"பாண்டிங் தான் இந்திய பயிற்சியாளர் என நினைத்தேன்".. ஸ்ரேயாஸ் கேப்டன்சி குறித்து வாகன் கருத்து

மும்பை: இந்திய டி20 அணியின் புதிய கேப்டனாக ஸ்ரேயாஸ் ஐயர் நியமிக்கப்பட்டபோது, ரிக்கி பாண்டிங் தான் இந்திய அணியின் புதிய தலைமை பயிற்சியாளராக நியமிக்கப்படப் போகிறார் என்று தான் நினைத்ததாக இங்கிலாந்து முன்னாள் கேப்டன் மைக்கேல் வாகன் தெரிவித்துள்ளார்.

அஜிங்கியா ரஹானேவின் யூடியூப் சேனலில் பேசிய மைக்கேல் வாகன், ஸ்ரேயாஸ் ஐயர் மற்றும் ரிக்கி பாண்டிங் ஜோடி குறித்துப் பேசினார். ஐபிஎல் தொடரில் டெல்லி கேபிடல்ஸ் அணியைத் தொடர்ந்து, தற்போது பஞ்சாப் கிங்ஸ் அணியிலும் இவர்கள் இருவரும் முறையே கேப்டன் மற்றும் பயிற்சியாளராக இணைந்து வெற்றிகரமாகப் பணியாற்றி வருகின்றனர். இதனால், ஸ்ரேயாஸ் கேப்டனாக நியமிக்கப்பட்டதும் பாண்டிங் தான் இந்திய அணியின் பயிற்சியாளராகப் போகிறார் என்று தான் கருதியதாக வாகன் கூறினார். "அவர்கள் இருவரும் எப்போதும் ஒரு ஜோடியாகவே வருகிறார்கள்" என்றும் அவர் குறிப்பிட்டார்.

டி20 உலகக்கோப்பை 2026-ஐ வென்று கொடுத்த சூர்யகுமார் யாதவ், சர்வதேச போட்டிகள் மற்றும் ஐபிஎல் தொடரில் ஏற்பட்ட மோசமான ஃபார்ம் காரணமாக கேப்டன் பதவியிலிருந்து நீக்கப்பட்டு அவருக்குப் பதிலாக ஸ்ரேயாஸ் ஐயர் நியமிக்கப்பட்டார். இது குறித்துப் பேசிய வாகன், "உலகக்கோப்பையை வென்று கொடுத்த கேப்டனையே அணியிலிருந்து நீக்கும் அளவுக்கு இந்திய கிரிக்கெட்டில் வீரர்கள் பலம் அதிகமாக உள்ளது. இது வேறு எந்த நாட்டிலும் நடக்க வாய்ப்பில்லை" என்று தெரிவித்தார்.

அயர்லாந்துக்கு எதிரான முதல் போட்டியில் 34 ரன்கள் வித்தியாசத்தில் தோல்வியடைந்த ஸ்ரேயாஸ் ஐயர் தலைமையிலான இந்திய அணி, இன்று (ஞாயிற்றுக்கிழமை) நடைபெறும் இரண்டாவது டி20 போட்டியில் வென்று தொடரைச் சமன் செய்யப் போராடும் நிலையில் உள்ளது.

IND vs IRE: தமிழக வீரர் இடத்தில் வைபவ் சூர்யவன்ஷி.. இந்திய பிளேயிங் லெவனில் மாற்றத்துக்கு வாய்ப்பு

இதனைத் தொடர்ந்து ஜூலை 1 முதல் இங்கிலாந்துக்கு எதிராகத் தொடங்கவுள்ள 5 போட்டிகள் கொண்ட டி20 தொடரில் இந்திய அணியே வெற்றி பெற அதிக வாய்ப்புள்ளதாக வாகன் கணித்துள்ளார். ஹாரி புரூக் தலைமையிலான இங்கிலாந்து அணி, இந்தியாவை வீழ்த்த தங்களது முழு திறமையையும் வெளிப்படுத்த வேண்டியிருக்கும் என்றும் அவர் கூறினார்.