"இவர் இப்போ இந்திய அணியில் ஆடவே கூடாது".. லக்ஷ்மன் சிவராமகிருஷ்ணன் ஆவேசம்.. ரவி பிஷ்னோய் சிக்கல்

சென்னை: இந்திய சுழற்பந்து வீச்சாளர் ரவி பிஷ்னோய் இப்போதைக்கு இந்திய அணிக்காக சர்வதேச போட்டிகளில் விளையாடக் கூடாது என்று முன்னாள் வீரர் லக்ஷ்மன் சிவராமகிருஷ்ணன் ஆவேசமாகத் தெரிவித்துள்ளார். அதற்கு முக்கிய காரணம் ஒன்றையும் அவர் சுட்டிக் காட்டி இருக்கிறார்.

2026 ஆசிய விளையாட்டுப் போட்டிகள் இறுதிப் போட்டியில் பாகிஸ்தானுக்கு எதிராக ரவி பிஷ்னோய் 3 ஓவர்களில் 44 ரன்களை வாரி வழங்கினார். இதனால் வெஸ்ட் இண்டீஸ் அணிக்கு எதிரான முதல் டி20 போட்டியில் அவர் ஆடும் லெவனில் இருந்து கழற்றிவிடப்பட்டு குல்தீப் யாதவ் சேர்க்கப்பட்டார்.

இந்நிலையில் பிஷ்னோயின் வீழ்ச்சி குறித்து சமூக வலைதளத்தில் பதிவிட்டுள்ள லக்ஷ்மன் சிவராமகிருஷ்ணன், "ரவி பிஷ்னோய் தனது ஓடிவரும் முறையை மாற்றியமைக்கும் முயற்சியில் இருக்கிறார் என்றால், அவர் போட்டிகளில் விளையாடுவதை உடனடியாக நிறுத்த வேண்டும். பந்துவீச்சு குறைபாடுகளை வலைப்பயிற்சியில் வைத்துதான் திருத்த வேண்டுமே தவிர, சர்வதேச போட்டிகளில் வைத்து பரிசோதிக்கக் கூடாது" என்று காட்டமாகச் கூறி உள்ளார்.

முன்னதாக இங்கிலாந்து தொடரில் 3 முறை நோ-பால் வீசிய ரவி பிஷ்னோய், பெங்களூரு கிரிக்கெட் அகாடமியில் சுனில் ஜோஷியுடன் இணைந்து தனது பந்துவீச்சு முறையை மாற்ற முயன்றார். கடந்த 2023 டிசம்பரில் சர்வதேச டி20 பந்துவீச்சாளர்கள் தரவரிசையில் உலகின் நம்பர் 1 இடத்தை எட்டிய ரவி பிஷ்னோய், அதன்பின் தொடர் சரிவைச் சந்தித்து வருகிறார். 2022-ல் 17.13 ஆக இருந்த அவரது பந்துவீச்சு சராசரி, 2026-ல் 31.10 ஆக படுமோசமாக உயர்ந்துள்ளது. அவரது எகானமியும் 8.60 ஆக எகிறியுள்ளது.

குஜராத்தில் பிறந்து நியூசிலாந்துக்காக ஆடிய வீரர்.. கிரிக்கெட்டிலிருந்து ஓய்வை அறிவித்தார் ஜீத் ராவல்

லெக் ஸ்பின் வீசாமல் எப்போதும் கூக்ளி பந்துகளை மட்டுமே அவர் நம்பியிருப்பதை சர்வதேச பேட்டர்கள் எளிதாகக் கணித்து ரன் வேட்டை நடத்துகின்றனர். வருண் சக்ரவர்த்தி தனது பந்துவீச்சை முற்றிலுமாக மாற்றி அணிக்கு திரும்பியது போல, ரவி பிஷ்னோயும் புதிய உத்திகளைக் கற்றுக்கொண்டு முழுமையாகத் தயாரான பிறகே இந்திய அணிக்குத் திரும்ப வேண்டும் என்பதே ரசிகர்களின் எதிர்பார்ப்பாகும்.