆண்டு இங்கிலாந்து சுற்றுப்பயணத்தின் போது ஒரே ஒரு போட்டியில் மட்டுமே விளையாடியுள்ளார்.

ஐசிசி ஒருநாள் தரவரிசை பட்டியல்.. முதலிடத்தை நெருங்கும் கில்.. டாப் 5 இடத்தில் ரோகித், கோலி

"இங்கிலாந்து ஆடுகளங்களின் சவால்களை எதிர்கொண்டு விளையாடுவதை நான் எப்போதும் விரும்புகிறேன். அணி நிர்வாகத்துடன் பேசிய பிறகு, அணியில் இணைவதற்கு நான் மிகவும் ஆர்வமாக உள்ளேன். ஹெடிங்லியின் எனது விளையாட்டுக் காலத்தில் அணிக்கு எனது பங்களிப்பைச் சிறப்பாக வழங்க ஆவலோடு காத்திருக்கிறேன்" என்றும் குல்தீப் கூறினார்.