LSG vs RCB: 200 ரன் எடுத்தும் பெங்களூரு தோல்வி..மிட்செல் மார்ஷ் சதம் வீண் போகவில்லை.. லக்னோ வெற்றி

லக்னோ: 2026 ஐபிஎல் கிரிக்கெட் போட்டியில், ராயல் சேலஞ்சர்ஸ் பெங்களூரு அணியை 9 ரன்கள் வித்தியாசத்தில் வீழ்த்தி லக்னோ சூப்பர் ஜெயண்ட்ஸ் அணி அபார வெற்றி பெற்றது. மழையினால் ஆட்டம் இரண்டு முறை பாதிக்கப்பட்டது. இதனால், 'டக்வொர்த் லூயிஸ்' முறைப்படி 19 ஓவர்களாகக் குறைக்கப்பட்டது. 213 ரன்கள் என்ற இமாலய இலக்கை நோக்கி ஆடிய பெங்களூரு அணி, கடைசி வரை போராடி 203 ரன்கள் மட்டுமே எடுத்துத் தோல்வியைத் தழுவியது.

டாஸ் வென்ற பெங்களூரு முதலில் பந்துவீச்சை தேர்வு செய்தது. லக்னோ அணியின் தொடக்க வீரராகக் களம் இறங்கிய ஆஸ்திரேலியாவின் மிட்செல் மார்ஷ், ஆரம்பம் முதலே பெங்களூரு பந்துவீச்சை துவம்சம் செய்தார். அவர் 56 பந்துகளில் 9 சிக்சர்கள் மற்றும் 9 பவுண்டரிகளுடன் 111 ரன்கள் விளாசித் தள்ளினார். இது இந்த சீசனில் அவர் அடிக்கும் முதல் சதமாகும். மார்ஷின் இந்த அதிரடியால் லக்னோ அணி வலுவான நிலையை எட்டியது.

பண்ட் காட்டிய அதிரடி

மழையினால் ஓவர்கள் குறைக்கப்பட்ட நிலையில், கடைசி நேரத்தில் களம் புகுந்த லக்னோ கேப்டன் ரிஷப் பண்ட் மின்னல் வேகத்தில் ரன்களைச் சேர்த்தார். அவர் வெறும் 10 பந்துகளில் 32 ரன்கள் எடுத்து ஆட்டமிழக்காமல் இருந்தார். இதில் 4 பவுண்டரிகள் மற்றும் 2 சிக்சர்கள் அடங்கும். இதன் மூலம் லக்னோ அணி 19 ஓவர்களில் 3 விக்கெட் இழப்பிற்கு 209 ரன்களைக் குவித்தது. பெங்களூரு பந்துவீச்சாளர்களில் ஹேசில்வுட் மற்றும் ரசிக் சலாம் தார் தலா 1 விக்கெட்டை வீழ்த்தினர்.

கோலி ஏமாற்றம் - படிதார் போராட்டம்

213 ரன்கள் என்ற கடினமான இலக்கை விரட்டிய பெங்களூரு அணிக்கு ஆரம்பமே அதிர்ச்சி காத்திருந்தது. நட்சத்திர வீரர் விராட் கோலி ரன் ஏதுமின்றி டக் அவுட் ஆகி ரசிகர்களை ஏமாற்றினார். ஜேக்கப் பெத்தேலும் 4 ரன்களில் வெளியேறினார். எனினும், கேப்டன் ரஜத் படிதார் 31 பந்துகளில் 61 ரன்கள் விளாசி வெற்றிக்கு நம்பிக்கை அளித்தார். அவருக்குத் துணையாக தேவ்தத் படிக்கல் 34 ரன்கள் எடுத்தார்.

உலகக்கோப்பை நாயகனுக்குப் பிறந்த 'குட்டி தேவதை'.. தந்தை ஆனார் டி20 கேப்டன் சூர்யகுமார் யாதவ்

திருப்புமுனை ஏற்படுத்திய பிரின்ஸ் யாதவ்

பெங்களூரு அணி வெற்றியை நோக்கிச் சென்றபோது, லக்னோவின் இளம் வீரர் பிரின்ஸ் யாதவ் அபாரமாகப் பந்துவீசி 3 விக்கெட்டுகளைச் சாய்த்து ஆட்டத்தின் போக்கை மாற்றினார். குறிப்பாக கோலி மற்றும் படிக்கல் விக்கெட்டுகளை அவர் வீழ்த்தியது லக்னோவுக்குத் திருப்புமுனையாக அமைந்தது. 'இம்பாக்ட்' வீரராக வந்த டிம் டேவிட் 17 பந்துகளில் 40 ரன்கள் எடுத்து கடைசி வரை போராடினார். இறுதியில் பெங்களூரு அணி 19 ஓவர்களில் 203 ரன்கள் மட்டுமே எடுத்து 9 ரன்கள் வித்தியாசத்தில் தோல்வியடைந்தது.