உலகக்கோப்பை வாய்ப்பே போய்விடும்.. சிராஜை முடக்கி வைக்க நினைக்கும் பிசிசிஐ.. பின்னணி என்ன?

மும்பை: இந்திய அணியின் முன்னணி வேகப்பந்து வீச்சாளர் முகமது சிராஜை அணி நிர்வாகம் தொடர்ந்து புறக்கணித்து வருவது கிரிக்கெட் வட்டாரத்தில் பெரும் அதிர்ச்சியை ஏற்படுத்தியுள்ளது. 2026-ஆம் ஆண்டில் இந்திய அணி நியூசிலாந்து, ஆப்கானிஸ்தான், இங்கிலாந்து, வெஸ்ட் இண்டீஸ் ஆகிய அணிகளுக்கு எதிராக 4 ஒருநாள் தொடர்களில் களமிறங்கியது. ஆனால் இவற்றில் நடைபெற்ற மொத்தம் 12 போட்டிகளில், சிராஜிற்கு வெறும் 4 போட்டிகளில் மட்டுமே பிளேயிங் லெவனில் வாய்ப்பு வழங்கப்பட்டுள்ளது. இளம் வேகப்பந்து வீச்சாளர்களைப் பரிசோதிக்கும் முயற்சியில், முதன்மை பந்துவீச்சாளரான சிராஜ் திட்டமிட்டே ஓரங்கட்டப்படுகிறாரா? என்ற கேள்வி எழுந்துள்ளது.

சமீபத்தில் வெஸ்ட் இண்டீஸ் அணிக்கு எதிரான 3-வது ஒருநாள் போட்டியில் சிராஜ் 8 ஓவர்கள் வீசி 52 ரன்களுக்கு 1 விக்கெட் எடுத்தார். இதில் மணிக்கு அதிகபட்சமாக 141.2 கி.மீ வேகத்தில் பந்துவீசி அசத்தினார். எனினும் கடைசி கட்ட ஓவர்களில் கேப்டன் சுப்மன் கில் இவருக்கு பந்துவீச வாய்ப்பளிக்காமல் தவிர்த்தது ஆட்டத்தின் போக்கையே மாற்றியது.

தொடர்ந்து போட்டிகளில் விளையாடினால் மட்டுமே சரியான ரிதம் பெறக்கூடிய பந்துவீச்சாளர் சிராஜ். அவருக்கு 2 மாதங்கள் நீண்ட ஓய்வு அளிக்கப்பட்டதால், அவரது பந்துவீச்சு வேகம் 125 முதல் 130 கி.மீ வரை சரிந்தது. சில டெஸ்ட் தொடர்களிலும் அவருக்கு வாய்ப்பு வழங்கப்படவில்லை.

இதுபற்றி சிராஜ் பேசுகையில், "நான் ஒரு ரிதம் பவுலர். எனது 10 ஆண்டு கால கிரிக்கெட் வாழ்க்கையில் இப்படி 2 மாதங்கள் முழு ஓய்வு எடுத்ததே இல்லை. நீண்ட ஓய்வு எனது உடலுக்கு ஒத்துப்போகாது" என்று வெளிப்படையாகத் தெரிவித்தார்.

'பாகிஸ்தான் இனி நமக்கு ஒரு போட்டியே கிடையாது'.. தங்கம் வென்ற உற்சாகத்தில் பிசிசிஐ தலைவர் பேச்சு

2027 ஒருநாள் உலகக்கோப்பை தொடர் நெருங்கி வரும் வேளையில், இந்திய அணியின் முக்கிய வேகப் பந்துவீச்சாளரான முகமது சிராஜிற்கு போதிய வாய்ப்புகளை வழங்காமல் முடக்கி வைப்பது இந்திய அணிக்கு ஆபத்தாக முடியும். உலகக்கோப்பை கனவை நனவாக்க சிராஜிற்கு அனைத்து போட்டிகளிலும் தொடர் வாய்ப்பு வழங்கப்பட வேண்டும் என்பதே கிரிக்கெட் விமர்சகர்களின் கருத்தாக உள்ளது.