ஐபிஎல்-ஐ காப்பி அடித்த லங்கா பிரீமியர் லீக்.. இம்பாக்ட் பிளேயர், அண்டர் 23 வீரர் விதிமுறை அறிமுகம்

கொழும்பு: இந்தியாவில் ஐபிஎல் கிரிக்கெட் தொடரில் பயன்படுத்தப்பட்டு வரும் 'இம்பாக்ட் பிளேயர்' விதிமுறையை, நடப்பு 2026 சீசன் முதல் லங்கா பிரீமியர் லீக் (எல்பிஎல்) தொடரிலும் அறிமுகப்படுத்த இலங்கை கிரிக்கெட் வாரியம் முடிவு செய்துள்ளது. இம்பாக்ட் பிளேயர் விதிமுறையுடன் சேர்த்து மற்றொரு முக்கியமான விதியையும் லங்கா பிரீமியர் லீக் கொண்டு வந்துள்ளது. இதன்படி, ஒவ்வொரு அணியின் ஆடும் 11 பேர் கொண்ட பட்டியலில் குறைந்தபட்சம் ஒரு 23 வயதுக்குட்பட்ட இளம் வீரர் இடம் பெறுவது கட்டாயமாக்கப்பட்டுள்ளது.

ஜூலை 1, 2003-க்கு பிறகு பிறந்த வீரர்கள் மட்டுமே இந்தத் தகுதியைப் பெறுவார்கள். மேலும், இந்த இளம் வீரருக்குப் பதிலாக மற்றொரு மூத்த வீரரை மாற்று வீரராகக் களமிறக்க முடியாது என்றும் இலங்கை கிரிக்கெட் வாரியம் தெளிவுபடுத்தியுள்ளது.

இம்பாக்ட் பிளேயர் விதியின் பின்னணி

கடந்த 2023-ம் ஆண்டு ஐபிஎல் தொடரில் அறிமுகப்படுத்தப்பட்ட இந்த இம்பாக்ட் பிளேயர் விதிமுறை, அணிகள் தங்களது தொடக்க வீரர்களில் ஒருவருக்குப் பதிலாக மாற்று வீரர் ஒருவரை ஆட்டத்தின் எந்த நேரத்திலும் களமிறக்க அனுமதிக்கிறது. இது அடிப்படையில் 12 வீரர்கள் விளையாட வழிவகுக்கிறது. இது ஆஸ்திரேலியாவின் பிக் பாஷ் லீக் தொடரில் 2020-ம் ஆண்டு அறிமுகப்படுத்தப்பட்ட 'எக்ஸ்-ஃபேக்டர்' விதிமுறையை அடிப்படையாகக் கொண்டு உருவாக்கப்பட்டது.

எழும் விமர்சனங்கள்

இந்த இம்பாக்ட் பிளேயர் விதிமுறைக்கு கிரிக்கெட் உலகில் ஆதரவும் எதிர்ப்பும் சமமாக உள்ளன. இந்த விதிமுறை ஆல்-ரவுண்டர்களின் முக்கியத்துவத்தைக் குறைக்கிறது என்றும், அணிகள் மிக அதிக ரன்களைக் குவிக்க இதுவே காரணம் என்றும் பல முன்னணி வீரர்கள் விமர்சித்து வருகின்றனர். இதனால், ஐபிஎல் தொடரில் இந்த விதியை நீக்குவது அல்லது மாற்றியமைப்பது குறித்து பிசிசிஐ பரிசீலித்து வருகிறது.

கோடிக்கணக்கான பணம் போச்சு.. ஐபிஎல் வீரர்கள் தேர்வில் ஏமாற்று வேலை.. சுனில் கவாஸ்கர் ஆவேசம்

ஏலமும் நட்சத்திர வீரர்களும்

இந்த நிலையில், லங்கா பிரீமியர் லீக் 2026 சீசனுக்கான ஏலத்திற்கு முன்பாகவே இந்த விதிகளை அறிவித்துள்ளது. இந்த ஆண்டு லங்கா பிரீமியர் லீக் தொடரில் விளையாட இங்கிலாந்து முன்னாள் ஆல்-ரவுண்டர் மொயீன் அலி, பாகிஸ்தான் தொடக்க வீரர் சாஹிப்சாதா ஃபர்ஹான் மற்றும் சமீபத்தில் ஓய்வு பெற்ற இந்திய ஆல்-ரவுண்டர் விஜய் சங்கர் போன்ற முன்னணி வீரர்கள் தங்களது பெயர்களைப் பதிவு செய்துள்ளனர் என்பது குறிப்பிடத்தக்கது. இந்த புதிய விதிமுறைகள் லங்கா பிரீமியர் லீக் தொடரின் விறுவிறுப்பை அதிகரிக்கும் என எதிர்பார்க்கப்படுகிறது.