யாமறிந்த கேப்டன்களிலே... அனில் கும்ப்ளேவிற்கு மகுடம் சூட்டிய கம்பீர்

14 டெஸ்ட் போட்டிகளில் கேப்டன்

இந்திய அணிக்காக தான் விளையாடிய டெஸ்ட் மற்றும் ஒருநாள் போட்டிகளில் அதிக விக்கெட்டுகளை வீழ்த்தியுள்ள அனில் கும்ப்ளே, கடந்த 2007ல் ராகுல் டிராவிட்டிடமிருந்து கேப்டன் பொறுப்பை பெற்றார். அனில் கும்ப்ளே மொத்தமாக 14 டெஸ்ட் போட்டிகளில் கேப்டனாக செயலாற்றியுள்ளார். இதில் 3 போட்டிகளில் வெற்றியும், 6 போட்டிகளில் தோல்வியும் 5 போட்டிகள் டிராவிலும் முடிந்துள்ளன.

கவுதம் கம்பீர் பாராட்டு

தன்னுடைய கேப்டன் பதவியை கடந்த 2008ல் எம்எஸ் தோனிக்கு அளித்தவர் கேப்டன் கும்ப்ளே. 3 வடிவங்களிலும் அந்த தருணத்தில் கேப்டன் பொறுப்பை தோனி பெற்றார். இந்நிலையில், தான் எம்எஸ் தோனி, சவுரவ் கங்குலி உள்ளிட்டவர்களின் கேப்டன்சியின் கீழ் விளையாடினாலும் அனில் கும்ப்ளேவே சிறந்த கேப்டன் என்று முன்னாள் துவக்க ஆட்டக்காரர் கவுதம் கம்பீர் தெரிவித்துள்ளார்.

கும்ப்ளே கேப்டனாக நீடித்திருக்க வேண்டும்

மொத்தமாக 14 டெஸ்ட் போட்டிகளில் கேப்டனாக இருந்துள்ளார் அனில் கும்ப்ளே. இதனிடையே அவர் இன்னும் அதிக காலங்கள் கேப்டன் பொறுப்பை வகித்திருக்க வேண்டும் என்று கவுதம் கம்பீர் தெரிவித்துள்ளார். அவ்வாறு அவர் நீண்ட காலங்கள் கேப்டன் பதவியில் நீடித்திருந்தால் கேப்டன் பொறுப்பில் மேலும் பல சாதனைகளை படைத்திருப்பார் என்றும் கம்பீர் கூறியுள்ளார்.

பிடித்தமான கேப்டன்

கேப்டன் பொறுப்பில் சாதனைகளை அதிகமாக படைத்து நம்பர் ஒன் இடத்தில் இருப்பவர் முன்னாள் கேப்டன் எம்எஸ் தோனி என்று சுட்டிக் காட்டியுள்ள கவுதம் கம்பீர், ஆனால் தனது மனதுக்கு பிடித்தமான சிறந்த கேப்டன் அனில் கும்ப்ளே என்று உறுதிப்பட தெரிவித்துள்ளார். அனில் கும்ப்ளேவிற்கு கீழ் 6 போட்டிகளில் கவுதம் கம்பீர் விளையாடியுள்ளது குறிப்பிடத்தக்கது.