பாகிஸ்தான் தொடரில் வெளிநாட்டு வீரராக விளையாடும் முகமது அமீர்.. ஐபிஎல் போட்டிக்காக செயத் தியாகம்

மும்பை: பாகிஸ்தான் அணியின் முன்னாள் வேகப்பந்து வீச்சாளர் முகமது அமீர், பிரிட்டிஷ் குடியுரிமை பெற்ற பிறகு, 2027 ஆம் ஆண்டு முதல் நடைபெறும் பாகிஸ்தான் சூப்பர் லீக் தொடரில் வெளிநாட்டு வீரராக விளையாடுவதை உறுதிப்படுத்தியுள்ளார். அதே வேளையில், ஐபிஎல் தொடரில் பங்கேற்பது குறித்து தான் இன்னும் எந்த முடிவும் எடுக்கவில்லை என்றும் அவர் தெரிவித்துள்ளார்.

இங்கிலாந்தில் நடைபெற்று வரும் 'தி ஹண்ட்ரட்' தொடரில் டிரெண்ட் ராக்கெட்ஸ் அணிக்காக உள்ளூர் வீரராக விளையாடி வரும் அமீர், தனது புதிய குடியுரிமை காரணமாக டி20 கிரிக்கெட் போட்டிகளில் தனது அந்தஸ்து மாறியுள்ளதை தெரிவித்துள்ளார். இருப்பினும், ஐபிஎல் தொடரில் விளையாடுவது குறித்து அவர் உறுதியான பதில் எதையும் அளிக்கவில்லை.

பிஎஸ்எல் 2027 தொடரில் பங்கேற்பது குறித்து பத்திரிகையாளர் ஒருவர் கேட்ட கேள்விக்கு, "நான் ஒரு வெளிநாட்டு வீரராக விளையாடுவேன்" என்று அமீர் கூறினார். ஆனால், ஐபிஎல் வாய்ப்புகள் குறித்து கேட்கப்பட்டபோது, "அதுபற்றி எனக்கு எதுவும் தெரியாது" என்று சுருக்கமாகப் பதிலளித்தார்.

உலக டெஸ்ட் சாம்பியன்ஷிப்.. ஆஸ்திரேலியா, தென்னாப்பிரிக்கா உள்ளிட்ட டாப் 3 அணிகள் பைனல் வாய்ப்பு என்ன?

34 வயதான முகமது அமீர், தனது மனைவி நர்ஜிஸ் கான் மூலம் பிரிட்டிஷ் குடியுரிமையைப் பெற்றார். இதன் மூலம் இங்கிலாந்தில் உள்ளூர் வீரராக விளையாடும் தகுதியை அவர் பெற்றுள்ளார். இருப்பினும், ஐபிஎல் தொடரில் விளையாடுவது என்பது அவருக்கு அவ்வளவு எளிதான விஷயம் அல்ல. வெறும் பிரிட்டிஷ் குடியுரிமை பெற்றிருப்பது மட்டுமே அமீர் ஐபிஎல் போட்டிகளில் விளையாடுவதை உறுதி செய்துவிடாது என்பதே இதற்குக் காரணம்.

ஐபிஎல் தொடரில் பாகிஸ்தான் வீரர்களுக்கு விதிக்கப்பட்டுள்ள தடை என்பது அதிகாரப்பூர்வ விதியாக இல்லாமல், மறைமுகத் தடையாகவே நீடிக்கிறது. இதனால், பிரிட்டிஷ் குடியுரிமை மூலம் வேறு நாட்டு வீரராகப் பதிவு செய்தாலும், தேவையற்ற விமர்சனங்களைத் தவிர்க்க ஐபிஎல் அணிகள் அவர்களை ஏலத்தில் எடுக்கத் தயங்குகின்றன. மேலும், தற்போதைய அதிக போட்டி நிறைந்த சூழலில், சர்வதேச கிரிக்கெட்டிலிருந்து ஓய்வு பெற்ற ஒரு வேகப்பந்து வீச்சாளரை ஏலத்தில் எடுக்க அணிகள் ஆர்வம் காட்டுவது கடினம்.

அமீர் சமீபத்தில் நாட்டிங்ஹாம்ஷையர் அணிக்காக டி20 பிளாஸ்ட் தொடரில் விளையாடினார். அதன் தொடர்ச்சியாக தற்போது தி ஹண்ட்ரட் தொடரில் டிரெண்ட் ராக்கெட்ஸ் அணிக்காக விளையாடி வருகிறார். இந்த இரண்டு தொடர்களிலும் அவர் உள்ளூர் வீரராகவே களம் இறங்கியுள்ளார். இதன் மூலம் இங்கிலாந்து உள்நாட்டுப் போட்டிகளில் அவர் வெளிநாட்டு வீரருக்கான இடத்தைப் பிடிக்கத் தேவையில்லை என்ற சாதகமான நிலை உருவாகியுள்ளது.

Also Read

இலங்கை தொடரை 2-0 வென்றால், WTC பட்டியலில் இந்திய அணி எவ்வளவு புள்ளிகள் பெறும்?

2024 டி20 உலகக் கோப்பைக்குப் பிறகு சர்வதேச கிரிக்கெட்டிலிருந்து ஓய்வு பெற்ற முகமது அமீர், பாகிஸ்தான் அணிக்காக 36 டெஸ்ட், 61 ஒருநாள் மற்றும் 62 டி20 போட்டிகளில் விளையாடியுள்ளார். சர்வதேச போட்டிகளில் இருந்து விலகிய போதிலும், உலகளாவிய டி20 லீக் தொடர்களில் இந்த இடதுகை வேகப்பந்து வீச்சாளருக்கு இன்னும் நல்ல வரவேற்பு உள்ளது குறிப்பிடத்தக்கது.