"தெரிந்தே ரிஸ்க் எடுக்கிறார்கள்".. டி20 உலகக்கோப்பையில் இந்தியா செய்யும் தவறு.. ஜான்சன் எச்சரிக்கை!

டி20 உலகக்கோப்பை

ஆசிய கோப்பை தொடரில் இந்தியாவுக்கு பெரும் பிரச்சினையாக இருந்தது சரியான பவுலிங் படை இல்லாதது தான். ஆனால் டி20 உலகக்கோப்பை தொடருக்காக ஜஸ்பிரித் பும்ரா மற்றும் ஹர்ஷல் பட்டேல் ஆகியோர் காயத்தில் இருந்து குணமடைந்து வந்துள்ளனர். இவர்களுடன் புவனேஷ்வர் குமார் மற்றும் அர்ஷ்தீப் சிங் ஆகியோரும் ஜோடி சேர்கின்றனர்.

முகமது ஷமி இல்லை

இந்த பவுலிங் யூனிட்டில் யாரும் எதிர்பார்க்காத திருப்பம் முகமது ஷமி இல்லாதது தான். ஆஸ்திரேலிய களத்தில் அதிக வேகமும், பவுன்ஸும் இருக்கும். இப்படிபட்ட களத்தில் முகமது ஷமி நன்றாக பந்துவீசுவார். ஆனால் அவர் பேக் அப் வீரராக மட்டுமே சேர்க்கப்பட்டுள்ளார். ஹர்திக் பாண்ட்யாவை 5வது வேகப்பந்துவீச்சாளராக வைத்துள்ளனர்.

ஜான்சன் எச்சரிக்கை

இந்நிலையில் இந்தியா தெரிந்தே தவறு செய்துள்ளதாக மிட்செல் ஜான்சன் கூறியுள்ளார். இதுகுறித்து பேசியுள்ள அவர், ஆஸ்திரேலிய களத்தில் விளையாடுவதற்கு ஒரு அணியில் ஒரு வேகப்பந்துவீச்சு ஆல்ரவுண்டர் மற்றும் 2 சுழற்பந்துவீச்சாளர்கள் மற்றும் 4 முழு நேர வேகப்பந்துவீச்சாளர்களை மட்டும் வைத்துக்கொள்வது ரிஸ்க்காகும்.

பவுலிங் யூனிட்

ஆஸ்திரேலியாவில் ஒரு அணியின் ப்ளேயிங் 11ல் முழு நேர வேகப்பந்துவீச்சாளர்கள் 3 அல்லது 4 பேர் நிச்சயம் தேவை. குறிப்பாக பெர்த் போன்ற மைதானங்களில் வேகப்பந்துவீச்சு தான் எடுபடும். ஆனால் இந்தியவோ தனது ப்ளேயிங் 11ல் ஹர்திக் பாண்ட்யாவை சேர்த்து 3 வேகப்பந்துவீச்சாளர்கள் மற்றும் 2 ஸ்பின்னர்களுடன் களமிறங்கும் எனத்தெரிகிறது. களத்தின் தன்மை தெரிந்திருந்தாலும் பிசிசிஐ தெரிந்தே ரிஸ்க் எடுக்கிறது என ஜான்சன் கூறினார்.

அதிவேகம் தேவையில்லை

தொடர்ந்து பேசிய அவர், இந்திய அணியில் பும்ராவை தவிர மற்ற 3 பேரும் 140+ கிமீ வேகத்தில் வீச தடுமாறுவார்கள். ஆனால் அது அவசியம் கிடையாது. அனைவரும் 145+ கிமீ வேகத்தில் வீச வேண்டும் என்பது முக்கியம் அல்ல, அதே சமயம் குறைந்த வேகத்திலும் நல்ல வேரியேஷன்களை காட்டினால் மட்டுமே ஜெயிக்க முடியும் எனக்கூறியுள்ளார்.